عمرو أديب: مفيش أمل أنا زملكاوى من 49 سنة فرحت فيهم 3 مرات بس

علق الإعلامى عمرو أديب، على الشوط الأول لمباراة إياب نهائى إفريقيا بين الزمالك وصن داونز، قائلاً: "مفيش أمل الماتش مش ماشى كويس، الشوط الأول خلص، والناس فى الاستاد عاملة مهرجان، الجمهور شاف الويل عشان يكون حاضر الماتش ده".
وأضاف خلال تقديمه برنامج "كل يوم"، على فضائية "on E" :"الناس سفت التراب عشان تمشى ورا الفريق" مشيراً إلى أن جمهور الزمالك يحرك الصخر، متابعا: "الجمهور يطلع ميه وبترول من الأرض، والله ما قصروا، بس اللاعيبه فيها حاجة" موضحاً أن الحلول عند الزمالك بسيطة، وكل الأمانى ممكنة، لكن صعب.
واستطرد أديب: "حط ميه حط نار جمهور الزمالك جمهور جبار، تيجى تسأل العيال الصغيرة ليه بتشجع الزمالك، دا لحب الزمالك، سواء اتغلب الزمالك ولا لا هنفضل نشجعه، ولو ماخدناش البطولة هنفضل زمالكوية على طول".
وأردف عمرو أديب: "إن شاء الله اليوم يعدى على خير.. اااه لو لعبت يا زهر.. أنا بحتفل بعيد ميلادى ال53، وأنا زملكاوى بقالى 49 سنة، فرحت فيهم 3 أو 4 مرات بس، ولكن مستمر زملكاوى، وهفضل زملكاوى، وبقول لاخواتنا فى النادى الأهلى اللى ساندنا النهاردة الله يكرمه، واللى مش ساندنا الله يكرمه مطرح ما هو قاعد".