حديث المدينة

مفيد فوزى : أهلا بحضراتكم لا تحظى اللعب الفردية والبطولات الفردية باهتمام حقيقى سباحة ، مصارعة ، تنس يمكن التنس بتاخد اهتمام لكن بيغلب على الناس الاهتمام الحقيقى الكاسح لكرة القدم من أيام رجع كرم جابر ومعاه ميدالية فضية الناس قالت الخبر وبس خلاص في أي بلد في الدنيا لما يرجع أي بطل مصارع الناس تهتم والجرائد تكتب لكن ثقافتنا واقفة عند كرة القدم ولأنى لا أنتمى إلى أي نادى فبتكلم على كرة القدم بكل هذا الوضوح أنا لا أنا أهلاوى ولا زملكاوى ولا إسماعيلاوى ولا سكة حديد ولا حاجة أنا بنتمى لنادى الصيد ومافيهوش كورة الغريب إن مكان المصارع على أرض الواقع في الرياضة يكاد يكون معدوم مفيش أي تحليل ده لعب ازاى ده عمل ازاى التدريب خد أد إيه التمرين أد إيه شخصية هذا البطل ولا حاجة عنه عشان كده كسرت القاعدة وأردت أن أعرف كرم جابر المصارع المصري المتميز مين هو خايف من إيه بيغير من إيه مين والدته مين أخوه كام ساعة في التدريب كل هذه المعلومات حرصت إن أنا أقدمها لحضراتكم كرم جابر في حديث المدينة ومعكم مفيد فوزى
فاصل
عبارة عن لقطات لبعض بطولات كرم جابر
مفيد فوزى : كرم جابر هل رفضت العرض المقدم لك للجنسية القطرية وهل صحيح إن حد تقدم لك بهذا العرض إيه الحقيقة وراءه ؟
كرم جابر : بسم الله الرحمن الرحيم عرض قطر ده كان بالنسبة لي مفاجأة ولكن هو مش مضبوط بالضبط زى ما الناس بتقول عشان عرض قطر ده أصلا كان له قصة ثانية إن دولة قطر أو بمعنى أصح إن وزارة الرياضة هناك عاوزانى أعمل كرم جابر سنتر ويبقى فيها الأكاديمية بتاعت المصارعة وأطلع لهم مصارعين في قطر وعندهم النشاط شغال الخبر ده كان بينى وبين بتوع قطر يعنى ما كانش حد خالص واصله الخبر ، الخبر أول ما وصل بس وصل بطريقة مختلفة إنى رايح ألعب باسم قطر وحاجات كثير جدا طبعا قطر دولة عظيمة جدا وبتقدر الرياضيين ولكن أنا بتشرف بمصريتى بتشرف ببلدى كمان أنا قلت قبل كده إنى ما ينفعش أقعد ألعب طول عمرى باسم مصر وفى آخر كام سنة وأنا هبطل أروح ألعب باسم قطر
مفيد فوزى : طبعا اتقال إنك هتلعب باسم قطر معناها إنك هتاخد الجنسية القطرية منطقيا
كرم جابر : أكيد
مفيد فوزى : ما حقيقة إن انت الجائزة الذهبية أعتقد تقدر بحوالى مليون جنيه وأعتقد إن كمان الجائزة الفضية 750 ألف السؤال هل صحيح إنك انت رفضت المبلغ بتاع الجائزة الفضية وطلبت 5 مليون
كرم جابر : لا خالص يعنى الموضوع ده ما حصلش أبدا وما طلعش منى أو ما طلعش بكلمة أقدر أقول إن أنا أقول إن أنا عايز أرفض أنا طلبت التقدير ، التقدير في حد ذاته بيتميز به حاجات كثير التقدير للبطل الأولمبى ده مش فلوس يعنى أنا يعنى مش عايزين نتكلم على الفلوس يعنى طبعا الفلوس بتعمل مشكلة بصفة عامة أو بصفة خاصة بيعمل مشاكل للناس كلها وفى نفس الوقت برضه هي بتعمل لي مشاكل يعنى هي بتعمل مشاكل لإن الناس بتبقى فاهمة أو عندها خلفية إن أنا ما بتكلمش إلا عشان الفلوس هو طبعا أكيد مفيش حد بيشتغل من غير فلوس أنا طبعا بلعب رياضة علشان بحبها وعشان بلدى وفى نفس الوقت مش هلعب علشان أصرف على نفسي من جيبى الخاص أنا أكيد بلعب رياضة عشان أكيد هي لها دافع فالدافع المادى ده مهم جدا يبقى بالنسبة لي حافز فاللى أنا طلبته ما طلبتش إنى آخد 5 مليون ولا طلبت مبلغ خالص ولا رفضت المكافأة أنا وافقت بالمكافئة وأول ما سيادة الوزير أعطانى شيك ما اعترضتش خالص ولكن أنا بطلب التقدير كبطل أوليمبى جايب ميداليتين أوليمبيتين
مفيد فوزى : كرم جابر المصارع بتجى له حالة نفسية
كرم جابر : طبعا
مفيد فوزى : زى إيه
كرم جابر : يعنى أنا خليني أتكلم عن نفسي يعنى مش هفرق طبعا عن أي مصارع لكن أنا بطبعى مودى يعنى المود بتاعى متقلب دائما يعنى ممكن أبقى كل 5 دقائق أبقى في مود مختلف وما ينفعش أبقى في مكان وأنا مودى مش مضبوط نفسه زى يوم الماتشات يعنى لو أنا في يوم الماتشات أو المباريات ما عنديش مود المباريات لازم هخسر المقياس بتاعتنا
مفيد فوزى : امتى تضبط المود عند المباراة
كرم جابر : امتى أضبط المود عند المباراة سؤال جميل جدا هو أنا بضبط المود عند المباريات بالتركيز والبلان يبقى بالتركيز والبلان مفيش بلان ومفيش تركيز ما ينفعش البلان والتركيز أهم حاجة التركيز والبلان يعنى انت لازم كل خطوة يوم الماتش تبقى محسوبة يعنى ما تروحش سورى يعنى ما تروحش الحمام غير وانت ما حاطه في دماغك لا انت عارف إن انت هيجي لك وقت لازم تدخل فيه الحمام فلازم هتتحرك ازاى الحمام فين بنزل له بسلم تحت أو فوق عارف إنى هاجى قبل الماتش بثلث ساعة بالضبط لازم أبدأ أغير هدومى عشان أسخن لازم قبل ما أخش الماتش ب 5 دقائق لازم أبقى كل ده لازم يتحسب ويتعمل لإن هو ده اللي بيخليك تخش الماتش مركز لإن انت كل حاجة مركز لها بتعملها
مفيد فوزى : أصوات الناس اللي قاعدين حوالين الحلبة بتوصلك وانت بتلعب
كرم جابر : في قلبى أكيد الحمد لله يعنى من أحسن الناس اللي بسمع كويس جدا خاصة في الماتش ممكن أسمع أي حد بس ببقى في تركيز تام يعنى بقدر نفسي إن أنا ما بسمعش ولكن أنا كل حركة بسمعها وكل صوت بسمعه وبسمعه كويس جدا كمان بس تركيز الماتش مختلف بيطلعنى بره المود ده مش معنى إن أنا ما بسمعش لا أنا بسمع كويس بس عارف انت اللى بتتسمع ومقلوب الحاجة اللي بتتسمع وبتترمى غير اللي انت بتبقى مركز له ده اللي بيبقى في الدماغ الحاجات التركيز والبلان انت هتخش تعمل إيه في التركيز والبلان انت هتخش تعمل إيه في المباراة هو ده اللي بيتحفظ لما بيخش عليك تشويش أو أصوات حد بيشجع أو حد بيقول برافو يا كرم أنا بعديها بعمل لها ريبلاى في المخ وتقلب نفسها غير اللي أنا حاطه في ال 6 دقائق بتوع الماتش دول ما ينفعش دول لازم يتسيفوا لازم يتنفذ فيه كل حاجة في الدقيقة مثلا الأولى لازم أعمل كذا في الدقيقة الثانية لازم أريح في الدقيقة الثانية مثلا لازم أفتح شوية عشان اللاعب لما يقعد تحتى يبقى هو ما عندهوش نفس أو أقدر آخد الحركة في الجولة الثانية فيه وضع مختلف لو أنا كسبان أو لو هو كسبان فهو ده اللي بيخلى فيه تركيز في الماتش عشان تخش الماتش مركز يبقى انت لازم تكون مركز قبليها والتركيز ما ينفعش انت مثلا تيجى قبليها وأقعد أركز أنا كدهه أو قبل الماتش بساعة وخلاص أنا هقعد أركز لا
فاصل
عبارة عن لقطات لبعض بطولات كرم جابر
مفيد فوزى : الأم في حياة بطل زى كرم جابر عملت إيه تفتكرى كرم وهو صغير كان فيه أي شئ ينبئ بإنه في يوم من الأيام هيحتل مانشيتات الجرائد ويبقى مشهور ويبقى يعنى رمز للمصارعة الرومانية في مصر
الحاجة / فاطمة كامل :طبعا
مفيد فوزى : ازاى
الحاجة / فاطمة كامل :هقول لحضرتك ازاى
مفيد فوزى : كان عنده كام سنة
الحاجة / فاطمة كامل :هو كان يعنى من عمر 3 سنين أو 4 سنين كان والده الله يرحمه كان يحط له عقلة بره ويقول له اللي هيعمل العقلة أنا هشيلك وانت أقف عليها احنا هنا برضه حسينا إن كرم جابر ده ممكن في المصارعة ده ويحب المصارعة واحنا عيلة يعنى كلها مصارعين
مفيد فوزى : كان تلميذ شاطر
الحاجة / فاطمة كامل :جدا
مفيد فوزى : يعنى دائما يقولوا إيه الولد يبقى شاطر في الرياضة لكن ما يبقاش شاطر في الدروس
الحاجة / فاطمة كامل : هو كان شاطر في كله وكان متخصص لإن هو قبطان بحرى فكان مختصص لهم بيقعد لهم في الرياضة فطبعا مع مرور الوقت هو يحب يلعب في الشقة بتاع يحط حاجة ما اعرفش إيه
مفيد فوزى : حرك ده
الحاجة / فاطمة كامل : يتحرك فمين برضه كشفه كمان أخوه عادل أخوه عادل ده أقدم منه في اللعب كان دائما برضه عادل هو أكبر منه في السن حتى لما سنه كبر شوية يقول لي خلى بالك يا ماما ده ممكن ده هيبقى بطل
مفيد فوزى : عادل
الحاجة / فاطمة كامل : آه عادل طبعا
مفيد فوزى : يعنى بص له بنظرة
الحاجة / فاطمة كامل : عادل ده كان ممكن يجيب 3 أوليمبياد بس معلش الدولة هي اللي قسرت مع عادل جابر
مفيد فوزى : عادل بقى اللي أصبح بعد كده المدرب بتاعه
الحاجة / فاطمة كامل : المدرب بتاع كرم جابر والأب الروحى بتاع كرم جابر
مفيد فوزى : كمان
الحاجة / فاطمة كامل : بدليل إن هو بيسيب أمريكا وينزل له الماتشات وينزل هنا وينزل هنا وكل ده على حساب عادل
مفيد فوزى : قولى لي لما بتشوفى كرم بيتشال ويتهبد مش كده وللا أنا غلطان في التعبير بيتشال ويتهبد على الأرض بتحسى بإيه
الحاجة / فاطمة كامل : أنا ده أنا ممكن أكون في المستشفى آه أمال إيه أنا عايزة ابنى دايما رافع راسه وكسبان هو اللعب هو كده مكسب وخسارة بس أنا اتعودت إن أنا أشوف كرم جابر بمكسب مش بخسارة وبحب أتفرج عليه لإنى ده ابنى وابن عمرى اللي أنا ربيته بعد ما أبوهم اتوفى وفاته وعمره 26 سنة 8 أنفار بقيت أنا أمهم وأبوهم ما سبتهمش وما فارقتهمش لدرجة إنى كنت بروح لكرم في أمريكا لما كان بيلعب في سيبيا لما كان بيلعب وعادل بيروح له هناك كنت أنا ببقى هناك عنده في أمريكا عشان أتفرج أقول له عادل طب روح انت و أنا أتفرج شوية عشان تعبانة شوية يجيب لي الفيلم كله لإن عادل ده من النوع المدقق يعنى كل حاجة يعمل لها حساب
مفيد فوزى : أنا شايف إن عادل واخد منك اهتمام أكثر من كرم وللا أنا غلطان لا أنا بقول لك بصراحة بقى قولى لي هو عادل هو البكرى
الحاجة / فاطمة كامل : عادل البكرى
مفيد فوزى : طيب قولى لي بقى
الحاجة / فاطمة كامل : عادل ده أول من العين شافته وبعدين عادل من صغره رياضى يعنى كإنى عايزة أقول لحضرتك ده مولود رياضى
مفيد فوزى : وكرم
الحاجة / فاطمة كامل : وكرم جابر ما هو كمان أبوه من بعد وفاة أبوه هو عادل جابر اللي خلى كرم جابر جعل منه بطل
مفيد فوزى : المدرب ، المدرب البطل عادل جابر فهمنى يعنى إيه مدرب المصارعة
عادل جابر : والله أنا قبل كل شئ أحب إنى أشكر البرنامج وأحب أقول إن كان دورى في الأولمبياد مش بس تدريب كرم هو كان تدريب كرم معنويا وتأهيله معنويا وبدنيا هو كرم مش محتاج فنيا لإن هو فنيا عالى جدا وعلى أعلى مستوى في العالم يعنى من أعلى اللعيبة فنيا
مفيد فوزى : وأنا أعيش اللاعب بأد إيه من التدريب هل هي بالساعات تقاس بالساعة
عادل جابر : آه 1500 ساعة
مفيد فوزى : 1500 ساعة التدريب تدريب لاعب المصارعة
عادل جابر : بيوصل الأوليمبياد
مفيد فوزى : قول لي يا عادل من فضلك هو المصارع يملك يلعب ملاكمة
عادل جابر : لا
مفيد فوزى : الملاكمة ملاكم
عادل جابر : الملاكمة غير المصارعة
مفيد فوزى : أمال المصارعة اللي بشوف فيها يموتوا بعض ويكسروا وسط بعض ويمكن يضربوا الحكم دى إيه دى مصارعة إيه
عادل جابر : مصارعة هواة المحترفين وهى آكتينج زى تمثيل يعنى
مفيد فوزى : يعنى يمثلوا الاثنين
عادل جابر : آه وهى اتعرضت علينا على فكرة يعنى أمريكا عرضتها علينا بعد الأولمبياد بس مش الأولمبياد دى الأولمبياد اللي فاتت
مفيد فوزى : وهى الناس بتخش الرهانات فيها
عادل جابر : آه فيها مراهنات
مفيد فوزى : فيها مراهنات لكن كلها تمثيل
عادل جابر : آه كلها طبعا تمثيل هي بيبقى متفق على الماتش وبيبقى معروف مين اللي هيكسب ولكن هم لازم يعرفوا الجمهور إن ده حقيقى زى الأفلام كده
مفيد فوزى : انت حاسس إن كرم خد نصيبه
عادل جابر : لا
مفيد فوزى : ليه أنا سمعت إن في الاتحاد هنا مفيش حتى صورة لكرم
عادل جابر : ده حقيقى مفيش صورة لكرم فعلا وهو في شدة الحزن عشان الاتحاد الدولى للمصارعة في لوزيان بسويسرا اللي هو المقر بتاعه عامل راس لكرم بقى من العظماء اللي هي ال head face فيعنى هو من عظماء اللعبة فاتعمل له راس فاتحاد المصارعة المصري مفيش صورة لكرم لكن تتخيل انت لما تخش اتحاد المصارعة مفيش صورة لبطل جاب ميداليتين أوليمبيتين وفى نفس الوقت أعظم رياضى جاء في تاريخ مصر الميدالية الذهبية والميدالية الفضية خلته بالأرقام هو أعظم رياضى في تاريخ مصر
مفيد فوزى : طيب فهمنى يعنى إيه هو دخل في المباراة الأخيرة في لندن 69 كيلو وأفتكر إن الذهبية كان 96 كيلو لكن الأخيرة في لندن كان ب 84 كيلو هو قلة الوزن شئ سيئ بالنسبة للمصارع
عادل جابر : بالنسبة لكرم جسمه فيزيكلى هو muscles كله مسكيلس حضرى لما بيخس بيتعب مش كويس بالنسبه وله هو كان 96 كان أولريدى اتأهل في مصر
مفيد فوزى : لا فهمنى عشان الناس تفهم هو كل ما كان الوزن ثقيل للمصارع كل ما كان ده أفيد
عادل جابر : الحركة بتخف يعنى في الوزن الثقيل قوى الحركة تخف في ال super heavy weight الحركة بتقل إنما في وزن 84 هو الوزن بيعتمد على حاجتين القوة والسرعة الأوزان الثقيلة من 96 و 120 هو آخر وزن اللي هو 120 هي بتعتمد أكثر على القوة لغاية دلوقتى مفيش حد يعنى قبل الفكرة أو استغل اسم كرم في تركيا حمزة هو 3 ميداليات أوليمبية مدارس في جميع أنحاء تركيا باسم حمزة سؤالى دلوقتى كرم ده بعد ما يبطل الدولة هتستفيد منه ازاى
مفيد فوزى : هو المفروض المصارع يبطل في عمر كام
عادل جابر : اللاعب الأوزباكستانى تايم زوف هو 120 كيلو 3 ميداليات ذهب حصل على 3 ميداليات ذهب
مفيد فوزى : ده روسى
عادل جابر : لا تايم زوف أوزباكستانى هو سنه دلوقتى 40 سنة هيلعب واحدة ثانية يبقى سنه 44 سنة في البرازيل وده لاعب مصنوع مش موهوب زى كرم
مفيد فوزى : يعنى إيه مصنوع
عادل جابر : هقول لك ده كرم مولود بالفطرة موهوب يعنى هو جيفتد ربنا ادى له ملكات في جسمه إن هي تستشعر الحركة قبل ما الmind اللي هو المخ يدى ال order جسمه بيدى ال reaction بتاعه قبل ما الmind بتاعه يدى order فده الموهوب اللي هو موهوب بالفطرة اللي عنده ملكات زى مثلا اللاعب ميسى زى مارادونا اللاعب ده موهوب اللاعب المصنوع هو لاعب بيوصل لمرحلة أوليمبية معينة بيجيب ميدالية أوليمبية ولكن مجهوده بيبقى أعلى من اللاعب الموهوب
مفيد فوزى : إيه الفرق بينك وبين الأمواج
كرم جابر : الفرق بينى وبين الأمواج حاجات كثير
مفيد فوزى : إيه
كرم جابر : الموج ميه
مفيد فوزى : والمصارع
كرم جابر : المصارع بيختلف هو بنى آدم وهو غريزة يعنى لو المصارع كويس يبقى لازم يبقى جواه غريزة قوية جدا يعنى غريزة المصارع لازم تبقى مختلفة من كل مصارع للآخر وهو ده اللي بيميزه عن مصارع ثانى
مفيد فوزى : بتعمل إيه مع المعجبات خصوصا في أوروبا في لندن
كرم جابر : الأول وللا دلوقتى
مفيد فوزى : عايز الأول ودلوقتى
كرم جابر : الأول يعنى كنت بتقبلهم بأسلوب مش كويس
مفيد فوزى : كنت نافر
كرم جابر : آه يعنى ناشف
مفيد فوزى : وبعدين
كرم جابر : دلوقتى بقى الحمد لله بتعامل كويس جدا مع الناس يعنى خاصة إنى بعرف أفرق بين الناس وبعضيها أو بعرف مثلا من المعجبات أو جاية تتصور جاية تقول كلمة إعجاب أو الحمد لله بعرف أفرق ما بينهم فدلوقتى يعنى بهتم بهم أكثر
مفيد فوزى : قل لي الاتحاد لما عمل في يوم من الأيام قرار بإنك ما تدخلش اللعبة لإنك بتفشى المعايير ازاى يعنى إيه
كرم جابر : دى كانت ده كان مشروع التميز
مفيد فوزى : مشروع البطل الأوليمبى
كرم جابر : هو باختصار اسمه مشروع التميز ، مشروع التميز ده المفروض بيصرف على اللعيبة اللي هي متأهلة للأولمبياد
مفيد فوزى : وانت ازاى ما تمشيش مع المعايير
كرم جابر : عشان المعايير ، مشروع التميز بتقول اللي ينطبق عليه المعايير اللي هو بياخد من أول لحد ثامن في البطولات التالية بطولات عالم ، كاس عالم أوليمبكس حاجات قوية جدا من أول لثامن هي دى المعايير المشروعة أنا ما كنتش أصلا كان قبليها بسنة ما كنتش حضرت بطولة العالم أنا رجعت شهر 11 فبطولة العالم بتتلعب من شهر 9 إنما بعد بطولة العالم بشهرين فما لعبتهاش فما علييش أي يعنى ما عنديش أي بطولة بتعمل رينج اللي هم بيقولوا عليه في المعايير ان انت لازم تنطبق عليك المعايير عشان تخش مشروع التميز أنا من أول ما رجعت من شهر 11 ما عنديش أي بطولة ألعبها بتقول حتى إنى أقدر أخش جوه المعايير حتى كان فيه أفريقيا المؤهلة أخدت أول أفريقيا اللي زى أفريقيا مش داخلة ضمن المعايير
مفيد فوزى : استغربت لما عملوا شارع باسمك في الجيزة وما عملوش في اسكندرية
كرم جابر : والله أنا مقدر إن الدنيا مقلوبة شوية حال البلد يعنى مش مضبوط وما كانش موجود عندنا محافظ اسكندرية أنا ما استغربتش ولكن انبسطت أكثر
مفيد فوزى : ليه
كرم جابر : انبسطت لإن الناس اللي بره
مفيد فوزى : بره اسكندرية
كرم جابر : آه يعنى محافظ الجيزة
مفيد فوزى : مقدرينك
كرم جابر : يعنى دى حاجة بتبسطنى جدا هو بص يعنى مش موضوع إن أنا اسكندرانى أو من القاهرة أو من أي حتة مصرى باعتبار إن هو المحافظ فكر إن أنا أعمل شارع باسمى فهو فكر في إن أنا مصرى
فاصل
عبارة عن بعض لقطات لبطولات كرم جابر
مفيد فوزى : كرم وهو صغير كنتى بتظغطيه
الحاجة / فاطمة كامل : لا أنا الحمد لله رب العالمين من النوع اللي بهتم بأكلاتهم قوى الأكل ده ما عندكش فكرة
مفيد فوزى : بتوكليه إيه
الحاجة / فاطمة كامل : أوكله بط أوكله حمام
مفيد فوزى : بطة
الحاجة / فاطمة كامل : بط
مفيد فوزى : بطة كاملة
الحاجة / فاطمة كامل : لا يعنى ممكن أقل منها عشان محدش يحسده
مفيد فوزى : هي فعلا زى ما بيقولوا الشكوى رقوة
الحاجة / فاطمة كامل : آه
مفيد فوزى : انتى مش عايزاه يتحسد
الحاجة / فاطمة كامل : آه كلهم ده مش كرم لوحده أنا يعنى في الأكل فنانة أكل أعرف أأكل عيالى ازاى لإن ده لاعب هيطلع على البساط هيطلع يغلب وللا يتغلب يعنى لازم تطلعه إن هو متغذى على انسى متغذى غذاء تمام فطبعا دى تخصصى إن أنا أأكل العيال مش كرم لوحده الولاد كلها أحب أظغطهم أحب أوكلهم كل الأكلات
مفيد فوزى : الأم لما تقف وراء بطل معناها إيه معناها إن هي راعته من ساعة ما كان صغير كان ممكن جدا إنك انتى ما تديلوش الاهتمام ده كله وهو صغير
الحاجة / فاطمة كامل : كان ممكن لو أنا زى أي أم لكن أنا عفوا أنا مش زى أي أم أنا العيل أنا لازمًا أنا وراه التدريب في أكله فين واللبس بتاعه عادل كان راح أمريكا وقال لي خلى بالك يا ماما خلى بالك عادل قعد 13 سنة بعد ما هو برضه كان إيه متولاه قال لي خلى بالك يا ماما كرم جابر ده الأجانب شافته والله العظيم أنا بكلمك الكلام ده حقيقى قال لك كرم جابر الأجانب شافته في أمريكا كان لعب مع أكبر سلاح وغلبه كانوا هم بيتباهو به كرم جابر لعب غلبه قال له كرم جابر ده ، ده مفيش لعب في أمريكا لو كان اللعب عادل دخله لابس حاجة كده لما شافوه عشان ما يعرفهمش إن هو كرم جابر فكله خد عناوينه وبتاع كانوا عايزينه هناك بس هو بيحب مصر
مفيد فوزى : سؤال هل كرم جابر خد نصيبه من الاهتمام والرعاية والتكريم في مصر
الحاجة / فاطمة كامل : مش اللي هو يعنى
مفيد فوزى : أستاذ شريف أنا أول مرة في حياتى بقابل واحد مهنته استشارى تسويق يعنى انت بتسوق البطل العالمى المصري الهوية المصارع كرم جابر فهمنى يعنى إيه بتسوقه
أ.شريف إبراهيم : التسويق ده علم كبير قوى
مفيد فوزى : أنا أفهم فيه تسويق سياسى
أ.شريف إبراهيم : هو كله تحت بند التسويق فيه تسويق سياسى
مفيد فوزى : قل لي ازاى
أ.شريف إبراهيم : التحضير للأمر أو للشأن اللي انت عايز تبيعه للناس سواء كانت سياسة كان منتج كانت خدمة لها تحضير ولها بيانات لازم يكون لها دراسات عن الخدمة أو عن المنتج أو الكلام ده كله
مفيد فوزى : طب المنتج المرة دى بطل
أ.شريف إبراهيم : آه
مفيد فوزى : تعمل إيه
أ.شريف إبراهيم : طبعا الموضوع مختلف شوية لإن احنا للأسف الشديد احنا في مصر انتاج البطل تسويقيا مش موجود إداريا مش موجود فبالتالي المسألة فيها صعوبة عن أي وضع في أي دولة أخرى فيها تقدم
مفيد فوزى : فهمنى في أي دولة أخرى بيحصل إيه
أ.شريف إبراهيم : لا بيحصل حاجات كثيرة قوى صناعة البطل بتبتدى من سن 9 سنين فيه فريق كامل جاهز في التغذية والتدريب
مفيد فوزى : يعنى حد متخصص تغذية ، حد متخصص تسويق دكتور نفسانى دكتور عظم جنب البطل
أ.شريف إبراهيم : آه طبعا مفيش كلام
مفيد فوزى : عندنا ده
أ.شريف إبراهيم : لا مش موجود طبعا
مفيد فوزى : يعنى كرم جابر ما عندوش الناس دى
أ.شريف إبراهيم : كرم جابر الحقيقة الموضوع ده بدأ متأخر جدا لأن كرم جابر كان من المفروض قبل أولمبياد 2004 يكون معاه فريق عمل ضخم جدا يشتغل به كان الراجل ده هيبقى 3 ميداليات أولمبية وعلى القمة طول الوقت لإن الحقيقة هو عنده talent عنده موهبة
مفيد فوزى : حضرتك بقى بتقوم بالتسويق ده بمعنى إيه
أ.شريف إبراهيم : انت عارف النهاردة كرم له اسم عالمى في مستوى المصارعة نفسه ويمكن المجلات الدولية ومجلة الفيفا بتاعت المتخصصة في المصارعة على صدر الغلاف بتاعها وهو نجم لك الحقيقة هو ما كانش له عوائد من هذه النجومية في صورة مالية لإن هو مركز في اللعب في الجزء الفنى يعنى مفيش حد بيتولى عنه الجزء التجارى الجزء التجارى بمعنى إن الراجل ده وراءه كم من المعجبين اللي احنا بنسميهم ال fanes اللي هم ممكن يتحولوا إلى قوة شرائية في منتجات هو بيستخدمها أو بعض الشركات زى مثلا على سبيل المثال اللبس أو التليفون المحمول أو بعض شركات الاتصالات كل دى حاجات ممكن تبقى من الرعاة لكرم إن هو وراءه شبكة كبيرة جدا من المعجبين ده جزء الجزء الثانى إن فيه منتجات بتطلع لها علاقة به مباشرة زى الشركات اللي بتدى بعض أنواع معينة من الفيتامين طرق كثيرة جدا لأنواع خاصة من المياه بتتشرب كل دى شركات لها دور مباشر في صناعة البطل
مفيد فوزى : انت بتلعب الدور ده
أ.شريف إبراهيم : بلعب الدور ده في كل أشكال الرعاة
مفيد فوزى : في حدود طبعا بالنسبة لمصر يعنى
أ.شريف إبراهيم : طبعا في حدود للعالم كله كرم معروف في مصر أكثر من مصر كرم بيمضى أوتوجرافات في أوروبا في أوروبا الشرقية في أوروبا الغربية في أمريكا أكثر ما الناس بتتصور معاه في مصر فهو له اسم عالمى ده الحقيقة المشجع جدا إن ال responses أو الرعاة ما يجوش بس من مصر الحاجة الثانية احنا برضه بنخش على المجال الطويل بعد ما يبطل كرم إيه الcareer بتاعه هيشتغل إيه هيعمل إيه نقطة مهمة جدا تجارية فعلى سبيل المثال احنا دلوقتى بنعمل أكاديمية خاصة بكرم جابر يدرب فيها لضمان استمرارية قوة المصارعة من خلال خبرة كرم جابر الدولية فبنعمل له أكاديمية دولية معانا ناس من أمريكا في كل التخصصات حتى في الأجهزة في الطب النفسى عشان نعمل أكاديمية على مستوى عالى وهيبقى لها فروع في مصر وخارج مصر وعندنا عروض من دول كثيرة في الخارج
مفيد فوزى : ده جزء من التسويق
أ.شريف إبراهيم : جزء من التسويق له
مفيد فوزى : مروان انت من أقرب الناس إلى كرم جابر كصديق وشفت في الفيديو صورتك وانت واقف مشجع وانت مش لاعب مصارعة لكن انت صديق سكندرى عشان كده عايز أسألك إيه أبرز الملامح الشخصية الخاصة في حياة هذا النجم كرم جابر
مروان بدر : بسم الله الرحمن الرحيم أولا كرم صديق وأكثر من أخ لي نعرف بعض من كذا سنة ومن زمان الموضوع ده خلانى ابتديت إن أنا أقرب منه وأعاشر حاجات كثير قوى في حياته اللي ما تعرفوش الناس لما تبتدى تقرب من كرم هي بس فاهمة إن ده مصارع وشكله فيه ملامح سلام في وجهه يعنى لكن اللي يتعرف على كرم ويقرب منه هيكتشف إن هو إنسان بسيط جدا خجول جدا بيحب مصر قوى ، قوى ، قوى ، قوى
مفيد فوزى : لما بيقرأ كلام في الجرائد وكلام أحيانا بيمس شخصه وبيمس وطنيته وعايز يخش معرفش جنسية إيه الكلام ده بيقبله ازاى
مروان بدر : بيضايقه جدا لإن هو أصلا مجرد التفكير في حاجة زى كده مش زعلته لا دى ضايقته وجرحته يعنى هو أولا مش هنقول بقى الكلام اللي بيتقال عامة لا هي دى الحقيقة فعلا عمره ما هيقدر يلعب باسم بلد غير مصر إنه يفوجئ يلاقى الكلام ده موجود وإن فيه ناس ممكن تصدقه فدى ضايقته قوى وهو برضه مش دوره إن هو يرد على الميديا ويطلع يقول أنا ما قلتش كده وللأسف احنا عندنا اللي بيقرأ بيصدق الكلام على طول ما بتحراش بقى المصداقية ويبتدى يشوف
مفيد فوزى : عمرك شفته مكتئب يعنى بيمر بحالات اكتئاب
مروان بدر : أكيد لما بيلاقى عدم اهتمام لما بيلاقى مشروع بطل أولمبى المفروض يكون أول واحد فيه يقول له لا انت غير صالح فنيا الموضوع طبعا يأثر عليه طب انتوا سبتونى طب حتى لو أنا وقعت حتى لو أنا محتاج رعاية طب حد يقف جنبى
مفيد فوزى : بيخاف من إيه
مروان بدر : إن هو يكون لوحده إن محدش يكون معاه عدم الاهتمام به بيأثر على نفسيته قوى
مفيد فوزى : قعدت كام سنة معاه
مروان بدر : أكثر من 8 سنوات
مفيد فوزى : علاقته بالمرأة إيه
مروان بدر : متزوج وعندى بنتين
مفيد فوزى : بنتين
مروان بدر : آه
مفيد فوزى : ما عندوش ولاد
مروان بدر : لا
مفيد فوزى : بناته احساسهم إيه
مروان بدر : هم لسه صغيرين يعنى فيه
مفيد فوزى : حاسين أبوهم بطل يعنى فيه
مروان بدر : فيه بنته الكبيرة ماريكا بتشوفه في التليفزيون وعارفة إن بابا بطل بس برضه ظروف المعسكرات اللي هو بيقضيها بره بيضطر إن هو يبعد عن البيت
مفيد فوزى : مراته مقدرة المعسكرات
مروان بدر : طبعا أكيد
مفيد فوزى : إيه الفرق بينك وبين جدو
كرم جابر : جدو جدى
مفيد فوزى : لا جدو هدوا مش كده
كرم جابر : آه جدو بتاع كورة أنا بتاع مصارعة
مفيد فوزى : ما هو عشان اسكندرانى مش كده مش جدو اسكندرانى وللا معلوماتى غلط
كرم جابر : لا أكيد مضبوطة
مفيد فوزى : آه إيه الفرق بينك وبين جدو
كرم جابر : هو بتاع كورة وأنا بتاع مصارعة
مفيد فوزى : من يحقق شهرة أكثر
كرم جابر : اللي جواه بطل مش اللي بتشهره الأضواء
مفيد فوزى : هل جدو جواه بطل وللا شهرته الأضواء
كرم جابر : احنا مش كونتاكت أنا ما قابلتوش خالص
مفيد فوزى : أنا حبيت أخسر سؤال حوالين موقع لاعب الكرة في دماغك بياخد شهرة أكثر
كرم جابر : طبعا بياخد شهرة أكثر
مفيد فوزى : وفلوس أكثر
كرم جابر : وفلوس طبعا أكثر
مفيد فوزى : ونجومية أكثر
كرم جابر : ونجومية أكثر
مفيد فوزى : ومعجبات أكثر
كرم جابر : كله أكثر إلا حاجة واحدة إن هو ما بيتعبش أد اللعبة الفردية يعنى لا يمكن بتاع الكورة دوة بيتعب أو بيتمرن زى ما بيتمرن اللاعب بتاع اللعبة الفردية
مفيد فوزى : هو وانت بتلعب مصارعة ما تقدرش تلعب ملاكمة
كرم جابر : بلعب أنا ملاكمة كمان غير المصارعة بس مش بحبها أصلا يعنى مش بحب لعبة الملاكمة
مفيد فوزى : قل لي واحد زيي مالوش في أي حاجة يعنى أنا لو وقفت أدامك وانت مصارع تقدر تعمل أي حركة في تجيبنى أرضا في الحال
كرم جابر : من غير سبب لا بس أكيد
مفيد فوزى : أنا فاهم أنا بكلمك من ناحية الأداء يعنى أنا مش هعرف أخش فيك
كرم جابر : لا
مفيد فوزى : أنا عايز أقول يعنى علاقة إنسان عادى بالمصارع
كرم جابر : هو أنا الحمد لله مش متهور الحمد لله ربنا لما بيدى لواحد قدرة على شئ ويحافظ عليها فبيكمنه بالتحكم فيها الحمد لله الرياضة دى بتعمل حاجة كويسة جدا في الإنسان في البنى آدم بتخلى عنده صبر بتخلى عنده صبر فالصبر للبطل مطلوب إن هو بيخليك تحقق ذاتك لإن أنا كل ما أبقى صبور هحقق ذاتى لما ما أبقاش صبور عمرى ما هحققه
مفيد فوزى : تفتكر الآباء المصريين والأمهات حريصين على إن ولادهم يلعبوا مصارعة وللا يلعبوا كورة بأمانة
كرم جابر : متهيأ لي كورة بس هو اللي بيتغير إن الشعب المصري يعنى شعب emotional عاطفى جدا فممكن مثلا يبقى القابلية على المصارعة بعد الأولمبياد بتاعتى أكثر من الكورة
مفيد فوزى : حاسس إن النقاد الرياضيين بيهتموا بالمصارعين
كرم جابر : لا خالص هو مع الأسف ما يفهمش يعنى إيه مصارعة مش كلهم المصارعة لعبة فردية يعنى مفيش أضواء حواليها فلعبة مدفونة هنا كمان لما هو ييجى يتكلم معايا في المصارعة بيسرح هو مش عارف يسألنى إيه في اللعبة فبيضطر يسأل عن حاجات ثانية
مفيد فوزى : ما تجرب معايا كده الحركة دى طبعا أنا محاولة يائسة يعنى انت من أول مرة يعنى عايز أعرف هتعمل إيه يعنى أنا مش عاوزك تتغلب لي في محاولة كمان إنى أجرب مقياس القوة