فيرنا إبراهيم تكتب: احلام مجنونة ( 4 )

يتفاجأ سامر بزيارة مجدى له فى منزله
سامر : فى ايه مين اللى على الباب
البواب : واحد عايز سعادتك بيقول انه له عندك خدمة
سامر : خدمة ......مين ده
مجدى : انا
سامر : بتاع العربية ........اهلا اتفضل ........روح انت يا عم شحاتة .............مش قولت لك هتحتاجنى خير
مجدى : مش انت قولت لى انى خدمتك وانى ليا عندك خدمة
سامر : مظبوط.........ممكن اساعدك فى ايه
مجدى : فى واحدة صديقتى عايشة فى وهم كبير موقف حياتها.......كلها متصورة انها بتحبك وعندها وهم ان فى يوم من الايام ممكن تحبها......تقدر تقول انها مجنونة بيك
سامر : وانا فى ايدى ايه اعمله
مجدى : تكرهها فيك
سامر : هههههههههههههههههه
مجدى : انت بتضحك على ايه
سامر : على انت بتقوله اعمل ايه بقى اروح اقولها لو سمحتى اكرهينى
مجدى : انت بتتريق عليا انا غلطان انى جيت
فيقف سامر امامه يمنعه من الخروج
سامر : استنى اصلى بحب اشوف قصص الحبيبة دى اوى
مجدى : واضح انى غلط فعلا
سامر : قولت لك استنى.........هساعدك
مجدى : يعنى هتكرهها فيك
سامر : تحب اول ما اشوفها اضربها بالقلم
مجدى : حلوة دى بس لا هى رقيقة مش هتستحمل
سامر : تفتكر انها لما تكرهنى ........كده هتحبك يعنى
مجدى : ممكن ماتدخلش فى خصوصياتى
سامر : اصلك صعبان عليا غلبان بتحب ومش طايل
مجدى : متشكر مش عايز منك حاجة
سامر : استنى ايه رأيك انا عزمكم على العشا بكرة فى البيت عندى
مجدى : بقولك عايزها تكرهك تقولى عزمنا على العشا
سامر : تعالى بس وهاتها معاك ومالكش دعوة
فى المدرسة
تقف راندا فى الفصل وتطلب من تلاميذها الرسومات التى رسموها
راندا : برافو ياولاد انتوا حلوين اوى.......مين بقى زى الشاطر يطلع لى الرسمة اللى رسمها
الطالب 1 : انا رسمت بابا
راندا : الله شاطر حلوة اوى
الطالبة 2 : وانا رسمت بيتنا
راندا : برافو وانت يا مازن يلا ورينا رسمتك
مازن : حظرى فظرى يا ميس ده يبقى مين
راندا: احنا هنلعب ولا ايه ........ايه ده ده شبه حد اعرفه
مازن : ايوة يا ميس ده سامر الممثل.......اصلى بحبه اوى
فيضحك زملائه
راندا : ايه ده يا ولاد عيب كده...........بتضحكوا علي ايه ...........يلا اتفضلوا على الفسحة يلا
.....استنى يا مازن
مازن : ايوة يا ميس
راندا : على فكرة رسمتك احلى واحدة فى الرسومات كلها
مازن : بجد يا ميس راندا
راندا : طبعا
مازن : انا بحبه اصله دمه خفيف...........وبطل زى سوبرمان كده
راندا : اوى اوى ويتحب اوى اوى
مازن : ايه ده يا ميس وانتى كمان بتحبيه
راندا : اوى قصدى انه بيمثل كويس...... هايل...........ايه رأيك انا هخليك تشوفه هعزمه فى حفلة المدرسة
مازن : بجد.........ياريت هو حضرتك تعرفيه
راندا : اكيد هشوفه قريب وهعزمهولك.......بس يارب مجدى يصدق فى وعده

وفى الاستديو اثناء تصوير عمله الجديد .......يصله رسالة جديدة من المعجبة المجنونة
سامر ( يقرأ الرسالة ) : بحبك بحبك اوى على فكرة النهاردة رسمتك.........نفسى ابعت لك الصورة اللى رسمتها لك بس مش هبعتها علشان ما تتريقش...........(وبعد ان ينتهى من قرأته يتحدث مع نفسه ) وبعدين بقى فى المعجبة المجنونة دى معقول تكون هى............اه صحيح ده مجدى قالى انها خريجة فنون جميلة معقول ده اكيد هى
بيت سامر
يجلس مجدى وراندا فى حديقة فيلا سامر وهم ينتظرونه ......امام طاولة طعام طويل وحولهم فرقة تعزف موسيقى كلاسيك وكأنهم يجلسون فى فندق راقى
راندا : معقول بجد سامر عزمنا على العشا وفى بيته كمان
مجدى : مش قولت لك يا بنتى صاحبى
راندا : مش مصدقة بصراحة
سامر : مساء الخير
وعندما تراه راندا تفقد الوعى
مجدى : ايه انت عملت فيها ايه
سامر : يا ابنى انا جيت ناحيتها ........انا حتى ماسلمتش عليها
مجدى يحاول ايفاقتها : راندا ......فوقى يا بنتى فيه ايه
راندا : ايه ......ايه اللى حصل .....ايه ده انت فعلا .......انت حقيقى
سامر : ازيك يا انسة راندا .......انا مبسوط اوى انك قبلتى عزومتى
مجدى : اسمها قبلنا عزومتك هو انا قرطاس جوافة
سامر : اسفين يا قرطاس............يووه اسف يا مجدى
راندا : غريبة انت مش مغرور خالص زى مابيقولوا ناس
مجدى : الفتنة حرام على فكرة
راندا : ولا دمك تقيل كمان
سامر : ده مين اللى قالك كده اكيد واحد مابيفهمش
مجدى : وبعدين بقى
سامر : واضح يا انسة راندا انك واخدة فكرة وحشة اوى عن اللى شغلين فى السينيما او الممثلين عموما انا بنى ادم عادى اوى.......وعندى اصحاب وحياة وبخرج وبضحك وبزعل مش تمثال يعنى بشر عادى
مجدى : بس اكيد بقى عرفت بنات كتير اوى
سامر : مش بالضبط عندى معجبات كتير ماعرفش اغلبهم
راندا : ليهم حق يحبوك وتبقى فارس احلامهم
سامر : فارس مش اوى كده تحبى ترقصى
فيضغط مجدى على سامر من غيظه .... فيصرخ سامر
سامر : ااااااااااه
راندا : فى حاجة
سامر ينظر لمجدى : لا يظهر ناموسة مزعجة قرصنتى
مجدى : يقرصك تعبان و يخلصنى منك........يا استاذ نحنوح
سامر : نعم بتقول ايه
مجدى : بقول يا استاذ سامر انت عندك تصوير بكرة لازم تنام بدرى.........مش عايزين نسهرك اكتر من كده
راندا : اه صحيح عندى ولد فى الفصل بيحبك اوى اوى وانا وعدته اعزمك فى حفلة المدرسة ...بس ماتكسفنيش قدامه ممكن
سامر : ده صعب جدا
راندا : بليز
سامر : طب خلاص انا مش هكسفك قدامه وهحضر الحفلة
تتصل سلوى بصديقتها لتطمئن على ابنها
سما : ماتكبريش الموضوع يا سلوى مافهاش حاجة.........ان مازن يحب سامر بالشكل ده دى حاجة عادية..........لانه ممثل وله معجبين كتير
فيقف مازن خلف سما ليفاجأها
سلوى : ارجوكى يا سما حولى تبعديه عن فكرة انه يقابله دى
سما : يعنى هو هيعرف يقابله وحتى لو ده حصل هيجرى ايه ........مش هيعرف حاجة .......اذا كان سامر نفسه مايعرفش ان مازن ابنه
فيتفاجأ مازن : بابا