صحيح .. البطران عيشته قطران

السلام عليكم ورحمة الله
تحياتي لك استاذة نيفين لعلك بخير،
مشكلتي باختصار اني محتاج الدنيا تظبط معايا اكتر في حياتي ومش عارف .. صحيح شغلي تمام وحياتي مستقرة والحمد لله لكن مش عارف ليه من جوايا مش مبسوط كدة حاسس ان مش دة اللي استاهله فيه ناس تانية اقل مني وعايشين احسن بكتير بالرغم من انهم بيتعبه اقل مني بكتير والدنيا ماشية محسوبيات كالعادة .. انا بحمد ربنا والله لكن بتغاظ لما اشوف اشكال ضاله بتتسلق علي اكتاف الغير وهمة ما يستاهلوش كل اللي همة فيه وانا في مركزي زي ما انا مش لازم امسح جوخ علشان اخد اللي انا عايزه ولا لازم انتحر في الشغل علشان احقق حاقة صغيرة .. المفروض كله يمشي بالمعقوليعني علي قد شغلي اخد ولا ايه يا استاذة ؟ دة غير بقي علي المستوي الاجتماعي .. الاقي واحد جربان متجوز مثلا واحدة بنت عيلة وزي القمر والمصيبة الاقيها كمان بتموت فيه وبتتمناله الرضا يرضي لا وهوة بيتامر كمان عليها والله ولا تقلعيه من رجلك اسف علي التشبيه لكن دي الحقيقة ودي الدنيا مفارقات عجيبة وغريبة .. انا قرفت ومش عارف اعمل ايه .. ممكن تقوليلي رايك بس بصراحة ؟
حسن
فضفضة
محررة الصفحة .. نيفين حجازي
استاذ حسن .. هوة ليه حضرتك مركز مع الناس واللي ربنا انعم بيه عليهم وناسي خالص نعمه عليك ؟ .. وليه اساسا حاطط نفسك في موضع مقارنه بالرغم من انك ممكن تكون الافضل ؟ ولا ايه ؟ .. ليه مش عارف ومش شايف نعم ربنا من الاصل .. عارف ليه ؟ لانك بكل بساطه مش راضي .. فطبيعي مهما ربنا ادالك عمرك ما هتشوف اللي في ايدك اسفة اذا كانت لهجتي حادة لكن يادوب من وجهة نظري هية مناسبة لانكارك نعمة ربنا وواجبي انبهك لانك طلبت مني الصراحة .. شوف يا استاذ حسن .. انت عمرك ما فكرت تغمض عنيك وتمشي لمدة نص دقيقة جوة بيتك وتشوف هتحس بايه ؟ .. او هتواجه ايه في الضلمه .. جرب كدة وقولي قيمة نعمة البصر لواحدها تساوي ايه ؟.. جربت مرة تنام قاعد علي سريرك لمدة ساعة مثلا وتحس بقيمة ان ضهرنا بيتفرد ويتني ؟.. يا استاذ حسن .. فكرت مرة في نعمة انك بتصحي الصبح بتعرف تنزل من فوق السرير عادي كدة من غير اي عقبات وتمشي تدخل الحمام عادي كدة برضه .. بصيت علي كف ايدك مرة وهية بتناولك اللقمة وصوابعك سليمة وبتمضغ وتبلع اللقمة عادي من غير برضه عقبات .. تعرف يا استاذ حسن .. انا قابلت ناس ما عندهمش كل دة والغريب انهم بيحمدوا ربهم والاغرب انهم حاسين انهم في اكبر نعمة .. يا استاذ حسن .. فكرت مرة في نعمة البيت ان عندك بيت .. نعمة الاهل .. نعمة الصحة والجار الطيب ولا نعمة الوطن يا استاذ حسن نعمة الوطن .. لو فكرت في كلامي والله ما هتفارقك الراحة من كتر نعم ربنا عليك .. صل علي النبي واذكر الله وسيبك من الناس وافتكر نعم ربنا عليك واعمل اللي عليك وبس واتفرج علي رزق ربنا وهوة بيختارك مش انت اللي هتجري وراه صدقني .. انشغالك بالناس نساك انك في نعم كتيرة مش موجود ربعها عند ناس كتير قوي .. لما هتبدا بحمد ربنا وتداوم علي ذكر نعمه هوة كمان هيحسسك براحة البال ربنا ينولهالك ..