ازيك استاذة نيفين انا بعتالك انهاردة مشكلتي يمكن الاقي عندك النصيحة اللي ابرد بيها قلبي واعدل بيها عيشتي .. انا زوجة من سبع سنين منهم خمس سنين جوزي متغرب وسايبني انا والولاد علشان وبينزل اجازة كل ما الظروف تسمح وساعات بيبعتلنا احنا اللي نروحله .. المشكلة دلوقتي اني حاسة اني اكني ارملة او مطلقة لاني معظم السنة قاعدة من غير جوزي عايشة لواحدي بواجه كل امور الحياة لواحدي وبدير كل امور الولاد برضه لواحدي زهقت من دور الام والاب مع بعض في نفس الوقت وتعبت جدا وهوة هناك مش حاسس باللي بتعرض له من سخف وصعوبة الحياة كل اللي حوالية بيعيشو مع اجوازهم بيخرجو مع بعض وانا ببقي معاهم عازول طول الوقت لواحدي بالعيال وحتي لما بروح زيارات للعيلة وواجه التلميحات الغلسة بتاعة اخبار جوزك ايه مش ناوي ييجي ويستقر بقي وتتلموا ؟ ببقي عايزة انتحر من الغيظ والاحساس بالقرف .. انا خلاص حاسة ان جوزي لما بييجي اجازة اكنه راجل غريب عني او اكنه ضيف تقيل بقيت عايزاه يفضل هناك مسافر علي طول يبقي دوره الممول وخلاص يادوب يدفع مصاريف المدارس ومصاريفي واحتياجاتي وخلاص والظاهر ان الحياة شكلها بالنسباله بقت كدة لانه هوة نفسه مبقاش يفتح معايا موضوع انه يفكر ينزل مصر اصلا الظاهر العيشة عاجباه هناك ولا شكله باين عليه اتجوز واحدة تانية والله ما بقاش فارق معايا يتجوز يتنيل المهم انه يفضل ملتزم ماديا وخلاص اهي عيشة والسلام بس انا كمان حصلي حالة من الفتور تجاهه غريبة لما بييجي مبقتش طايقة يقولي كلمة حلوة ولا حتي يلمسني .. الغربة وحشة يا استاذة نيفين بتربي الجفا انا نفسي مش عارفة هوة ازاي عايش كدة لواحده ؟ مستغرباه جدا اكنه اتسستم علي الغربة وعلي البعد عني مش عارفة اعمل ايه هل افضل ساكته ولا اقترح عليه ينزل بقي وكفاية غربة كدة ولا اتصرف ازاي .. انا حاسة ان حياتي بتخرب خلاص فضفضة محررة الصفحة .. نيفين حجازي اسفة اقول لك احساسك بجوزك جه متاخر وانتي اللي اقلمتي نفسك علي ان جوزك يتحول الي مكنة فلوس وانتي تحولتي الي حصالة الفلوس دي .. واذا هوة ساكت مش بيتكلم علشان يرجع بلده ولولاده تاني دة اكيد من الساقية اللي هوة بيدور فيها مش لاقيكي علي الاقل بتسالي فيه .. يا هانم .. اذا كانت الغربة بتربي الجفا زي ما بتقولي يبقي علي الاقل الزوجة تخلق بني ادم من اول وجدد لو كان في ضيقة .. انتي بتظلمي جوزك ونفسك واولادك بطريقة تفكيرك دي صدقيني .. حياتك كان ممكن تبقي للافضل لولا طريقة التفكير دي .. بعدين انتي بتعتبي علي جوزك ازاي وانتي مش فارق معاكي اصلا اذا كان اتجوز عليكي ولا لا ؟ انتي مخلتيش لدفاعه عن نفسه فرصه انتي حكمتي عليهواتصرفتي علي الاساس دة .. طيب بعتالي ليه ؟ يا هانم حرام عليكي .. خلي للعقل مطرح .. هوة جوزك دة مش بني ادم برضة وبيحس زيك بالظبط .. ليه ما فرضطيش انه ممكن يكون مضرور زيك تمام من الغربة ويمكن اكتر هوة اكيد اكتر لانه علي الاقل بعيد عن اولاده واهله والله اعلم الدنيا عامله فيه ايه بره .. شوية رحمه علشان خاطر ربنا حتي .. والجفا اللي بتتكلمي عليه دة هوه اللي من باب اولي يحكي عنه منك مش انتي اللي تشكي منه .. ارجوكي شوية تفكير الله يكرمك .. والله العظيم كدة كتير .. نراعي ربنا بس في بعض علشان ربنا يراعينا .. كل المطلوب منك انك تعيدي تفكير في طريقة معاملتك مع جوزك وتخليكي رحيمة بيه لانه بكل بساطة هوة اللي في غربة مش انتي .. بعدين هوة متغرب علشان مين ماهو علشانك في النهاية اكيد لو عليه هيقعد في بلده في وسط اهله معزز مكرم وهيقضيها اي حاجة .. بلاش الامور البسيطة تاخدك علي منطقة خطيرة وتخرب بيتك ارجوكي ... راجعي نفسك واحمد ربنا علي النعم اللي ربنا ادهالك ولما جوزك يرجع المرة الجاية ارجو انه يشوف زوجة من طراز ما شافهوش قبل كدة طراز يفتح نفسه علي الحياة من جديد واذا غربته تاعباكي يا ستي فاتحيه في انه يرجع اذا ينفع يقفل التزماته هناك .. ربنا يهديكي ويصلح حالك اللهم امين. للتواصل مع محررة الصفحة اضغط هنا
