ازيك أستاذة نيفين انا في ورطة ومش عارفة اعمل ايه .. من حوالي شهرين اتعرفت على راجل على النت وشاكة في ان جوزي عرف ، هوة ما صارحنيش بشكل مباشر لكن طول الوقت بيلمح بتلقيح كلام تقيل وأنا بصراحة علاقتي بجوزي مش تمام من زمان هوة على طول ساكت وعلاقتنا الخاصة واخده اجازة ومتصابين بخرس زوجي من فترة طويلة والراجل اللي اتعرفت عليه ده شخص بحسه مريح وشخصيته جامدة وبيسمعني كويس وأنا عندي هموم كتير مش عارفة افضفض بيها لحد ، المهم دلوقتي انا أتصرف أزاي ؟؟ ش. ب فضفضة محررة الصفحة .. نيفين حجازي يا أستاذة هوة علشان انتي وجوزك مصابين بخرس زوجي وعلاقتكم الخاصة بعافية وعندك هموم هل ده يديكي الحق في الخيانة ؟!.. وهل الخيانة بكل درجاتها شئ وارد أو عادي أو قابل للنقاش بحيث انها تنفع تحصل في ظروف معينة وظروف تانية ما تنفعش ؟! يا أستاذة .. لما سيادتك بتقولي عندك هموم كتير مش عارفة تفضفضي بيها لحد امال سيادتك باعتة الميل ده لمين ؟ يا أستاذة انا أسفة بخصوص لهجتي الحادة بس الأولى بالانشغال هو البحث في الأسباب اللي وصلتك مع جوزك للحالة دي ومحاولة استيعابها أو حلها أو إعادة صياغة حياتكم من جديد .. انا افهم يعني ايه إنسان تحت ضغوط معينة يبدأ يفقد صوابه لكن مش يفقده في اتجاه يورطه لكن يفقده بمعنى انه تعب من التفكير ومحتاج راحة علشان يبدأ في التفكير مرة تانية بشكل افضل وأوقع ، يا أستاذة لو انتي اللي في مكان جوزك كان رد فعلك هيبقى ايه ؟؟ مع ان المقارنة هنا برضه مفيهاش تساوي .. لكن افرضي .. كنتي هتجبيه من زمارة رقبته .. صح ؟ ده كويس والله ان جوزك بيلمح من بعيد والنبي ده راجل طيب ! يا أستاذة اخر كلام اقدر أقوله راعي ربنا شوية ولما تبقي حرة نفسك مش على ذمة راجل أيا كانت صفاته ابقي اعملي اللي انتي عايزاه الأصول بتقول كدة والشرع والعادات والمنطق على الأقل هتبقي شايلة ذنب نفسك لواحدك . [email protected]