جاسمين طه: لم ألجأ لأبي وحمايا حتى أعمل في مجال الإعلام

صرحت الإعلامية جاسمين طه زكي، خلال لقائها الليلة ببرنامج "معكم" مع "منى الشاذلي": إنها نشأت في عائلة سياسية، حيث كان والدها وزيرا للصناعة والثروة المعدنية، ووالد زوجها رئيس وزراء مصر الأسبق الدكتور عبد العزيز حجازي، وذكرت أنها درست الاقتصاد، وحصلت على درجة الماجيستير في الإدارة العامة من الجامعة الأمريكية.
وأضافت: "مجال دراستي كان بعيدا تماما عن الإعلام، ولكن دخولي الإعلام حتى مجاش عن طريق والدي ولا حمايا، كان مع بداية الفضائية المصرية وقتها، والله يرحمها الإعلامية سهير الإتربي، كانت مسئولة عن القناة، وكمان أستاذتي الكبيرة كمان منيرة كفافي كلموا والدتي، وقالوا لها: بنتك معندهاش استعداد تيجي وتبقى مراسلة، وأقنعوني، ووافقت على أساس إني مش هاطلع في الكاميرا، وبعدها بقيت مساعد مخرج، وبعدها اتجهت للتقديم".
وعن زواجها، أكدت: "اتجوزت بدري وأنا في الجامعة، وكانت عيلتي وعيلته بينهم علاقة صداقة، ومن هنا جه التعارف، وخلفت وأنا في الجامعة، وبعدها اشتغلت، ومحاولتش خالص أستغل منصب والدي أو حمايا، وبالعكس، بابا كان عايزني أبقى حاجة تانية، على أساس إني دارسة اقتصاد، وعرض عليه شغل في بنوك وكده، بس كنت برفض، وقلت له: هاجرب المجال ده، وبعدين بقى هو من أكبر النقاد ليه، ودايما كان يتفرج عليه، ويقول رأيه في شغلي".