بنت تقود وتعلم الفتيات قيادة الدراجة الهوائية

مشهد لا زال ملفت إنك تمشي وتلاقي بنت راكبه عجلة، خصوصا في بعض الأماكن. شيماء بنت صغيرة مش بس كانت بتحب تركب عجلة لكن قررت تخصص جزء من وقتها لتعليم البنات قيادة العجلة (الدراجة الهوائية) وبالمجان. قابلنا شيماء اللي اتكلمت عن تجربة قيادة العجلة في شوارع القاهرة.

صعوبات بتقابلك وانتِ راكبه عجله
عن الصعوبات اللي بتقابلها في رحلاتها في وسط مجموعة قالت: "إن التوك توك هو الخطر الأول لإنهم بيضايقونا واحنا ماشيين بالعجل ويكسروا علينا وممكن يتسببوا في كارثه وخصوصا إنهم عارفين إن مش هنقدر نعمل لهم حاجه، كمان اللي بيسوقوا التوكتوك بيكون سنهم صغير ومش مؤهلين ولا بيتعمل لهم اختبارات ولا رخص ولا ارقام".

صعوبات لإنك بنت
أضافت شيماء "أنا بتعرض كبنت لنفس المضايقات اللي ممكن يتعرض لها الرجال لدرجة إن مره شباب شدوني وقعوني من على العجله واتعورت، ده طبعا غير المعاكسات. ويزيد على المضايقات دي نظرة المجتمع يعني ممكن الاقي بنت تقول (ايه البنت المسترجله دي) وواحده بتبص لي بنظرة حقد، لكن بالرغم من كده ممكن أقابل بنت تقولي (برافو عليكي.. أنا نفسي أتعلم) أو (الله .. بصوا عجله). أحيانا بيتعاملوا معايا على إني أجنبيه وده بيزعلني، إيه المشكله إني بنت مصريه وبركب عجله. آه نظرة المجتمع اتغيرت شويه لكن مش بالكامل. وده بيخلي البنت تختار أماكن معينه تمشي فيها بالعجله زي المعادي، الزمالك.. لكن أنا بحب العجله وشايفاها اسلوب حياه وبحب اعمل بيها مشاويري فبروح أي مكان وبحط السماعات في وداني عشان افصل نفسي عن المضايقات اللي ممكن اسمعها". وأضافت شيماء إنها نفسها البنت تركب عجله براحتها وتمشي بيها في شوارع مصر براحتها.

ماما مش موافقه (كلمة السر الجواز)
شيماء حكت لنا إزاي اتخطت صعوبة موافقة الأهل في البيت علشان تشتري عجله. قالت شيماء إنها احتالت على مامتها بمعرفتها برغبة مامتها الشديده إنها تتجوز وقالت لها إن العجله ممكن تكون مجال جيد تتعرف فيه على شاب كويس ترتبط بيه. الحقيقه إن شيماء مش في دماغها الفكره دي خالص ودي كانت مجرد حيله علشان تحصل على العجله، وبالفعل نجحت شيماء واشترت العجله.

جروب العجله أهل واخوات وأعز اصحاب
شيماء إمام - مسئولة تدريب البنات في إحدى الأكاديميات - بدأت رحلتها مع العجله هاوية ونزلت في جروب بيعتبر أكبر تجمع لكل محبي العجل باختلاف مستوياتهم. شيماء قالت إن أعز اصحابها حاليا كان من جروب العجل واللي نزل معاها مره بالصدفه في ride وعلمها حاجات كتير عن العجله. كمان قالت إنها بتحس بالأمان جدا وهي في وسط جروب قائدي العجلة لدرجة انهم بينزلوا معاها في وقت تدريب البنات عشان يساعدوها في اصلاح العجله لو حصل فيها حاجه وكمان عشان يشكلوا لها وللبنات اللي معاها نوع من الحماية.

العجله بريئة من اتهام الامهات
موضوع بتروجه الأمهات في شكل خوف يوصل للرعب إن البنت خطر على عذريتها قيادة العجله. شيماء بتقول إن بنات كتير بتسألها السؤال ده على استحياء وانها بتطمنهم إن مافيش أي صله.

بنوته كان حلمها تحضر ايفنت واتعلمت في ايام
قالت شيماء "أول مره أعلنت عن تدريب مجاني للبنات اتقدموا 20 والمرة التانية اللي اتقدموا 40. اللي بهرتني بنت جت لي قبل إيفنت كبير لتجمع قائدي العجل في مصر بأيام وطلبت إني اعلمها لأن حلمها تشارك في الايفنت ده، وبذلت مجهود كبير وكنت سعيده بيها أوي وانا بشوف اصرارها على المحاولة وبالفعل اتعلمت. لكن ضيق الوقت اتسبب انها ما قدرتش توفر عجله لليوم ده واللي معروف إن بيشارك فيه الآلاف، وأُدام حلمها الجميل ده إديتها عجلتي تحضر بيها الايفنت وانا استلفت عجلة صديق. فرحة البنت دي كانت مش معقوله وحسيت اني عملت حاجه تسعدها، زود سعادتي"


في طريق المشير الجديد عدة كيلومترات مخصصه لقيادة العجلة.. خطوة جميلة في اتجاه تشجيع الناس على ركوب العجل. أعضاء أكاديمة عجلة نفسهم يشوفوا مصر زي هولندا كل الناس بتروح شغلها بالعجلة وتسوق العربيات في الحد الأدنى .. أد ايه ممكن ده يحسن من صحتنا لممارسة رياضة يومية وكمان نقلل من العادم اللي بيأذي جهازنا التنفسي وكمان نقلل الزحام والتوتر العصبي اللي بيصيبنا في الزحمه وتوتر السواقه.

العجلة سبب سعادة
قالت شيماء: "العجلة كانت سبب في كل حاجه حلوه تحصل في حياتي وضافت ليا كتير قوي ومن كتر تقديري ليها وللي غيرته و عملته في حياتي و قد ايه بقيت سعيده بسببها أصبح هدف من اهدافي اني اقدر اشوف الفرحه اللي بحسها في ركوبي العجل موجوده عند كل بنت غيري واكون سبب في ان بنات كتير تقدر تركب عجل"

رسالة للبنات: "إوعوا تتنازلوا عن أحلامكم"
بعد حادثه قويه اتعرضت لها شيماء واللي هتحتاج وقت طويل من العلاج بعتت رساله للبنات بتقول "اوعوا تتنازلوا عن احلامكو او تستسلموا لمجرد ان في صعوبات و عواقب او ان المجتمع مش قابل.. عافري ورا حلمك مره و اتنين والف لحد ماتوصلي حتي لو الكل قالك مش هاتقدري، ولو حتى بقيتي لوحدك.. اعملي اللي يفرحك ويسعدك ومتهتميش بكلام الناس لو عايزه تنجح في حياتك وتعيشي مبسوطه."