أمير طعيمة: مجدي يعقوب نموذج لما يجب أن يكون الشعب المصري

أعرب الشاعر الغنائي أمير طعيمة، عن سعادته بشخصية طبيب القلب الشهير مجدي يعقوب، حيث أكد من خلال حسابه الرسمي عبر موقع التواصل الاجتماعي فيسبوك، أن مجدي يعقوب نموذج لما يجب أن يكون عليه البشر عمومًا والشعب المصري خصوصًا، وأن الشعب المصري بطبعه يختلف على كل شيء، ولكن الله جعل لكل شخص هدف ولو كل شخص حقق الهدف الخاص به ستكون الدنيا جنة ليس بها حروب وصراعات وظلم وفشل.
فكتب قائلًا: "الشعب المصري اللي تقريبًا بيختلف مع بعضه في كل حاجة، دين، سياسة، رياضة، فن أجمع علي حب شخص واحد إسمه مجدي يعقوب، د. مجدي يعقوب ما سوقش نفسه للناس في الإعلام، ما سعاش لمناصب ولا خوت دماغنا ليل نهار بالوطنية وحب الوطن وإنجازاته، ما عملش حاجة غير إنه إشتغل بجد لخدمة البشرية ووطنه وعشان كده وصل لقلب كل واحد في العالم حتي اللي قلبه مش واجعه.
وأضاف قائلًا البروفيسور والسير "اللقب اللي منحته ليه ملكة إنجلترا" مجدي يعقوب ما عملش إعلان من سنين طويلة وقبل مؤسسة مجدي يعقوب في أسوان عمل مؤسسة لعلاج مرضي القلب في الدول النامية، لف الدول النامية كلها تقريبًا وأنقذ حياة آلاف المرضي بدون مقابل لغير القادرين وبدون دعاية، اللي ما يعرفوش البعض إن د. مجدي يعقوب بيطلع في الإعلانات ببوس الأيادي لأنه لا يحب الظهور وبيرضخ في الآخر لما بتتقاله جملة واحدة ظهورك هيزيد من التبرعات لمرضي القلب لأن الناس بتثق فيك.
وواصل اللي بيطلب من دكتور مجدي يعقوب يطلع في حوار يتكلم عن إنجازاته أو يشارك في إعلان بأجر أو حتي يرغي معاه بيقوله كلمة واحدة: الوقت اللي هضيعه ده ممكن أنقذ فيه قلب طفل.
وتابع، سامحوني لو بتكلم عليه كتير وربنا يعلم إني ما جاليش شرف إني أقابله ولو مرة واحدة في حياتي، بس أنا طول عمري بشوف إن الراجل ده نموذج لما يجب أن يكون عليه البشر عمومًا والشعب المصري خصوصًا، ربنا بيخلق كل واحد فينا لهدف ولو كل واحد فينا حقق الهدف ده هتبقي الدنيا جنة مش حروب وصراعات وظلم وفشل، ربنا يحفظك ويحميك ويخليك لكل قلب طفل محتاجلك يا ملك القلوب، إعمل اللي عليك واشتغل وإخلص في عملك هتدخل التاريخ من أوسع أبوابه من غير ما تسعي لكده.