أنا عايشه لوحدي

ساره بنت عندها حاجه وعشرين سنه وعايشه في شقة لوحدها .. لاء .. بقولك ايه عشان كده هنقلب علي إعلان صعبانيات ، مش ساره .. مفيش ساره خالص .. أنا عارفه إن الناس عندها 5٪ استعداد تتقبل فكرة مختلفه لو بتتقال من خلال حكايه عن ناس تانيه بعيده منعرفهاش، عشان كده كنت ناويه أخدعك عزيزي القاريء، بس لاء أنا نفسي مش جايباني أكدب، وبعدين عزيزي ايه بس، هو أنا أعرفك أصلا .. الخلاصه ..أنا اللي عايشه لوحدي ..
1-آجي أونسك؟
2-أوباا ليلتنا فل النهارده
3-قليلة الأدب فاجره
4-ازاااااااي احنا في مجتمع شرقي محافظ؟
4-أنتي الدور الكام بس متقوليش لمراتي
! 5-بتعرفي تعملي نسكافيه ؟
6-وأنا كمان .. وعلي فكرة، عيب يبقي أنا وأنتي نبقي عايشين لوحدنا وأطلب منك نتقابل في كافيه زي العيال الصغيرين
7-طب لابسه ايه دلوقتي ؟
8-ليه ؟ أهلك فين؟ عايشه ازاي؟ وليه؟ هاه؟ ليييه ؟ لييه؟ لييه؟
9-براڤو .. براڤو ياچوچو .. أنا تعجبني جدا البنت المتحرره المستنيره.. لاء بجد براڤو، أنتي فعلا مختلفة عن البنات اللي مالهاش رأي.. ومستقلة، بقولك ايه ؟ فاضيه النهارده أجيلك نتناقش في كتاب علم الأخلاق لسقراط؟
10-طب مش عايزه حاجه من السوبر ماركت " في حدود خمستاشر جنيه يعني" لو عوزتي حاجه قوليلي علطول أجيبهالك لحد عندك، أصل أنا جدع وخدوم قوي أحب أخدم الناس جدا
11-طب ولما يبقي عندك أربعين سنه هتعيشي ازاي .. هترجعي تندمي، أنتي لازم تتجوزي عشان تلاقي ناس جنبك وأنتي عجوزه
12-طب لو حد اتهجم عليكي هتعملي ايه
13-طب ولو جالك عريس أمه هتقول عليكي ايه؟
14- ياحلاوه ياولاد يعني أنتي يامفعوصه عايشه في بيت لوحدك وأنا والبنت بتاعتي مش لاقيين حته نتجوز فيها !
الحقيقه أنا متفاجئتش خالص بنواياكم الحسنه دي كلها، بالعكس ممكن أكون نسيت حبة حاجات كمان، ومش مستغربه إن 90٪ من الرجاله لما بيعرفوا إن بنت عايشة لوحدها بيبنوا طموحات وأحلام كلها حمرا وبمبي، لأنهم حافظين مش فاهمين، ومتخيلين إن البنت اللي عايشه لوحدها دي أصلا خدت القرار ده عشان تتفرغ للمتعه والسهر والصياعه، وقاعده طول النهار جنب الأباجورة الحمرا، بس اللي أنت متعرفوش إن البنت اللي بتقدر تعيش لوحدها في المجتمع ده أقوي منك بكتيير، أنت ممكن تكون كولد أصلا لسي عايش مع أهلك مهما كبرت في السن ومش قادر تاخد الخطوة اللي هي خدتها، ولا تعرف تعتمد علي نفسك زيها بدايه من أبسط الحاجات إنك تغسل معلقة، ولغاية أكبر وأهم حاجه إنك تستقل وتصرف علي نفسك، أنت لسي بتستأذن من باباك ومامتك عشان تنزل تخرج مع أصحابك بالليل وتتأخر معاهم شويه، ولما هتتجوز هتستأذن من مراتك اللي هتقلب بعد أول سنه جواز جهاز تتبع لخطواتك، يعني أنت ممكن تعيش وتموت ومتجربش إحساس الحريه في التصرف في وقتك حتي، عشان كده بتتخيل إن البنت اللي عايشه لوحدها بترجع كل يوم وش الصبح بقي ومقضياها سكر وعربده، أنت مش بتتخيل تصرفها هي في الواقع، أنت بتتخيل اللي أنت نفسك تعمله وأنت تحت ضغط الكبت، بس الحقيقه مش كده .. البنت اللي عايشه لوحدها ياشاطر بتبقي حاسه بمسئولية ناحية نفسها، وبتبقي فاهمه كويس جدا اللي ليها واللي عليها، وإن محدش هينفعها غير نفسها، وغالبا مبتبقاش فاضيه طول الوقت ومتفرغة زي صوره الأرملة الطروب اللي أنت راسمها، دي بتبقي بتشتغل عشان المم، وعشان طموحها، يعني وقتها وبيتها وكل حاجه تمتلكها تعبت فيها جدا، وعمرها ما هتمشي توزع فيهم بالساهل زي البنات اللي بتسرق التليفون من ورا أهلها وهما نايميين عشان تكلم صاحبها بفلوس أهلها، ولا زي البنت اللي بتروح تقابل وترجع تقولهم في البيت اتأخرت في الدرس !
مش أي بنت تقدر تعيش لوحدها، لأن الموضوع مش ترفيهي .. العيشه لوحدك مش إنك تعلي الأغاني وترقصي في البيت هيب هوب ملط، ولا إنك ترجعي في الوقت اللي أنت عايزاه وتلبسي الي أنتي عايزاه، ولا إنك تقلبي البيت كافيه وتعزمي أصحابك كل شويه، العيشه لوحدك مسئولية أكبر من كل الحاجات دي اللي بشكل تلقائي هتكون موجوده، بس بشكل تلقائي برده هتكتشفي إن تمنها من المسئولية غالي جدا، وده في حد ذاته هيخليكي تفكري ألف مره هتستخدميها ازاي.
العيشه لوحدك، عايزه نسبه كبيره من القوه والثقه، عشان تعرفي تحطي صوابعك في عيون عم عجايبي البواب اللي هيفضل طول الوقت مركز معاكي، وشايفك بنت مش كويسه، وده لا ينفع معاه منطق ولافلسفه ولا أي طريقه تفهميه بيها إن دي حريتك الشخصية وإنك كبرتي وبقيتي شحطة ومن حقك تستقلي بنفسك، وإن مش شرط الجنس يكون جزء من الاستقلال ده، ومرات عم عجايبي اللي هتغير علي عجايبي منك، وبنت عم عجايبي اللي هتبقي عايزه تشاركك حياتك وتطلع تنام معاكي ماهي الشقه أوضتين، ومن وجهة نظرها لازم يتملوا، وجيران الصيف اللطاف من الإخوه أصحاب الجنسيات الشقيقه اللي عم عجايبي بيقولهم إنك عايشه لوحدك فبيخبطوا عليكي عشان الجار للجار.
لازم تبقي قويه عشان كل المواقف اللي ممكن تمري بيها ولازم تبقي قدها، وترمي ورا ضهرك دلع البنات " المريء" لو النور قطع، ولو شفتي صرصار، ولو الكهربا ضربت، والسباكة باظت، ولو فلوسك خلصت، ولو جالك حمي فجأة ومش قادره تتحركي ولا حتي تتصلي بالإسعاف، ولو الملل جاب شنطته وبات معاكي، ولو جارك الرذل قضاها نحنه ورسم علي كبير، لازم تبقي أقوي من نظرة كل ست بتمصمص شفايفها وراكي، وكل ست خايفه علي جوزها منك، وكل بنت بتحقد عليكي لأنك حره، ولأنك مش زي بنات كتيير كل طموحها تتجوز، عشان تسيب بيت أهلها ويبقي عندها بيت لوحدها، واعتقد دي في حد ذاتها إجابه كافية للي بيسأل لو جالك عريس أمه هيبقي رأيها فيكي ايه!
البنت اللي زيي مبتتجوزش أطفال ولا أصحاب إعاقات فكرية، بتتجوز راجل مستقل، وعنده وعي، ولو ملقيتوش مبيفرقش معاها كتير. والونس والأمان، مش بالناس في ناس ممكن عيشتك معاهم تجيبلك جلطه مش تحسسك بالونس، والأمان ده واجب الدوله ناحية كل الناس، مش مفروض أبقي مضطره أعيش مع حد عشان أحمي نفسي إن حد يتهجم عليا، وبعدين حتي ده مش هيحميني علي فكره، لو عايشه مع خمسه وأتهجم علينا عشره بسلاح مش هتفرق كتير عن إني أكون لوحدي
وعموما إني أعيش لوحدي وأبقي معرضه لخطر أو احتمال ممكن ميحصلش في سرقة أو قتل أو اغتصاب أهون ميت مرة من إني أعيش مع راجل مبحبوش ويسرق جسمي ويغتصبني كل يوم، مقابل الأمان الوهمي والستر، والونس..
وبالمناسبه أحب أقول لصاحب السؤال اللولبي : ليه ليه ليييه ؟ ... وأنت مالك ؟! مش من حقك تبقي عارف كل حاجه عن كل الناس علي فكرة، وسواء كنت عايشه لوحدي بقراري أو بسبب ظروف قهريه أنت ملكش حق تعرف برده.
بس كل أصحاب الأحلام الورديه اللي فوق دي كوم وصاحب الحلم المخملي بتاع التحرر وتوحد الجسد وعلم الأخلاق ده كوم تاني خالص، مع إنه عمل نفسه مبصليش بصه من إياها زي الباقيين الوحشين اللي هو بيسمو بفكره وأخلاقه اسم الله عليه عنهم، بس الحقيقيه إن أغلب اللي بيبدأ كلامه بالطريقه دي بتبقي نيته سووووده
-الله ! هو أنتي لا عاجبك اللي باصص شمال ولا اللي باصص يمين، ولا اللي بيقولك أنتي صح ولا أنتي غلط لما يعرفوا إنك عايشه لوحدك!! -المفروض أصلا محدش يندهش ويستغرب ويبدأ كلامه وهو رافع حواجبه لما يعرف المعلومة دي، لأن المفروض إنها معلومه عاديه جداا ... أنا عايشه لوحدي .. مترفعش حواجبك..
ملحوظه هذه الإعترافات الوارده في المقال لا تمت للواقع بصله، وأنا عايشه مع ناس كتشيير كتشير صدقوني ...