هند فرحات تكتب: هو مفيش رقابة؟

حد يفهمنا (هو من النهارده مفيش رقابة أنا الرقابة).. وهذا ما طلبه السينمائيون الذين رفضوا (تشكيل لجنة حماية الإبداع) ورأوا فى ذلك تهديداً لمستقبل السينما، حد يفهمنا هو فين أصلا مستقبل السينما المصرية؟ مروراً بعبده موتة وحلاوة روح وقنبلة الموسم فيلم عيد الأضحى (وش السجون) ومتقلش إيه ادتنا السيما قول هندى إيه للسيما – ادينالها الإسفاف والابتذال (تحت شعار حرية الإبداع والفكر) مع تدنى الأخلاق وبجاحة العرى وانحطاط الألفاظ الخارجة والتلوث السمعى والبصرى،
حد يفهمنا هو التمسك بدستورنا (دستور يا أسيادنا) والتمسك (بمواد الحرية والإبداع) على هوانا (وأنا أقول الهوا ده جاى منين) مواد الدستور يا سادة إذا تمسكنا بها نتمسك بيها كاملاً (مش كله ولا حتة منه) ولا هى ساعة تروح وساعة تيجى التى تعجبنا من مواد الدستور نقول (آمين) واللى مش على هوانا نقول (فكك منه) باعتذر للقراء على استخدام ألفاظ سينما المستقبل (حرية الإبداع والرأى) ومثل بعض الكلمات المخجلة الفجة التى سمعناها فى فيلمنا المقبل باكورة إنتاج السينما المصرية 2014 وش سجون (الحبسة الخرة سببها مرة) و(أنا اتفشخت) هذا ما سمعناه قبل أن نرى الفيلم وأصابتنا حالة من الترجيع والإغماء مع ارتفاع الضغط والسكر والمرارة.. أمال لما نشوف الفيلم هنعمل إيه (شلل أطفال) ولا مافيش أطفال فى سينما المستقبل.. فيه بلطجية ومجرمين وقتلة وكأننا عايشين فى مجتمع مافيهوش نماذج تاريخية أو قصص بطولية أو قصص مستوحاة من شخصيات دينية وسطية أو شخصيات وطنية تحث على الانتماء للوطن أو شخصيات مصرية واقعية كافحت من أجل الشرف مع كل هذه الأحداث التى يمر بها بلدنا والأمة العربية، نعطى نماذج للسينما النظيفة (المبتذلة– الفجة) تحت شعار «هذا ما يطلبه الجمهور» أو «هذا هو الواقع» وإذا كان هذا هو الواقع فلنرتق به (واللا اللى عنده أهرامات زينا نقوله يا عمنا) كما قالها بطل فيلم وش سجون وأصبحت سينما المستقبل هى وش سجون مع انهيار أخلاق أجيال كاملة من الشباب وانحطاط فكرة الاحترام والأدب بين المجتمع والعائلات المصرية.
حد يفهمنا يا سيادة وزير الثقافة دكتور/ جابر عصفور، هل هذه الكلمات التى ذكرتها تحت شعار (حرية الفكر والإبداع)؟ وماذا عن أجيال سابقة من رواد السينما وجيل الوسط؟ هل كان هذا الإسفاف موجوداً وهم قدموا للسينما المصرية جواهر وكنوزاً لا تعد ولا تحصى، نرجو منك الرحمة وإعادة دراسة قرار الإلغاء (إلغاء اللجنة العليا للرقابة على المصنفات الفنية) لأن المشرحة (مش ناقصة قتلة) إلغاء إيه يا سيادة الوزير هيقدموا إيه بعد العرى والابتذال والأغانى الهابطة (ولا البحر بيحب الزيادة).
حد يفهمنا، ملايين الملايين التى صرفت فى دراما مسلسلات رمضان 2014 وكأنه مناسبة غير دينية مع انتشار مشاهد العرى بقمصان النوم على الأسرة مع حرية الإبداع والفكر تحت شعار رمضان 2014 (صحيح اللى اختشوا ماتوا) كانت فى صالح مين؟ اتقوا الله فى مصر وفى شبابها وأطفالها. حد يفهمنا يا أستاذ باسم سمرة بعد أن تألقت فى صديق العمر الذى من المفروض أن تنال عليه جائزة، ماذا حدث حتى تتورط فى مثل هذه الأعمال الهابطة؟
حد يفهمنا من الجانى فى تدهور الدراما التليفزيونية والسينما المصرية، إذا عرفت الحل فاتصل 747150 إذاعة، كلنا فاكرين أشهر البرامج الإذاعية بس لو عرفنا الحل أو عرفنا الجانى هنتصل بمين ومين هيرد علينا ويكافئنا؟
ابعتولى تعليقاتكم لو فيه حد مش فاهم حاجة وعايز يفهمها وإحنا معاه لأن أكيد فيه حاجات كتير قوى، محتاجين لحد يفهمنا يا أسيادنا.
المقال نقلا عن المصري اليوم