"بعد الهجوم عليه" .. هاني عادل يدافع عن "الحظر يا بيبي"

تسبب الهجوم الذى تعرضت له أغنية الحظر يا بيبي للمطرب هاني عادل ، فى قيامه بالدفاع عنها ضد كل من انتقدها ، بسبب جرأة فكرتها والبعض اعتبرها تتحدث عن شئ غير واقعي .
وتبريرا لفكرة الأغنية قال هاني عادل عبر صفحته الشخصية على الفيس بوك : إن الفنان مرايا لمجتمع هو عايش فيه الكلام اللي بيسمعه ، الأحداث اليومية ، مواقف سواء من ناس قريبين منه أو بيشوفه على الفيسبوك أو على القهوة حتى هما بيقولو إيه وبيفكروا ازاي ... كل كلام الغنوة اللي انتو متضايقين منه دة بيتقال كل يوم مش من كل الناس .... لأ بيتقال من مجموعة عايشين بطريقة مختلفة خالص عننا كلنا .... مش بنحكم عليهم لأن نية كل واحد ربنا اللي يعلمها.... ولكن بنعرضها بالطريقة اللي بنعرف نعبر بها .... وأنا بعرف أعمل مزيكا وبغني ذي ما وليد عبد المنعم اللي كتب بيعبر بالكتابة .....
وأكد هاني عادل على احترامه لكل من انتقد اغنيته بالايجاب او السلب ، معتبرا الفن اذواق ، قائلا : مش معنى اني بغني بالطريقة دي أو بقول الكلام دة ان دي طريقة حياتي أو إن دي احتياجاتي الشخصية من الحياه ..... الهجوم على كلمات أو طريقه أداء الغنوة ذي بالظبط لما كانو الناس زمان بتصدق إن محمود المليجي شرير طول الوقت ف حياته العادية بناءً علي أدواره اللي شافوها .... ودي أحكام مش صح.... الغنوة إتغنت بطريقة تمثيليه لأداء دور وصوت الشاب أو الناس اللي بتتكلم كدة
وتابع : أنا عارف إن الوقت والظروف اللي احنا فيها كلها صعبة علينا كلنا وبيخلينا كلنا عندنا إستعداد للهجوم على أي فكره أو عمل أو تصرف جديد علينا وبقى عندنا كلنا بعض من الحرية للنقد لكن اتمنى بس إن الأسلوب يكون متحضر ومايكونش نقد شخصي لأي حد إنت متعرفوش شخصياً ..... وراعي إن اللي بيحاول يقدملك أي عمل فني جديد بيتعب فيه بجد وبيحاول يقدملك فكرة جديدة حتى لو كانت أغنية مهرجان ... لازم يا جماعة ندي فرصة للافكار الجديدة علشان منعش كلنا ف زمان الإستمبة ذي زمان .... وشكراً لوعيكم .
الأغنية كلمات وليد عبد المنعم ، الحان وغناء هاني عادل .