قاضى وجلاد وسيب وانا اسيب!!

عندما بدأت الثورة لم يكن أحد منا يعلم ماذا سيحدث فى المستقبل وكان الهدف الرئيسى القضاء على الفساد الذى انتشر فى العقد الاخير من حكم النظام السابق ولم يكن فى الحسبان ان يصل بنا الحال الى ما وصلنا نحنو اليه الان فقد اصبح مصر بأكملها ما بين قاضي وجلاد ورئيس كل واحد فينا عنده حالة من اليقين الوهمي إنه مالك الحقيقه الوحيد والأكثر إيماناً ووطنيه كل واحد فينا بيصدر احكامه وعاوز بحده يفرضها علي الأخريين دخل علي قاموسنا الفاظ جديده بالبلدى كده بقت لبانه كل واحد بيقولها علي التاني فلول عماله أچنده مأجور خاين كافر وصولي اسلامى مسيحى
مصلحجي اخوانى سلفى مخبر بلطجي قسمنا نفسنا نعم ولا تحرير وعباسيه وروكسي ومصطفي محمود سنه ونص حوارات وادعاء ثوره داخل كل بيت. خلافات بين إخوات قرايب وجيران وعائلات اصدقاء أصبحوا اعداء والعكس خلافات وصراعات وبرامج حواريه ممتلئه بالتراشق والإتهامات كله بيتهم بعضه كله بيهدد بإنه حايكشف المستور ويطلع مستندات. ويجيب الديب من ديله فضايح وأقنعه وفين مصر من الصراع ده فين المصريين الغلابه من الصراع ده يصدقوا مين والكل خاين يختاروا مين والكل مشوه يفهموا إيه والكل مُضلِل يعيشوا إزاي والكل غاضب يسمعوا إزاي والكل بيصرخ!! توهان وإدمان
للعبه دوخيني يا ليمونه طب لإمتي كده ؟؟وللاسف بدل مانبني بنهد بدل مانسمح معلقين مشانق للكل بدل مانقوم ونتقدم خطوه للأمام بنتراجع سنين. جرفنا الأرض وطلع علينا اقبح مافيها ومافيش اتنين متفقين وعود كدابه وسنابل قمح مافيهاش غير شوك وسيب وانا اسيب .. والحل بدل ما كان هدفنا واحد دلوقتى بقي فيه هدف لكل واحد ناسيين ان مافيش مكسب لحد وخساره لحد المكسب مصر والخساره مصر ولو راحت مصر كلنا مسلم ومسيحي ليبرالي ويساري ويميني وإخواني وسلفي غني وفقير وست وراجل وطفل عامل وفلاح وفنان ودكتور ومهندس وظابط ورياضى مش هيساوى الواحد مننا أي حاجه من غير
مصر .نفسي نفوق بقي ونصالح انفسنا ونواجه ضميرنا ونحسبها لمصر مش علي مصر فهل من مجيب؟؟؟؟؟