-أنا الدكتور ظاظا رمضان عبدالنبى السيد بخيت عز العرب بهنس طربوش -كل ده! مافيش تانى؟ عموما، أهلا بيك يادكتور ظاظا. بس لو سمحت توطى التليفزيون علشان نسمع بعض كويس
- وطى التليفزيون يابت! ماشى كده، ولا نرميه على دماغ حد فى الشارع ونستريح منهم هم الاثنين؟
-مالوش لزوم. هههههههههه! نقدر نعرف حضرتك دكتور فى إيه بالضبط؟
-أنا -بالصلاة على النبي- دكتور فى الهندسة عقبال أولادك!
-أنهى فرع فى الهندسة يادكتور ظاظا؟
-فى الهندسة عموما، مش فيه طبيب عام؟ أنا بقى مهندس عام.
-مهندس عموما -عقبال أولادى- إزاى؟هههههههههه! بتبنى عمارات وتطلع من الأرض بترول وتصلح بوابير الجاز وتعمل حديد وصلب ومكن جيلاتى وتكاتك؟ يا ترى إيه رأى حضرتك فى اللى بيحصل دلوقت فى مصر؟
-أحلفلك بإيه ياشيخة! إنشالله يطسنى أوتوبيس: أنا مش إخوان، ولا لى أى علاقة بيهم.
-صادق يادكتور ظاظا. هههههههه! صادق من غير حلفان.
-لاهم ولا حزب الوسط ومصر القوية والنور والأصالة وحازمون، ولا أى حاجة من دى خالص. لكن الشهادة لله: اللى حصل ده انقلاب عسكرى ضد الشرعية.
-مافيش 33 مليون مواطن طلعوا يوم 30 يونيو يهتفوا: لا جماعات ولا إخوان! لا متاجرة بالأديان! يسقط يسقط حكم المرشد! ماشفتهمش سيادتك؟
-إنتى عديتهم؟ دول كلهم على بعد مايجوش 15 ألف فلول على بلطجية وشوية عيال ليبراليين وشيوعيين وعلمانيين بنكلة من تمرد، بياخدوا فلوس من الصليبيين واليهود والعياذ بالله، واضح جدا إنها معمولة فوتوشوب بمعرفة خالد يوسف الزنديق، بتاع حين ميسرة وتيتو وكلمنى شكرا والريس عمر حرب ودكان شحاتة وكل الأفلام الإباحية دى.
-ياه! دانت شفت كل أفلامه أهه!
-بياخد فلوس ياما من كل حتة علشان يفسد شبابنا الطاهر المستقيم.
-تقصد من قطر يادكتور ظاظا؟ ههههههههه! إشمعنى قطر يعنى اللى مابياخدوش منها؟ههههههههه!
-أنا زى ماقلت لك مش إخوان، ولا تبع أى حد، لكن النفر منا لازم يعترف بالحق: الإخوان دول أشرف ناس حكموا مصر من أيام سيدنا عكروت لحد النهارده، القذارة اللى كانت ماليا الشوارع، مش حاقول لك الدكتور مرسى محاها من الوجود، بس خلاص كان فاضل حبة صغيرين، ولا إحنا زى القطط بناكل وننكر؟ الزبالة اللى أنتى كنتى بتشوفيها فى الشوارع دى بيجيبها أعداء الإسلام علشان يفتروا على الرئيس الشرعى، ربنا يفك سجنه! ما خدتيش بالك كان مهاب قد إيه؟ رئيس مالى هدومه بجد، لا مهزأ جوه وبره، ولا الزعماء الأجانب بيتمقلسوا عليه، زى ما الانقلابيين بيقولوا، الدبان والقمل والبراغيت كانت قربت تختفى خالص، لولا الانقلاب.
-يعنى حضرتك ههههههههه! باختصار مش شايف أى حاجة من الخراب المستعجل اللى جره مرسى على البلد أيام الإخوان اللى إنت مش منهم؟
-طبعا شايف. هو فيه حتة فى الدنيا مافيهاش مشاكل؟
-الحمد لله. طب إيه هى المشاكل اللى كانت فى مصر أيام الإخوان اللى حضرتك ماتعرفهومش خالص؟
-الإعلام المنحرف والقضاء الفاسد والفلوس والكام صباع اللى جايين يلعبوا فى مصر وشيخ الأزهر والصليبيين والمكتبات اللى بتبيع أفكار شيطانية من الغرب، اللى مابتجيش منه حاجة تسر القلب، إنتى بالذات طول عمرك فلة كبيرة أوى.
-لأ. أنا إعلام منحرف، هههههههه! ياترى إيه رأى ضيفتنا الدكتورة لينا راتب فى كلام الدكتور ظاظا؟
-بالظبط زى خطبة عبدالفتاح القصرى قدام المحكمة فى فيلم الأستاذة فاطمة، بس القصرى كان دمه خفيف.