خضوع الرجل .. في اربع معانٍ

أستاذة نيفين عايزة مشورتك بسرعة جداً جداً والنبي
انا كنت من فترة في مشاكل كتير مع جوزي وبقالي مدة بزن على الطلاق بشكل هيستيري إحنا بقالنا سنة ونص متجوزين بس .. ومن يومين بطلب الطلاق راح قال لي حااااااااضر حطلقك بس هديلك يومين بس تراجعي نفسك لكن بعدهم ان طلقتك هتكون بلا راجعة حتى لو وقفتي على راسك وعملتي قرد ، بصراحة انا خفت من تهديده وحسيت أني بحبه لكن كرامتي واجعاني بعد اليومين أقول له أني عايزاه ومش عارفة اعمل إيه ارجوكي ردي علية بسرعة وشكرا

فضفضة
محررة الصفحة .. نيفين حجازي
يا أستاذة إيه شغل الأطفال ده ؟ أسفة في الرد بس مستقبل الناس والحياة الزوجية والبيوت مش عرضة لدلع ستات فاضية .. معلش اسمحيلي انتي اكيد كنتي متدلعة جداً في بيت والدك .. وزوج حضرتك كتر خيره انه رد الرد ده بس و ما حدفكيش بفازة مثلا ! ، يا أستاذة .. ارجعي لجوزك انا متأكدة ان المشاكل اللي بينكم سببها انتي مش هوة .. بدليل اللي بتقوليه .. الحياة الزوجية ودور الزوجة أمور تدار بالرحمة والحكمة والذكاء والأنوثة .. دوري عن كل دول موجودين فين جواكي وروحي لجوزك بيهم هتضمني حياة ممتازة مدى الحياة .. ربنا يهديكي ويصلح حالك .. ولو سمحتي ابقي ابعتيلي رسالة قوليلي عملتي إيه في الراجل الغلبان جوزك كان الله في العون .
[email protected]