مطلقة ومزة !

السلام عليكم ورحمة الله وبركاته ،
المشكلة دي مش خاصة بية لكنها خاصة بواحدة جارتي هية ست كبيرة في اول الخمسينات تقريبا وعلاقتي بيها متوسطة لأني في سن أصغر بكتير .. الست دي عايشة لواحدها ومالهاش أولاد اتجوزت اكتر من مرة لكن هية مطلقة ولواحدها دلوقتي .. كذا مرة أبقى على باب البيت وتسمع صوت المفتاح فتفتح تسلم علية وتضايفني بقهوة ونرغي شوية وخلاص لكن قلقي بدا من ساعة ما عرفت منها من باب الدردشة أنها على علاقة بشاب في اخر التلاتينات وأنها مش عارفة تقنعه أزاي يتجوزها علشان كلام الناس وبتاخد رأيي في الحل وطبعا انا أصلا معنديش ليها حل وشايفة أنها عايشة الوهم لكن اتكسفت أقول لها كدة لانها واخدة بالها من نفسها جداً ووزنها مزة الصراحة ههههه فقلت لوالدتي الموضوع ووالدتي حذرتني منها وقالتلي الست دي انا بشك فيها أساسا ومش عايزاكي تختلطي بيها نهائي وان شكلها كدة بتجر رجلك لحاجة مش كويسة وما تشربيش عند حد أي حاجة تاني بصراحة انا سمعت كلام أمي طبعا لكن صعبانة علية الست دي تفضل ماشية في طريق غلط ووهم كبير وفي نفس الوقت قلت أخد فيها ثواب .. ايه رأيكم افادكم الله .
ع . ا . م
Fadfada@elfagr.com