معقول يطلع ندل ؟

السلام عليكم ورحمته
من فترة كنت على علاقة حب بشاب وكنا متفقين على الجواز .. والحمد لله مكنتش فيه بينا أي مشاكل لكن فجأة وبدون مقدمات اختفى من حياتي تماما لا بيرد على تلفون ولا رسالة ولا حتى عبرني بعد ما بعت له واحد صاحبه يشوف هوة فين .. صاحبه نفسه قال لي انه مش بيرد عليه برضه ولما أخيرا رد كلمه بسرعة جداً ومفهمش من مكالمته حاجة .. من الواضح كدة انه بيتهرب مني ومن كل الناس اللي ممكن يكونوا همزة وصل لكن السؤال هنا ليه ده كله واحنا متفقين على كل حاجة ومحصلش نهائي اللي يخليه حتى يستندل وأنا كمان كنت حريصة على سلوكي معاه وملتزمة يعني مقدرة أقول خد اللي هوة عايزه ومشي !! .. بصراحة انا مخي عمال يودي ويجيب ما بين القلق عليه وما بين انه يطلع ندل بس حتى لو هوة ندل هل ممكن حد يختفي من حياة حد فجأة وبالسهولة دي ؟! طيب لو هوة رجع في كلامه ومش عايز نرتبط مجاش يصارحني ليه ؟! مبقتش فاهمة الصراحة واختفاءه ده بقاله اربع شهور دخت عليه حتى في شغله رحت وسالت قالولي انه قدم استقالة من فترة ومانعرفش عنه حاجة .. ده كمان حاجة غريبة .. والمشكلة التانية انه كان حريص على انه يديني الإحساس انه بيقول لي كل حاجة لكن انا ما اتنبهتش غير دلوقتي انه معرفنيش على حد من أهله ولا اعرف ساكن فين .. دلوقتي انا مش عارفة اعمل ايه هل أنسى الموضوع خالص مع ان ده صعب شوية ولا استنى واسأل اكتر يمكن اقدر اعرف طريقه ؟
ياريت لو حد من السادة الأصدقاء يشور علية من فضلكم وشكرا
م. ا
[email protected]