راجل شرك

السلام عليكم
من غير ما أطول في رسالتي ،، من حوالي سنتين اقترحت على ابنة عمتي أننا نتجوز راجل واحد على أساس حاجتين الأولى ان انا وهية ما مريناش بعلاقة حب ولا قالبلنا حد يشد .. والحاجة التانية ان الزواج دلوقتي علشان بقى مكلف مبقاش حد يقبل على الزواج أصلا وفي نفس الوقت انا وهية أصحاب جداً قبل ما نبقى قرايب ومحتاجين يكون لنا بيت وحياة ، لكن لما اقترحت على قريبتي الموضوع ده حطيت شرط للجواز وهوة ان الراجل الشرك ده يكون ميسور الحال ويقبل بكل طلباتنا مقابل انه هيتجوز اتنين مرة واحدة وأصحاب كمان يعني مش هيعاني من مشاكل ولا يتجوز زوجة تانية في السر ونشتغل عادي ونكمل حياتنا بشكل طبيعي ، واتفقت معاها انه طالما مفيش واحدة فينا حبت الشخص المراد يبقى ما نخسرش بعض تحت أي ظروف ونمشي على مثل انا واخويا على ابن عمي .. قريبتي انسجمت اوي من الفكرة ووافقت وكلمنا اصحابنا اللي غاويين يوفقوا راسين في الحلال واستغربوا جداً وفيه منهم اعترض على المبدأ لكن في النهاية واحدة فيهم اتحمست بسبب ان كان ليها قريب ما سبقش له الزواج وسنه كبر لانه كمان كان بيسافر كتير بحكم شغله المهم .. صاحبتنا اتكلمت معاه وفرجته .. صورنا هوة في الأول افتكرها بتهزر واكتشف ان الفكرة مجنونة من كلامها على طريقة تفكيرنا في الموضوع والظاهر لما عجبته الصور قاللك وليه لا ما هي فرصة وخصوصا أننا هنسكن كلنا في بيت واحد مع مراعاة خصوصية كل واحدة فينا للتانية .. المهم .. طبعا في الأول وبعد ما العريس وافق واتكلمنا في اجتماع ثلاثي واجهنا مشكلة كبيرة مع الأهل وهي الرفض التام .. بصراحة ليهم حق برضه ماهي فكرتنا مجنونة وصعب أي حد يقبل بيها بس والله إحنا شايفين أنها فكرة ممتازة بالنسبة لأحوال الناس وفي الوقت نفسه ادينا هنبقى عارفين الزوجة اللي هتشاركنا لان في كل الأحوال الرجالة بتتجوز تاني وتالت ومن غير علم حد !! عموما إحنا لغاية دلوقتي عمالين انا وقريبتي نحاول مع اهالينا وهمة مش موافقين فلو حد من القراء يقترح علينا حيلة نقنعهم بيها يبقى خير لكن لو حد معترض وفاكرني بهزر ولا بضيع وقت ياريت يكون كويس ومايعلقش بتعليق مالوش لازمة ولا شتيمة علشان انا واخدة بالي من حكاية كل واحد ما يعجبهوش مشكلة أو رأي يشتم حاجة مش محترمة بصراحة .. عموما أسفة اني طولت بس الحكاية طويلة لوحدها وبشكرك أستاذة نيفين على مجهودك معانا .
ميرنا
Fadfada@elfagr.org