زوجة .. في تعدد الزوجات فوائد إجتماعية ونفسية

مساء الخير .. قبل اي كلام .. أنا لا سلفية ولا إخوان انا مسلمة لكن متوسطة في أمور ديني حسب فهمي له وربنا اللي هيحاسب في الآخر .. ومش ده موضوعنا . أبدأ الحكاية ..
انا متجوزة من 10 سنين يعني قديمة جدا واكتشفت مع تراكم الخبرات ورؤيتي للمشكلات الخاصة بالزواج في بدايته وما بعد الزواج كمان ان فعلا الراجل له طباع ثابته لايمكن تغييرها مهما فرضت الست فرامانات , مش هدخل في تفاصيل ثوابت الرجالة , لأن الغرض من عرض الموضوع طرح فكرة ربما مش خاطرة على بال الستات والبنات وهية الآتي :
الست اللي بتفكر تغير طبع راجل أو تغيير ملامح سلوكه أو طريقته في ارسال واستقبال الأمور دي ست عايشة في وهم لإن لو ده سهل تحقيقه أو حتى في منطق في فرضه كان من باب أولى غيرت الست من نفسها على كيف الراجل وهيبقى الوضع في الحالة دي أسهل ولا ايه ؟ .. تاني حاجة موضوع تعدد الزوجات اللي أجازه الدين الإسلامي .. انا شايفة انه صحيح تقيل على قلب الستات بدليل انه يجب مشورة الزوجة قبل الزواج بغيرها إما تقبل أو ترفض .. لكن الموضوع محتاج إعادة نظر بجدية .. كل عيلة دلوقتي بتمر بحالة من التجمد فيما يخص بناتها الكل بيشتكي من تأخير سن الجواز مع انه في رأيي بفضل الزواج في سن مرتفع فكل ما الخبرة الحياتية زادت كل ما كانت البنت متريثة في إدارة الحياة .. ما علينا خلينا في موضوعنا , انا شخصيا بدأت بنفسي برغم من ثقل الفكرة على القلب زي ما قلت في الأول لكن لما فكرت في ان جوزي ممكن يتجوز واحدة غيري ولا لأ لقيت إن انا مستفيدة معاه من ناحية مهم وجودها بين اي زوجين وهية المسافات الثابتة بين الزوجين اللي بتساعد على عملية تجديد اللهفة وحاجات تانية كتير مهمة وده مش بيحتاجه الراجل بس ده الست كمان .. مفيش ست هتحس بالكلام ده ولا قيمته إلا إذا كانت مخضرمة في سنوات الجواز زيي .. يمكن الستات تتهمني بالجنون أو بوجود خلافات بيني وبين جوزي بس لا والله انا وجوزي حياتنا مستقرة تماما وبرغم كدة دخلت معاه في مناقشة وقلتله انا بفكر في ايه طبعا الأول استغرب وقال الولية اتجننت لكن كان هدفي من البداية وهو نفس السبب اللي خلاني افكر في ده اني انفرد بفكرة اخدم بيها بلدي والأسر المصرية مش دايما خدمة الوطن تكون على هيئة نضال في الميدان ولا رفع سلاح أمام عدو لكن ممكن تكون عن طريق أفكار تشبه اللي انا بقترحه انهاردة .. وعلى فكرة الموضوع ده هيخلصنا من مشاكل نفسية كمان كتير.
لكل البنات والستات المتجوزين ليه رافضين مبدأ المشاركة في رجل .. ده انت المستفيدة صدقيني على الأقل هتضمني جوزك طول الوقت ظريف وخفيف .. الراجل لطبعه بيحب يحس بالحرية وانك مش كابسة على نفسه وانا شايفة ان مفيش فكرة أجرأ من دي هتوفرله الإحساس ده ومن ناحية تانية ولو انها فيها شر شوية .. قبولك هيسمحلك تطلبي وتتشرطي عليه براحتك عشان خلاص عملتي اكتر من اللي عليكي وسبتيه يتمتع بحريته بالشكل اللي شايفه منسب ده غير ان تصرفك ده هيخليه ينحاز ليكي اكتر وحوة يلبس بعدين في الآية الكريمة ( إن خفتم ألا تعدلوا ) إحنا بقى ملناش دعوة بالحسبة الإلاهية دي خلينا نبسط وننبسط .. خليكي ذكية .. إسعديه .. يهنيكي .. ريحيه .. يديلك عنيه الإتنين .. في رأيي ان اللي قلته ده سر إختفاء مشاكل كتير من بيوتنا وراحة بال ما حسيناش بيها قبل كدة .. يا جماعة الحرية لا توهب بل من المفترض اننا خلقنا بها لذلك لما أنزل الله عز وجل كل الأديان على رسله أنزلها ولم يجبر عليها أحدا بل على العكس كل نبي عرض دينه على أمته واللي دخل فيه خير وبركه واللي عمل العكس بنتعامل معاه عادي والحساب عند الله في الآخر .. إذن .. لما يكون رب الكون أتاح الحرية الكاملة في أهم ما خلقنا لأجله .. ألا من الأولى أن نعيش بنفس درجة الحرية والتي خلق الله الجميع عليها ؟! .. لقد أبلغت رسالتي وأرجو ان تكون وصلت ببساطة وارجو من النساء والبنات التفكير بالأمر لربما يعود عليهن بالخير .. آه على فكرة انا بلغت جوزي لو عايز يتجوز يتجوز بس هوة الصراحة رفض وقال انه مكتفي بية وانا كمان مريحاه على قد ماقدر وهوة عمره ما قصر معايا ربنا يباركلنا في معيشتنا ويغنينا بالله عن الجميع .
فافي
فضفضة
صديقتي الجميلة فافي .. ليس لدي جرأتك على عرض موضوع كهذا لكن كل ما أعدك به هو التفكير بجدية على المستوى الشخصي وإن إقتنعت سأبلغك بالتأكيد .. والآن سنترك للنساء والبنات والرجال فرصة لإبداء آرائهم لربما نجد لديهم مزيد من الأفكار أو الإقتراحات خاصة وان هذا الموضوع شائك بطبيعته .
نيفين حجازي