ستر عورة

السلام عليكم ورحمة الله
انا باعتة نداء ورجاء وللجميع الأجر عند الله
من كام يوم كنت سايقة العربية رايحة مشوار ومع الزحام المعتاد وقفت شوية , وفجأة عيني لمحت سيدة في منتصف العمر فاقدة الأهلية مجنونة .. لابسة بنطلون وجاكيت مفتوح خفيف وكانت عمالة ترتب شوية كراتين وزبالة عشان تنام عليهم وبمجرد ما التفتت هذه السيدة إكتشفت ان الجاكيت على اللحم ولا يستر عورتها شئ .. مش عارفة أقولكم انا حسيت بايه ساعتها اقسم بالله كما لو اني انا العارية تماما فكرت بجدية اركن واديها الجاكيت بتاعي لكنه للأسف مقاس صغير بالنسبة لحجم السيدة وفي نفس الوقت مش هيقوم بالغرض لكن على الفور فكرت في تأجيل مشواري وذهبت الى محل عادي جدا وقمت بشراء تي شيرت يناسب مقاسها بالتقدير الإفتراضي وذهبت به الى السيدة وأعنتها على ارتداءه .. لكني لم اشعر بالراحة بعد , واستمريت في الدعاء لها أن يسترها وان يغض الله بقدرته عيون الناس عنها , انا بكتب الرسالة دي وانا في حالة سيئة جدا وهتفضل سيئة , لكن بقترح حاجة على كل الموجودين على فضفضة .. هوة ان كل حد فينا قبل ما ينزل من بيته ياخد معاه حاجة من هدومه اللي مش محتاجها او اللي كان ناوي يتبرع بيها لحد غلبان .. انا شايفة ان الحالات دي وما أكثرها في إحتياج بدرجة أكبر من المحتاج العادي واقصد المحتاج الذي حفظ الله له عقله , اللهم عافنا وارحمنا اللهم استر عوراتنا اللهم اعنا على فعل الخير .. امانة عليكم جميعا ان لا تردي لي هذا الرجاء فكل شئ لوجه الله الكريم