فراش الزوجية .. مجرد محطة

السلام عليكم ورحمة الله وبركاته
انا زوجة من اربع سنوات ومشكلتي غير معظم مشاكل الزوجات لأنها باختصار إني مش بلحق أشوف جوزي أو حتى اتكلم معاه في مشاكل الأولاد على الأقل , شغله واخد معظم وقته والباقي من الوقت بيقسمه مابين أصحابه وسهراته الحمراء وده طبعا مش كلام تخمين انما بعد ما ولاد الحلال فتنوا عليه وواجهته لكن بدون فايدة كالعادة , عايزة اقول كمان ان حتى علاقتنا الخاصة هوة مش مهتم بيها لأني الظاهر كدة انا بالنسبة له كائن موجود للضروريات أو في حالة عدم توفر واحدة من البلاوي اللي يعرفهم , وطبعا تحولت العلاقة بيننا الى خراب مستعجل لا هوة ناوي يبقى بني آدم ولا انا طايقة أكمل والعيال إتدبست فيهم لأن بعد الطلاق وكعادة الرجالة هيرميهملي وأقعد أدلل على مين يصرف عليهم والقصص اللي الكل عارفها وحافظها وبالتأكيد هوة هيعمل كدة لأنه من البداية ولحد الأن هوة معندوش إحساس بمسئولية عياله خالص ولا بيسأل أصلا ان كانوا بخير ولا صايبهم أذى .. عادي جدا أكنه ملوش بيت عايش اكنه عازب , من الآخر انا اتكلمت معاه كتير ومع والدته ومع اصحابه المقربين والله العظيم مافي فايدة وانا دلوقتي مش عارفة اعمل ايه , لكن الحاجة الوحيدة اللي مطمناني اني كنت وارثة من والدي مبلغ كويس بيطلعلي في الشهر حاجة اقدر بيها اسد بعض الإختياجات لكن مقدرش اصرف منها على مدارس ومتطلبات اولاد كاملة ودة خلاني افكر في انفصال لكن مش عارفة هقدر اسد ولا لأ .. كل اللي انا محتجاله دلوقتي مشورة يمكن ماتكنش خطرت في بالي , انا متابعة كل المشاكل اللي على فضفضة ومتابعة ردود القراء وبصراحة بلاقي فيها ردود معقولة ما عدا طبعا الناس اللي بتشتم مش فاهمة ليه .. عموما أنا متشكرة على مجهودكم واتمنى القراء يفيدوني بنصيحتهم .
أ . م