طول ما إنتي بعيدة وما فيش استجابة هيبعد وينسى

أنا بنت عندي 18 سنة، الموضوع ابتدى من سنة ونص لما عزّلنا.. في البداية كان بيعمل أي حاجة علشان يلفت نظري.. هو أكبر مني بأربع سنين، وكان معايا في نفس الكلية قبل ما يتخرج.
أنا أعجبت بيه جداً، إحنا كنا بنتكلم على إننا جيران؛ بس يعني كل كام أسبوع مرة مش أكتر، وفي البيت عندي كانوا عارفين؛ بس أنا كنت حاسة بحاجة غير كده.
الموضوع فضل يتطور، هو طلب رقمي أو إننا نتكلم على النت، وأنا رفضت طبعاً لأني ما ينفعش أعمل كده، وبعدين أبتدي يلمح لي إنه معجب بيّ، طبعاً كنت طايرة من الفرحة؛ بس ما بيّنتش لحد ما في يوم لقيته جايب لي هدية اتدبست واضطريت أقبلها لأني ما كنتش عارفة أتصرف.
وبعدها عرفت عنه حاجات كتيير بايخة، وإنه كان بيتسلى بيّ لأنه في نفس الوقت راح قال لواحدة تانية على إنه بيحبها.
أنا اكتأبت من يومها واتخنقت أوي، وقررت أشيله من دماغي، وده كان من 3 شهور.. والحمد لله، قرّبت أوي من ربنا، وركّزت أكتر في مذاكرتي، وحفظ القرآن.
المشكلة إن أنا مرعوبة لا يقول لحد أو يعمل لي مشكلة، أنا ما بقيتش باثق في حد.. أنا مش عارفة لو عرفوا عندي في البيت هيعملوا إيه.. أنا والله مش عارفة أنام كل ما أفكر في كده.. أنا تقريباً مش باكلم حد دلوقتي وأعصابي تعبت أوي.. خايفة يعمل لي مشاكل ومش عارفة أعمل إيه.
أنا آسفة إني طوّلت أوي عليكم؛ بس دي أول مرة أحكي لحد.. وميرسي أوي إنكم سمعتوني.
p


لو عايز تفضفض لنا دووس هنا