محمد بغدادى يكتب : شكل رئيسنا الجاى

بعد ما شفنا الظلم فى مصر
ضرورى نكون واعيين...
نعرف مين يستاهل فعلا
يحكم مصريين ....
إحنا نحط شروطنا
واللى تناسبه يكون كسبان..
يحكم مصر لفترة
وممكن يحكم فترة كمان..
****
عايزين اللى هيحكمنا
يكون راجل.. ماتكنش مدام
تيجى فى مرة وتحبل
وتأجز سنتين ادام...
حمل وخلفه وشيل ورضاعة
وأما تعود هتكون يا جماعة
نص دماغها يا دوب شغالة
ونص فى أمتى الواد هينام...
كل شوية مكالمة تجيلها
ان الداده طالع عينها
وان الواد بيهد فى حيلها
قال بيعيط وبيشكلها
وعايز ماما تجيله اوام...
******
ولا تحب رئيس المانيا
أو مسئول فى امستر دام
إحنا رئيسنا ضرورى يكون
راجل واعى ومش مجنون
ميكنش عميل ولا رد سجون
وان مرة هيتحول فرعون
يرحل من غير اى كلام...
*****
شرط وحتمى فى اى رئيس
يبقى اتشعبط فى الاتوبيس
لا يكون فرفور ولا عيل سيس
ولا حتى جاسوس ضمن الجواسيس
ويكون على مصر امين وامام...
يبقى مجرب حر الصيف
ميكنش مركب كام تكييف
يبقى شريف جدا ونضيف
عمره مادخل جيبه حرام....
*****
ما يكنش لئيم ووراه الغاز
ويحزر من تصدير الغاز
ويوفر انابيب البوتجاز
ويخلى بلدنا تعيش فى سلام....
*****
لازم يكون مصرى الابويين
ميكنش بجنسية بلدين
ويحس ألام المصريين
ولبلده وشعبه يكون خدام...
شرط يكون مالمدنيين
والسن يكون تحت الستين
يا سلام لو كان خمسه وتلاتين
هيكون له دماغ مختلفه تمام...
******
مش عايزين روؤساء كراكيب
أطقم أسنانهم تركيب
حتى نفسهم بالأنابيب
والبعض مصاب بزهايمر تام...
******
أحنا بلدنا أمانه فى ايدنا
لو نرعاها المولى يزدنا
لازم برضوا نكيد حسادنا
ونطلع ببلدنا لادام...
بعد ما شفنا الظلم سنين
وخلصنا من الفاسدين
لازم نعرف مين يستاهل
يحكم مصريين....