فى مصر نهاية عصر

الأن فى مصر نهاية عصر احنا خلاص فى نهاية عصر علشان كده تلاقوا مصر قمة فى الفوضى الحكومة سايبة الدنيا تضرب تقلب و سايبة الشعب يعيش كلا على طريقتة عايز تضرب مخدرات اهلا وسهلا تحب تبقى بلطجى ويلكم نفسك تنحرف اوى اوى لكن تتكلم عن الاصلاح عن التغيير عن تدوال السلطة فلا يا بابا لا لا والف لا لحد كدة و استوب عيب عليك بقى احنا سايبينك على حل شعرك فى كل حاجة فوضى فى الشارع وتنبلة فى الشغل سايبينك تعمل دماغ وتعيش ده كله ليه علشان تروق تكبر دماغك و تغيبها و فعلا البعض بقى فى غيبوبة وده المطلوب يبقى كدة من وجهة نظر النظام كله تمام لحد ما حصلت حاجة غريبة اوى متفهموش فى ايه الناس بعد ما اتغيبت و اتبهدلت واتمرمطت والفساد زاد و بلدنا مبقتش بتاعتنا بقت بتاعة على بابا والاربعين حرامى و احنا الشعب مش اكتر من فواعلية فى العزبة وكنا راضيين وساكتين كالعادة هنعمل ايه عايزين نربى العيال وخايفين اوى لا يحطوا السيخ المحمى فى صرصور ودانا فجأة كده صحينا و افتكرنا مستقبل مصر ومسقبلنا اللى كنا بنحاول ننساه بداومة الحياة او بقصة وانا يعنى هعرف اعمل حاجة وبدأنا نفكر فى ان الدستور فى بلدنا بقى عمولة و تفصيل على مقاس فرد واحد ورغم ان مواد الدستور المضايقنا ديه متفصلة من 2005
الا اننا بدأنا من سنة نحس انها كارثة ومصيبة سودة وجت على دماغنا واننا سكتنا لحد ما هتخرب رسمى و لو فضل الحال على ما هو عليه مش هيبقى فى مستقبل وطن هيبقى فيه اطلال وطن وبعدها المح البرادعى بانه ممكن يترشح للرئاسة فاخدنا نفس عميق و قلنا ايه ده ده ممكن يكون فيه بدائل ما هو مش ممكن مصر تتورث كده عينى عينك واحنا قاعدين نتفرج وبعدين هيحصل ايه اكتر من الحاصل الناس الخايفة على ولادها بتموت ولادها يا من فشل كلوى نتيجة مياه ملوثة يا سرطان نتيجة غذاء مزروع على اسمده ومبيدات مسرطنة يا فيروس سى يا جاموسة تعدى والواد فى القطر يعنى هيموتوا هيموتوا بس لما يموتوا موتة طبيعية غير لما يموتوا بسبب سكوتنا على الفساد و بعدين هي بلدهم هما واحنا لاء وبدأنا نفكر ان ممكن يكون فى مستقبل وبدانا نقول كده دكاكينى احنا عايزين اصلاح وتغيير والبرادعى يقول اصلاح وتعديل و الحكومة تخبط فى الحلل و تقول مفيش تعديل و مفيش اصلاح اكتر من كده و حسينا ان تخبيطهم فى الحلل مالوش غير معنى واحد انهم قلقوا من كلامنا الدكاكينى عن مستقبل مصر مصر التى خاطرى وفى دمى مش مصر العزبة يعنى من الاخر ان شاء الله هيكون فيه مستقبل وكفاية خوف وسكوت لان بلدنا تستاهل احس من كده ولو جمال عايز يحكم يسأل كده بيقولوا هيعمروا المريخ ياخدله كام فدان هناك ويحكم براحتة لكن هنا ما يحكمش لاننا خلاص عايزيين مستقبل حقيقى وهنبنى مستقبل و مش هنرضى تانى نعيش على اطلال ويلا قوم يا مصرى مصر دايما بتناديك احلفك بالغالى تقوم قبل ما يفوت الميعاد ونبقى بعاد