سعدو السبعاوي يكتب : صرخة عتاب لشعب مصر

عايزين ايه يا مصريين
تبهدلوها ؟!
منتو فعلا بتلعنو فاطس ابوها
تفضحوها .. تجرسوها
تغسلوها .. تنشروها ؟!
منتو على عينك يا تاجر عريتوها
تخربوها ؟!
هو بعد الاقتصاد والامن
وعلومها وتاريخها ، في خراب ؟!
دنتو حتى ذكرياتها بتحرقوها
تقسموها ؟!
والله فكره
ياللا بينا عالميدان
النهارده قبل بكره
وقطعوها .. وفرتكوها
اووزعوها بالتراضي
مولد بأه وصاحبه غايب
والّي يطلع منه فاضي
هو كرسي في الكلوب
ليه ياعم ؟!
اصلهم شربو وخلو الميه عكره
قسموها ..
واسم مصر يبقى ذكرى
قسموها ..
حتة لمرقص وحته لحسين
ويمكن كمان حته لكوهين
ماهي يعني مش قلة اراضي
وان ماكنش عيان بيان
يبقى ُكتّيمي وتغاضي
قسموها ..
حته صعيدي وحته بحيري
وحته لكفايه ونهاية
وهي ايه اصل الحكايه
والعسكري ؟! ..
مش ايده فيها مالبدايه !
قسموها ..
بس لو حبيتو تاني توحدوها
ولا الف دستور وانتخاب
ولا حكم مية قاضي وقاضي
يرجعوها ..
بعد ما انتو تضيعوها
وتبقى مصر فعل ماضي
قسموها ..
واوعو تنسو الحته الّي هي
للعيال الثورجيه
طب والفلول ؟! ..
مش هم من شعبك يامصر
ولاّ هكسوس ومغول !!
قسموها ..
بس وانتو بتدبحوها
بصو في دمعة عينيها
واسمعوها ..
من غير قواله وبصمت الجلاله
بتصرخ فوقو بأه
هم عايزيني اقول
ان السكات عالقهر عاده
والاكاده ..
من غير مبارك والعصابه
فروعي تاهت عن الاصول
وانه غير العوده للطغيان
مفيش بدائل او حلول
يعني السفاره تبقى في كل عماره
او شمسي تغرب
ونوري ينطفي
وجاهي يزول
طب مش حقول
واسألو كل الغزاة والطامعين
الي على مر السنين
سادوا وبادوا وفضلت انا
ام العرب والمسلمين
ان كنت يوم قلتها
او حتى حلمو يسمعوها

عايزين ايه يا مصريين
تكسروها !!
دي مصر .. مش للكسر
دي القاهره
ولا القدر ولا الزمن
ولا طيش وغفلة يقهروها
ولا انتو يا اولادها في يوم
هانت عليكم
ولا انتو عند الجد
ما تبيعوش الدنيا ذاتها وتشتروها
ولا احنا ممكن ننسى خيرها
دي الكبيره والحبيبه
عشقها جوه قلوبنا
زي ما انتو بتعشقوها