محصلش ومضربتش حد.. نص أقوال إمام عاشور في "خناقة المول" قبل محاكمته|مستندات

ساعات قليلة وتنظر محكمة جنح الشيخ زايد أولى جلسات محاكمة إمام عاشور لاعب النادي الأهلي ومنتخب مصر في اتهامه بضرب فرد أمن في مول أركان بسبب معاكسة زوجته.


اسمك وسنك وعنوانك

وينشر "صدى البلد" أقوال إمام عاشور أمام النيابة العامة خلال مواجهته بالاتهام المنسوب اليه بضرب مشرف أمن بمول بالشيخ زايد والتسبب في فقدانه الوعي، وتضمنت نصوص التحقيقات الأقوال التالية:

اسمي امام عاشور متولي عبد الغني
السن 26
أعمل : لاعب كرة قدم بالنادي الأهلي

س: ما قولك فيما هو منسوب اليك من انك متهم بالتعدي عمداً بالضرب علي المجني عليه عبدالله مصطفي بأن أحدثت به الإصابات الموصوفة بالتقرير الطبي والتي أعجزته عن أشغاله مدة تقل عن عشرين يوماً علي النحو المبين بالتحقيقات؟
ج محصلش

مراتي اتعاكست

س ما تفصيلات ما حدث وما هي ظروف تقابلك مع المجني عليه عبدالله مصطفي؟
ج اللي حصل انا كنت في الرحاب في التجمع الخامس مع صاحبي محمود وجالي تليفون من مراتي بتقولي ان فيه شباب عاكسوها وعايزاني اكلم معاذ اخوها اهديه علشان ميعملش مشكلة وساعتها انا كلمت عمر اخو مراتي الكبير وقولتله قول لمعاذ يهدي ميعملش حاجة ولما تطلعوا من السينما في اركان بلغوا مشرفين الامن باللي حصل ويتحفظوا عليهم لحد ما أجي ونعمل محضر ولما وصلت لقيت مراتي قعدة في العربية اخدت معاذ اخوها الصغير ودخلت معاه أركان ومشرفين الامن حاولوا يوقفوني ويقولولي استني استني فانا دخلت وجم ورايا علشان معاذ قالي انهم متحفظين عليهم في الباركنج اللي تحت ولما نزلت تحت ملقتش حد وكان فيه زحمة لان الناس اتلمت لما شافوني وانا كنت بقول هما فين هما فين وبزعق وساعتها مشرفين الامن قالولي انت بتزعق ليه انتم المفروض متحفظين علي شباب عاكسوا مراتي هما فين طبعا محدش رد عليا وكذا واحد من مشرفين الامن طلعوا تليفوناتهم وانا بتكلم وبيصوروني وقولتلهم انتم بتصوروني ليه وحصل ازدحام في اللحظة دي وانا مشتبكتش مع حد فيهم وبدور وشي لقيت عبدالله واقع علي الأرض ومشوفتش عبدالله غير وهو واقع علي الأرض وأول ما شفته واقع علي الأرض انا جريت عليه ولما وقع علي الأرض انا قلعته الجزمة وبحاول افوقه وفاق بعدها علطول وقولت للناس بعد اذنكم يا جماعة وسعوا علشان الراجل اللي وقع ياخد نفسه ولما قام وفاق قعد يقولي انه عنده اسرة واولاد وعايزك تساعدني والموضوع انتهي واخدت بعضي ومشيت والراجل اللي وقع اللي اسمه عبدالله بقي كويس واخدت مراتي واهلي وكانوا مستنيين بره مول أركان وروحنا واتفاجئت لما روحت ان فيه خرابيش في ايدي من الزحمة والزق ومراتي قالتلي انت ساكت ليه متعمل قضية قولتلها انا مش عايز اؤذي حد.


إمام عاشور في القفص بعد 70 يوم تحقيقات في خناقة المول| القصة الكاملة
17 يوم تحقيقات.. كيف جمعت النيابة خيوط أزمة إمام عاشور في «خناقة المول»؟

وصلت المول 6 صباحا

س: متي تلقيت الاتصال الهاتفي من زوجتك؟
ج هي كلمتني حوالي الساعة 4 صباحاً 2024/6/19

س: وما الذي قصصته عليك حينها؟
ج هي قالتلي ان فيه شباب عاكسوها في أركان وان معاذ اخوها عايز يعمل مشكلة وعايزاني اكلمه علشان أهديه

س: أنبأتك بمجريات ما حدث من وقائع قبلها ؟
ج: لا هي مراتي مقالتليش اللي حصل بالضبط ان حد عاكسها بس معاذ قالي ان فيه واحد كان لابس جلابية
محكوليش لونها ايه بالضبط

س: وكيف جري التعرض لزوجتك تحديداً ؟
ج انا معرفش هما بس قالولي ان فيه حد عاكسها وانا حضرت علشان اعرف فيه ايه

س صف لنا المتعرضين للمجني عليها زوجتك ؟
ج معاذ قالي انهم مجموعة شباب واحد منهم لابس جلابية

س وكيف قابلت ما قصته عليك من وقائع؟
ج انا كلمت عمر اخوها الكبير وقولتله يبلغ مشرفين الامن يتحفظوا على الشباب دي وانا جي

س: ومتي وصلت تحديداً لمجمع مقاهي أركان بلازا؟
ج حوالي الساعة 6 صباحاً بتاريخ 2024/6/19

س ومن كان برفقتك حينها؟
كان معايا صاحبي محمود

س وبمن تقابلت فور وصولك؟
ج انا تقابلت مع مراتي ومعاذ وعمر اخواتها ومرات عمر وشقيقة مرات عمر علشان اعمل محضر

س وما الذي أتيته حال وصولك؟
ج انا قابلت معاذ واخدت معاذ معايا ومحمود راح لمراتي يطمن عليها ونزلت الجراج اللي معاذ قالي انهم متحفظين على الشباب فيه

كان فيه جمهور ماشي ورايا

س وما الذي أبصرته فور وصولك لأماكن انتظار السيارات؟
ج انا لقيت زحمة كتير من الجمهور كانوا ماشيين ورايا ساعة ما دخلت اركان وكنت بسأل علي الشباب ان المفروض الامن متحفظ عليهم وملقتهومش فسألت بتوع الامن

س وما الحوار الذي دار بينك وبين مشرفين الامن حينها؟
ج انا كنت بقول هما فين فقالولي اهدي انت بتعلي صوتك ليه قولتلهم انتم عايزني اهدي ازاي ومراتي اتعاكست

س وما هي ردة فعل مشرفي الامن المتواجدين بمحل إنتظار السيارات؟
ج كان في مشرفين أمن كتير وجمهور كتير وانا شفت حوالي أربعة بيصوروا كلهم لابسين لبس اليونيفورم بتاع مول اركان وانا بلف لقيت حد منهم بيصور قولتله متصورنيش وكان ماشي ورايا بالكاميرا قولتله متصورنيش وحصل تزاحم وعبدالله مشرف الامن وقع علي الأرض لوحده محدش لمسه.


مفاجأة في تحريات الأمن عن تعرض زوجة إمام عاشور للتحرش بمول الشيخ زايد
قرار عاجل من النيابة في التح.رش ب زوجة إمام عاشور


ملمستش المجني عليه ووقع لوحده

س: ما هي ظروف تقابلك مع المجني عليه عبد الله مصطفى؟
ج انا شفت عبد الله مشرف الامن كان مطلع تليفون وكان بيصور قولتله متصورنيش

س وما مدي وجود تلاحم وتدافع بينكما؟
ج انا ملمستوش خالص ومحصلش بيني وبينه أي حاجة غير ان انا كنت بقوله متصورنيش

س وكيف قوبل طلبك من المجني عليه بطلبك بإيقاف التصوير؟
ج هو كمل تصوير وبعد كده حصل ازدحام

س وكيف قابلت انت اعراضك عن طلب رفضك للتصوير ؟
ج: انا معملتش حاجة انا لقيت الناس بدأت تتزاحم وتتدافع وساعتها عبد الله وقع

س إبان واقعة سقوط عبدالله مصطفي صلاح مدبولي ما هي وجهتك والمسافة التي كانت تفصل بينك وبينه؟
ج هو كان ورايا وكان بيني وبينه حوالي متر ونصف تقريباً وانا اتفاجئت بي بيوقع

س: حال وجودك وعقب سقوط المجني عليه أدركت أي تعدي عليه ضرباً حينها؟
ج لأ انا مشوفتش أي حد ضربه وعبدالله مشرف الامن وقع علي الأرض لوحده محدش لمسه

محصلش وكنت بساعده وأفوقه

س ثبت بأقوال مشرف أمن بمول أركان بلازا بتحقيقات النيابة العامة بذات ما شهد به سابقيه وأضاف انه مسئول التدخل السريع حال أداءه لعلمه أبصر مجموعة من الأشخاص رفقتك متوجهين صوب الجراج ويتبعكم باقي مشرفي الأمن وتعلوا أصواتكم بالسباب وما أن دلفتم للجراح أسفل المول أبصرك تقوم بدفع المجنى عليه أرضاً فسقط مغشياً عليه وتوالت تسديد الضربات فور طرحه أرضاً؟
ج محصلش

س ثبت بأقوال مشرف أمن بمول أركان بلازا بتحقيقات النيابة العامة أنه حال مباشرة عمله بالبوابة الأمامية للمول أبصرك وآخرين مهرولين داخل المول فحاول استيقافكم لسؤالكم عن سبب مجيئكم دون ساعات العمل المحددة وبسؤالك تعددت عليه سباً متلفظاً "أنتم شركة أمن ..... انا مراتي اتعاكست" وتتبعهم مشرف الأمن ومن رفقته حتى تعديتم على المجني عليه بذات الكيفية على النحو الوارد بشهادة سابقيه؟
ج محصلش
س ثبت بأقوال مشرف أمن بمول أركان بلازا بتحقيقات النيابة العامة أنه إبان فترة عمله بالجراج المخصص للمول تبلغ له بإشارة لاسلكية بوجود مجموعة من الأشخاص دلفوا للمول متوجهين إليه فاستقبلهم على الدرج محاولاً فحص أمرهم فلم يتوقف أحدهم حتى تعدوا على المجني عليه بالجراج محدثين اصاباته؟
ج محصلش

ملحوظة: حيث قمنا بعرض المقطع الأول علي الماثل وشرعنا في استجوابه بالاتي فأجاب
س من أطراف ذلك المشهد؟
ج انا ومعاذ وعمر ومشرفين الأمن وجمهور ناس معرفش حد فيهم

س صف لنا ذلك المشهد؟
ج كنت انا ماشي قدام انا ومعاذ وبعد كده لقيت عبدالله بيصور علي الموبايل فقولتله متصورنيش وحصل ازدحام


5 آلاف جنيه كفالة.. إمام عاشور في القفص غدا بسبب "خناقة المول"|ماذا حدث؟
5 أكتوبر محاكمة إمام عاشور بتهمة ضرب فرد أمن مول الشيخ زايد

كنت بحاول أمنعه من التصوير

س ثبت بالمقطع المرئي المعروض عليك إمساكك وجذبك للمجني عليه عبدالله مصطفي من ملابسه حتي أفلت من قبضتك خلاف ما ذكرته بصدر التحقيقات بعدم وجود أي تلاحم بينكما؟
ج: انا كنت بحاول امسك كاميرا الموبايل علشان امنعه من التصوير وساعتها هو مشي ومحصلش حاجة

ملحوظة: حيث قمنا بعرض المقطع الأول علي الماثل وشرعنا في استجوابه بالاتي فأجاب
س من أطراف ذلك المشهد؟
ج انا ومعاذ وعمر ومشرفين الامن وجمهور ناس معرفش حد فيهم
س صف لنا ذلك المشهد؟
ج: ايوه هو ده المشهد كان في تزاحم وانا مزقتش عبدالله وهو وقع من الزحمة وانا جريت عليه لما وقع علشان اساعده لكني انا مزقتوش وانا مكنتش واقف قريب منه واللي كان حواليه زمايله من مشرفين الامن وانا اللي جيت بعد ما وقع علشان اساعده

س: وماذا عن وجود علاقة أو خلافات فيما بينك وبين أطراف الواقعة؟
ج لأ

لديك سوابق؟

س هل لديك سوابق جنائية؟
لأ

س: أنت متهم بالتعدي عمداً بالضرب علي المجني عليه عبدالله مصطفي بأن أحدثت به الإصابات الموصوفة بالتقرير الطبي والتي أعجزته عن أشغاله مدة تقل عن عشرين يوماً على النحو المبين بالتحقيقات؟
ج محصلش

س هل لديك أقوال أخرى؟
ج: لا.

و أقفل المحضر عقب إثبات ما تقدم و قررنا الآتي
أولاً: يخلى سبيل المتهم إمام عاشور متولي إذا سدد ضماناً مالي مقداره خمسة آلاف جنيهاً وإلا يحبس أربعة أيام
98a1d360-5044-450d-abf5-f2505013c1c3 Screenshot 2024-10-04 054027 Screenshot 2024-10-04 054623