بسبب جدي وعمي.. اعترافات حفيد المرشد حسن الهضيبي: أنا مش إخواني

يستكمل موقع صدى البلد نشر نص اعترافات المتهم محمد إسماعيل حسن الهضيبي، حفيد حسن الهضيبي مرشد جماعة الإخوان في الخمسينات، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا، والمتهمة فيها أيضا عائشة خيرت الشاطر نجلة القيادي خيرت الشاطر.
وأدلى المتهم محمد إسماعيل حسن الهضيبي 44 سنة، طبيب أسنان حر بإعترافات تفصيلية أمام جهات التحقيق، والذي ينشر موقع صدى البلد الجزء الثالث منها تفاصيل إنضمام المتهم محمد إسماعيل الهضيبي لصفحة الهدف على الفيسبوك.
من نص التحقيقات.. حفيد حسن الهضيبي يكشف علاقته ب حزب الحرية والعدالة
من نص الاعترافات.. حفيد المرشد حسن الهضيبي يتبرأ من الإخوان: مش مقتنع ب شغلهم السري
وقال المتهم محمد إسماعيل الهضيبي، في عام 2014 إتعرفت على واحد إسمه إبراهيم عطا كان بيشتغل مدرس معرفش في أنهي مدرسة وكنت حاسس أنه عضو في الجماعة، وده كان إنطباع كونته عنه لانه كان بيقول ديما "جزاكم الله خيرا"، ومش فاكر ايه تاني كونت عنه الانطباع ده وكنت اتعرفت عليه وقت وجودي في النقابة من خلال أحد الأطباء وبعدها بعتلي طلب إضافة على الفيسبوك وأنا قبلته عشان الأصدقاء المشتركين بينا.
حفيد حسن الهضيبي يكشف تفاصيل صفحة الهدف
وتابع حفيد حسن الهضيبي، إبراهيم ضافني على صفحة على الفيسبوك إسمها الهدف ومكنتش أعرف إيه علاقة الصفحة دي بجماعة الإخوان، لكن كان هدفها مساعدة المحتاجين ونشر أخبار عن البلاد والأحكام القضائية، ومكنتش بهتم باللي بيتم نشره في الصفحة دي، ومكنتش بشارك في اللي بيتنشر وكنت بخرج منها الاقي حد يدخلني تاني.
وأضاف حفيد المرشد حسن الهضيبي، فاكر بوست كان فيه طلب تبرعات لحالات إنسانية، وقبل عيد الأضحى سنة 2017 كان إبراهيم عطا بعتلي رسالة بيقولي إذا كنت أنا هضحي فوافقت وساعتها قبل العيد عدى عليا في العيادة وأديته مبلغ مش فاكر كام بالظبط مش ثقة فيه لكن كنت عايز أشيل الموضوع من دماغي، ونيتي وأنا بديله الفلوس أنه هيضحى بيها لكن معرفش فعلا تفاصيل اللي حصل أو أشترى أيه.
واستكمل حفيد حسن الهضيبي، قبل عيد الأضحى 2018 أديته فلوس حوالي 30 ألف جنية تقريبا ومعرفتش تفاصيل اللي حصل بعدها، لاني بردو محضرتش معاه الأضحية، وفي مرة تالتة أخد مني تقريبا 20 ألف جنية، عشان كنت عايز أتصدق لأنه كان في شك أن زوجتي مريضة سرطان، وأديته الفلوس يوزعها وبعدها أتقبض عليا في شهر نوفمبر.
وأختتم حفيد حسن الهضيبي قائلا "محصلش أني إنضميت لأي جماعة، ومعظم الناس فاكرة إني في جماعة الإخوان بسبب جدي حسن الهضيبي وعمي مأمون الهضيبي علشان كل واحد فيهم كان مرشد الجماعة العام في فترة من الفترات".