محمد الصاوي : دخولي مجال التمثيل كان صدفة

قال الفنان محمد الصاوي ، إن دخوله في الفن كان بالصدفة من خلال الجامعة ، معقباً : " كنت في كلية تجارة ، وحبيت اشوف بيعملوا ايه في مسرح الجامعة ، ورحت بالفعل ولاقيت المخرج بيعمل بروفات لمسرحية " .
وأضاف " الصاوي " خلال لقائه مع برنامج " هذا الصباح " المُذاع على فضائية " إكسترا نيوز " ، قائلاً : " كنت قاعد بتفرج من بعيد ، والمخرج ندهلي وقالي تعالي اقعد معانا ، قولتله لأ أنا مليش في التمثيل ، واتحايل عليا ، وطلعت معاهم ، وبعدها اختفيت أسبوع".
وتابع الفنان : " الأسبوع ده قعد يدور عليا فيه ، لحد ما في يوم لقاني في الكافيتريا ، قالي انت بتعمل ايه هنا! ، المفروض تكمل معانا البروفات ، قولتله والله ما ليا في التمثيل ، قالي انت مالك خليها على الله " .
وأكمل " الصاوي " : " المسرحية اتعرضت بعد اسبوعين ، ولقيت نفسي اتشهرت في الجامعة جداً ، والضحك اللي كان على وشوش الناس بسببي بسطني جداً " .
واستطرد : "مقولتش لأهلي إني بمثل ولا جبت لهم سيرة خالص في أول رواية لحد ما بدأت اتشهر واتعرف في الجامعة ، عشان هيقولولي التعليم أهم والبكالوريوس ".. " وتاني رواية كان العرض التاني للمسرحية وكانت على مستوى منتخب الجامعة ، وحصلت على ممثل أول جامعات ، ودعيت فيها أهلي وعرفوا " .
وأشار ، إلى أن الأستاذ "جلال الشرقاوي" ، كان ضمن لجنة التحكيم في هذا العرض ، معقباً : "هو اللي قالي قدم في معهد الفنون المسرحية ، وكنت أنا لسة بدرس في 3 كلية تجارة ، وقالي لو نجحت كان بها ، منجحتش يبقى انت خضت التجربة وخلاص " .
وتابع : " سمعت كلامه وروحت قدمت ، وكانت المفاجأة الكبرى إني نجحت واتقبلت في المعهد ، وبقيت بدرس سنة أولى في المعهد ، وسنة ثالثة في كلية تجارة في نفس الوقت " ، مضيفاً أن كانت البداية من هنا.