عمرو على يكتب : تحقيق لم يحدث مع باسم يوسف

- كل ما سيرد الان لم يحدث ولن يحدث واي تشابه بينه وبين الواقع مجرد خيال علمي وتشابه اسماء وتوارد خواطر وأضغاث أحلام -
المحقق / اسمك
باسم / باسم يوسف
المحقق / نوعك
باسم " ساخرا " / كلك نظر
المحقق / جاوب على السؤال
باسم / دكررررررررررررررر
المحقق / انت متهم بإنك تستغل وظيفتك كمقدم برامج لترويج اعمال واقوال تزدرء الاديان وتدعوا للكفر والالحاد وبتخرج الناس من دينها - ماردك ؟
باسم / اعترف بالامر ولا انكره
المحقق " مذهولا " / بتعترف يا باسم ؟
باسم / أكيد معاليك ، انا بخرج الناس عن دينهم اللي بيحاولوا اصحابنا يروجوه مش عن الاسلام الصحيح ياريس ، نفسي فعلا الناس تبقى مسلمين بجد - الدين الحقيقي اللي ربنا رضيه لنا ونزل بيه الرسول الكريم ، مش السلوكيات الخاطئة اللي المستشيخين عايزين يخلوا الناس تعمله فيخلوا الاسلام كلمة مش فعل ، يعني يسرقوا ويخونوا ويكذبوا ويقتلوا ويطلعوا يقولوا مسلمين - ابسولوتلي نو - فلو كانت الاتهامات اني هطلعهم من السلوكيات دية للاسلام الحق يبقى اعترف بالتهمة .
المحقق / ده ردك على الاتهام الاول ؟
باسم / لا سعادتك ، انا بس كنت بقرأ لك ما قاله الامام محمد عبده القرن اللي فات لما جه من اوروبا وسأله العامة ساخرين اخبار الفسق والفجور في بلاد بره ايه يا شيخنا فقال لهم / لقد وجدت هناك اسلام بلا مسلمين ووجدت هنا مسلمين بلا اسلام (عليك واحد ) .
المحقق / يتم استدعاء الشيخ محمد عبده للتحقيق معه بتهمة إزدراء الأديان .
- لحظة صمت تعقبها تداخلات من السيدة إنشراح -
المحقق / أنت متهم بتكدير السلم الاجتماعي وإهانة رئيس الدولة - ما ردك ؟
باسم / أنا عملت 18 حلقة وماجبتش سيرة المهندس خيرت الشاطر الا مرتين تلاته وبكل الخير .
المحقق " مقاطعا " / انا اتكلم عن الدكتور محمد مرسي .
باسم / سوري ، مش سعادتك قلت رئيس الجمهورية
المحقق / انت بتلف وتدور ليه ، هل انت اهنت منصب الرئاسة بترويج اشاعات واستخدام الفاظ مثل " الاستبن " و " شراره "
باسم / انا قدمت الشكر وكل الشكر للدكتور مرسي لانه البطل الحقيقي للبرنامج وهو المعد رقم واحد للبرنامج .
المحقق " مقاطعا " / انت بتتقاضى كام في البرنامج ده ؟باسم / أنا والطقم كله في السنة حوالي 23 مليون
المحقق " منتصرا " / قررت النيابة حبس المتهم 14 يوما على ذمة التحقيق
باسم / ليييييييييييييييه ، وبتهمة ايه ؟
المحقق / انت قلت بنفسك واعترفت ان الدكتور محمد مرسي هو المعد رقم واحد في برنامجك وقدمت له الشكر في اخر حلقة ليك ، وعندي بلاغ متقدم من الدكتور مرسي انه لم يتقاضى منك حتى الان اي مليم نظير قيامه بهذه الوظيفة ، انت هتتنفخ وكله بالقانون .
ياحسيييييييييييييييييييييييييييييييييييييييييييييييييييييين .