مساحة للرأى

عبد الله يسرى: أهلا بكم مشاهدينا الكرام في حلقة جديدة من مساحة للرأي والتى نجتهد فيها في تحليل وتفسير وشرح المشهد السياسى الذى يحدث في مصر وبالمناسبة نحن نتحدث الآن هناك دعوات لتوحد القوى والتيارات والأحزاب السياسية قد بدأت بالفعل بدأت بوادر الاستجابة للإعلان عن حزب المؤتمر المصري ليحوى بداخله أكثر من 10 أحزاب ربما تكون هذه الخطوة جاءت متأخرة لكن ما حدث حدث وقد تم بالفعل اتخاذها منذ عدة أشهر ربما كان المشهد السياسى الآن قد تغير لكن هي بدأت الآن وبالتزامن مع هذا أيضا هذا الإعلان وهذه الحركة هناك حركة تغيير ل 10 محافظين من محافظات مصر وإعادة تشكيل أيضا للمجلس الأعلى للصحافة والمجلس القومى لحقوق الإنسان وردود الأفعال متباينة والجميع يطرح علامات استفهام هناك من يرحب وهناك من يضع مخاوفه نحن نرصد لكل ما يحدث في الشارع المصري والبعض يرى أن هذا أمر طبيعى ليتواكب مع المتغيرات السياسية حاليا والبعض متخوف اعتبار ما يمكن أن نسميه سيطرة على تيار الإسلام السياسى وإقصاء باقى التيارات الأخرى حزب الحرية والعدالة الذراع السياسية لحركة الإخوان المسلمين دائما يرفع شعار مشاركة وليست مغالبة نرى الأفعال غير الأقوال أو غير هذا التصريح على كل إذا اتفقنا أو اختلفنا هذه لعبة سياسة ونحن لمزيد من الإضاءة والشرح والتفسير أرحب بضيفى الكريم في الاستديو الأستاذ فهمى عبده عضو مجلس الشعب السابق وعضو مؤسس في حزب الحرية والعدالة أهلا بك يا أستاذ فهمى
أ.فهمى عبده: أهلا بحضرتك
عبد الله يسرى: خلينا نبدأ في البداية من مجلس الصحافة أو المجلس الأعلى للصحافة والمجلس القومى لحقوق الإنسان الأسماء التي تم الإعلان عنها وتعيينها هي تعيينات سياسية لماذا لا توجد آلية ما تتوافق مع النظام الديمقراطى الجديد ومع الآمال التي جميعنا نتجه إليها في التحول الديمقراطى
أ.فهمى عبده: بسم الله الرحمن الرحيم بس طبعا بداية بنتشرف إن احنا نبقى في القنوات المصرية يعنى المبنى اللي هو فعلا بيحوى في طياته أفضل الإعلاميين
عبد الله يسرى: شكرا جزيلا وده مبنى كل المصريين
أ.فهمى عبده: الأمر بس موضوع المبدأ بتاع حضرتك ده هو في المقدمة موضوع التكويش أو إن ممكن التيار السياسى ده أو التيار الإسلامى ده إنه يسيطر كلها توقعات وليست أفعال ما يحدث على الأرض مخالف تماما لهذا الأمر بداية من بعد الثورة مباشرة وحتى الآن بالأرقام المجلس ، آخر حاجة وممكن نجيب من الأول برضه يعنى التحالفات السياسية اللي تمت في الانتخابات السابقة بتاعت مجلس الشعب بتؤكد هذا الأمر كانوا 43 حزب الكل عايز رقم (1) في القائمة صفصفوا معانا على 11 حزب التحالف الديمقراطى من أجل مصر وده كان أكبر تحالف لإن التحالفات الثانية كانت 3 و 4 أكبر حزب الوفد نزل لوحده أخدنا 47 % منهم 7 % دكتور مجدى قرقر وأمين إسكندر لا علاقة لنا بهم كحرية وعدالة هم أحزاب أخرى تحالفت معانا الإخوان أخدت 40 % اللي كانت أشار إليها ال 35 % الثلث تقريبا فبالتالي ليست لنا علاقة بمجلس الشعب ليس له الأغلبية لفظ أغلبية ده تعدى 50 %
عبد الله يسرى: بس ده موجود يعنى لماذا تتحرج من قبول هذا المصطلح رغم إن هو موجود في كل سياسات الدول
أ.فهمى عبده: الديمقراطية ترسخت لدى دول أما ديمقراطية لسه كى جى 1 النهاردة في مصر محتاجة نجمع كل القوى الوطنية يعنى فكرة القوائم دى بالرغم إنى كنت معترض عليها لكن فكرة جيدة جدا لإن خلت كل الأحزاب مثلت احنا عندنا فيه حزب في الشورى كان ناجح له واحد بس الأستاذ إيهاب الخراط وتم تعيينه رئيس لجنة بالرغم إن فكرة الإخوان دى 60 % أنا قصدى فكرة التكويش دى كانت فزاعة قالها النظام السابق وقالها بعض الأحزاب برضه اللي هم فشلوا في الانتخابات يركز في هذه النقطة لإيحاء الناس فيه نقطة في الإعلام حضرتك عارفها أكثر منك هي عربية المزيكا ؛ عربية المزيكا إن انت بتطلق كلمة فتتردد فتبقى هي دى حقيقة ويعنى هي كذبة والناس تصدقها زى مثلا إيه التكويش ، الحزب الوطنى الجديد أنا كنت ممكن برضه أعمل بنفس عربية المزيكا دى المقاولون على الديمقراطية مش الانتخابات اللي فاتت كانت كده العالم كله شهد بإن الانتخابات دى نزيهة لم يتم مؤسسات في مصر منتخبة من الشعب إلا الرئاسة والشعب والشورى
عبد الله يسرى: كده نبقى تجاوزنا هذه النقطة نتحدث عن مجلس الصحافة المجلس الأعلى للصحافة
أ.فهمى عبده: هو تقريبا 56 شخصية على ما أعرف يعنى الإخوان فيه 3 من تم تعيينهم 3 منهم 1 المفروض لإن هو رئيس مجلس الشورى ده قانون احنا النهاردة لما لغيت مجلس الشعب أنا سمحت أوقف التشريع مش كان فيه ناس بتجرى على حل مجلس الشعب ورئيس المجلس قال كده ورئيس المجلس لا يكذب وكان بيهدد بحله وفعلا طلع كلام الدكتور سعد الكتاتنى صح وتم حل مجلس الشعب طبقا لهذا الحكم فأنا ماشى على نفس القوانين ليه علشان مفيش مجلس شعب بيشرع النهاردة الدكتور مرسى لسه من أسبوع وللا أسبوع ونص بدأ انتقال له السلطة التشريعية وأول حاجة هو سمح في عضو فيه أول قانون الدكتور محمود غزلان ، قطب عربى والدكتور أحمد فهمى اللي هو طبيعى موجود طبقا للقانون
عبد الله يسرى: لماذا التعيين لا يعتمد على أهل الخبرة لماذا يعنى تستمرون في مسلسل أهل الثقة
أ.فهمى عبده: ممتاز جدا أنا بقول لحضرتك مين قال الكلام ده مين أقر هذا الكلام أنا لما أحط مجلس الشعب النهاردة اللي هو المفروض بالقانون آدى واحد ، لما أحط خالد صلاح ، خالد صلاح مش مهنى لما أحط خالد صلاح في المجلس الأعلى للصحافة اللي هو طبعا لو جبت تاريخ الفترة السابقة بس مش من زمان هو ضد الإخوان تماما
عبد الله يسرى: لا هو له ميول إخوانية وكان في البداية
أ.فهمى عبده: لا
عبد الله يسرى: هو صرح يعنى
أ.فهمى عبده: هو ساب الإخوان تماما
عبد الله يسرى: ميول أنا قلت ميول مش انتماء عشان ما تزعلش بس
أ.فهمى عبده: لا ده فيه ناس بتربى ذقنها لا ده شرف لنا يعنى حضرتك الإخوان الميزة فيهم بتجمع ولا تفرق يعنى حتى لو واحد يعنى الدكتور محمد مرسى أول قانون اللي هو الإعفاء وخرجه من السجن
عبد الله يسرى: طب هذا من الأسماء
أ.فهمى عبده: الدكتور محمود غزلان ده دكتور في الجامعة مش واحد يعنى بسيط
عبد الله يسرى: ليست له تجربة صحفية أو إعلامية
أ.فهمى عبده: ما هو حضرتك أنا بحط في أطياف المجتمع أنا بختار بتوعى أنا أو ما يمثلنى أفضل عنصر عندي
عبد الله يسرى: معقولة ما عندكمش عناصر إعلامية في حزب الحرية والعدالة أكيد فيه
أ.فهمى عبده: طبعا فيه
عبد الله يسرى: طب يا فندم الإخوان فيهم 2000 أستاذ جامعة
أ.فهمى عبده: حتى لو نبتعد عن شبهة أهل الثقة وأهل الخبرة ، انت حضرتك بتقول إن أنا أقريت اللي حضرتك ذكرته أنا كحزب النهاردة لي حصة ممكن مفروض الصح طبقا للى حضرتك أقريت به في الأول إن الدول الديمقراطية إن أنا لما آجى رئيس دولة بجيب اللي يساعدونى من نفس اتجاهى عشان أطبق برنامجى ما حدش ييجى يحط لي حديدة أو عصايا في العجلة فتقف وأمريكا عملت كده وفرنسا وهو بيسلم عليه بيقول له اتفضل تصريح قال ده من الإخوان لإنه قال أنا هغير كل الوزراء دى السياسة الصح إن أنا أطبق ولكن احنا النهاردة زى ما قلت لحضرتك في الأول احنا لسه K.G 1 في السياسة K.G 1 في التجربة الديمقراطية فبالتالي أنا بحاول أجمع قوى وطنية 56 لما أنا كإخوان 56 لما بيقولوا أخونة البلد ومسيطرين على الدولة ده كله كلام وهم لكن أنا لما أحط 3 من عندي ده اختيارى بقى
عبد الله يسرى: احنا بالمناسبة K.G 1 في الديمقراطية لكن مش في السياسة يعنى مصر عظيمة ولها مزمار كبير في السياسة
أ.فهمى عبده: لا أنا بتكلم عن الناخب المصري كمان النهاردة الناخب المصري ما كانش بيتكلم عن السياسة كثير لإن الكل عارف إن الانتخابات بتتزور فيه 3000 آلاف صوت موجودين في شولة الشعب النهاردة كله ، النهاردة الناس بتقعد على المقاهي كان زمان بيتكلم في أمور ثانية النهاردة خلاص اتغيرت السياسة بقت هي إذن اللجنة التأسيسية 16 اللي الناس بتقول دول مسيطرين عليها 16 في اللجنة التأسيسية من الإخوان المسلمين فقط هي المشكلة عندنا لما يجيئ لي مثلا واحد زى الدكتور طارق البشرى راجل محترم جدا فيتقال إن الراجل ده من الإخوان المسلمين أي حد محترم النهاردة التزم أو ربى ذقنه فهو من الإخوان لا أنا بجيب دول الإخوان هم دول الإخوان بالضبط 16 واحد في اللجنة التأسيسية 5 وزراء تقريبا من أكثر من 35 وزارة 5 وزراء فقط وأنا رئيس الدولة من عندي يعنى أين الأخونة أين التكويش ، 2 في الرئاسة من ال 17 واحد عندنا من الإخوان المسلمين المشكلة إن احنا عندنا الناس مش عارفة مين هم الإخوان فبالتالي كل من يلتزم أو كل يعنى كان فيه جدل في الشارع المصري
عبد الله يسرى: فيه ناس كثير ما تعرفش مين هم الإخوان
أ.فهمى عبده: ما هي دى خطيرة دى الإخوان في سطور الإخوان في سطور تم تأسيسهم سنة 28 باسم حسن البنا وكان له مستشارين مسيحيين ، الإخوان في سطور تم اغتياله في فبراير 49 بسبب إن هو كان بيجلى الانجليز وعرف الناس إن فيه يهود بيروحوا فلسطين وجهز جيش من الشعب المصري كله بما فيهم الإخوان وراحوا حرب 48 تم اغتياله
عبد الله يسرى: ده كان حركات وطنية بالكامل ليس الإخوان فقط في حرب 48 ودعم الشعب المصري دعم الحرب كان الشعب المصري كله
أ.فهمى عبده: أول من أيقظ الأمة العربية كلها لتهجير اليهود هو كان حسن البنا برسائله المكتوبة لكل الملوك والأمراء في الدول العربية
عبد الله يسرى: من قتل حسن البنا
أ.فهمى عبده: الصح اللي وصل لنا وفيه يمكن الجزيرة جابت وثائق بهذا الأمر ولقت ورقة مقطوعة في الصحيفة بتاعتهم
عبد الله يسرى: التاريخ أنا ماليش أنا عندي وثائق ممكن أروح دار الكتب وأجيب وثائق
أ.فهمى عبده: الانجليز بالتحالف مع الملك ، الانجليز بالتحالف مع الملك لإنهم عرفوا إن هذا الرجل له من القوة أنه يستطيع فعلا أن يجهز جيوش بحب الناس له وبجماعة الإخوان المنتشرة في كل قرى مصر جاب حسن البنا ده خلال فترة بسيطة شاب مات تم اغتياله جاب أكثر من 3000 قرية راح أكثر من 3000 قرية ينادى بالفكر الوسطى الإخوان اللي خرجوا سنة 81 على إيد الرئيس السادات ودخلوا النقابات ، دخلوا مجلس الشعب بدؤوا يلعبوا سياسة تقريبا من عام 84 يعنى في 81 كانوا بيفكروا ازاى يدخلوا الانتخابات بعد كده 84 ، 87 في التحالف العام والوفد رفض يتحرك معانا فدخلنا التحالف الإسلامى مع حزب العمل تاريخ من السياسة كبير أنا قصدى التاريخ ده لازم يتقرى صح مخاوف الناس من الإخوان المسلمين نعرف مين هم الإخوان عشان نقدر نقول فيه مخاوف منهم وللا لا
عبد الله يسرى: دى نقطة شديدة الأهمية يجب أن نعيد قراءة التاريخ مرة أخرى حتى نحكم على الناس ليس تصنيفا بين الظن واليقين حركة يعنى إذا ما تجاوزنا مسألة الصحافة وحقوق الإنسان لإن واضح إن فيه تشابه بينهم حركة تغيير المحافظين الجدد ال 10 فيه ناس استبشرت وقالت أسامى لها تاريخ محترم وإلى آخره لكن أيضا كانت هناك بين يعنى وراء الأكمة ما وراءها محافظة كفر الشيخ ، محافظة المنوفية احنا كلنا عارفين إن هم كانوا الأقل أصوات للدكتور محمد مرسى رئيس الجمهورية وهى معقل حمدين صباحى فما معنى أن يأتى بمحافظين من الإخوان المسلمين أو من حزب الحرية والعدالة ويتقلدوا منصب المحافظ وده حقهم يعنى ابتداءً يعنى عشان نبقى متفقين
أ.فهمى عبده: نفس الكلام أنا بختار طبقا لقدراتى أنا النهاردة لما أجيب الدكتور محمد على بشر وهو من المنوفية من شبين الكوم أستاذ في الجامعة أنا عايز أجيب أقل من كده إيه أنا حضرتك أنا كان عندي قضية واحدة بس المحكمة العسكرية كان فيها أكثر من 22 أستاذ جامعة كان عندي كثير المهندس سعد الحسينى كان رئيس لجنة الخطة والموازنة العامة وأنا تعاونت معاه مباشرة كان رجل معانا إدارة وكأنه محاسب وكأنه مهندس هو تاجر لا ده مهندس بتاع مكتب هندسى عقارات دماغ شغالة المهندسين معروفين إن هم يمكن أفضل من الأطباء رغم إنهم أقل أجر لكن أفضل في الميكانيكية بتاعت العقلية في الإدارة كان بيدينى خطة عمل ازاى اتعامل مع كل الوزراء يعنى قصدى إيه ليست هناك أقل في الكفاءة
عبد الله يسرى: كيف ترشحون شخص لمنصب ما
أ.فهمى عبده: احنا عندنا ترشيحات مجلس الشعب والشورى وكده عندنا مبدأ لا نعطيها لمن يظهر حرصه عليها حتى الدكتور مرسى هو كان رقم 13 وما كانش المرشح الأساسى ولكن قدر ربنا أدار يعنى هذه الملف ملف كله ده إدارة لربنا كنا قاعدين يوم الجمعة فأشرنا يا جماعة ما ينفعش ده ممكن يحصل حاجة من المجلس العسكرى وفعلا تم استبعاده حضر ورقه يوم السبت قدم الأحد واتقفل باب الترشيح نفس القصة بقولها لحضرتك كده بيتم لجان متخصصة زى الانتخابات التنسيق الانتخابى هنتكلم فيه أساسى بيبقى فيه لجنة للتحالف مع أو التنسيق مع الأحزاب الأخرى هي اللي تقعد وتقرر عندنا سى دى لهذا الشخص الدكتور محمد على بشر اعتقل كام مرة ، أداؤه في الجامعة إيه ، تاريخه نظيف وللا فيه إيه تاريخ لفرد من الإخوان المسلمين واحنا اللي نرشحه مش هو اللي يرشح نفسه يعنى تفاجأ إن هو يتقال له يتصلوا به يقولوا له تعالى انت هتترشح لكذا كذا إيه رأيك
عبد الله يسرى: ولازم يقبل
أ.فهمى عبده: فيه ناس في مجلس الشعب رفض ، شورى رفض بيتعرض عليه والله هو لو شاف في إمكانياته إنه يستطيع إن هو يؤدى هذا الدور نقول له اتوكل على الله وقدم هي مسئولية النهاردة حضرتك النهاردة الناس بتتعدى على المحافظ بتدخل تكسر مكتبه احنا حاجز الخوف خلاص اتكسر فبالتالي هو يتحمل ما هو ما أداش صح والناس حست بخير لإن حضرتك رغيف العيش اللي الناس النهاردة بتتكلم عليه مفيش رغيف عيش أصلا محترم أنبوبة الغاز ما بتوصلش المحافظين اللي جايين دولة هو تنفيذ ويجب إن هو يستطيع إنه ينزل الشارع يوميا مش واحد أجيبه أحطه في مكتب في التكييف الزمن ده انتهى خلاص فعضو مجلس الشعب والشورى والمحليات ورئيس الحي والمحافظ كل دولة هيتابعوا من الشعب المصري مش من الجهات اللي إيه اللي بتراقبهم فهى ليست تشريف ولكنها مسئولية هيحاسب عليها الشعب المصري قبل قياداته
عبد الله يسرى: وما هو يعنى هذا هو الوضع لكن لماذا لا تقدمون رسائل تطمين للناس بإنه يعنى ليست هناك محاولة للمغالبة وزى ما حضرتك تفضلت بمصطلح التكويش على مفاصل الدولة بكل يعنى بكل تخصصاتها المختلفة ما هو دور حزب الحرية والعدالة الآن لتقديم هذه التطمينات
أ.فهمى عبده: هو يعنى حضرتك كلامك مضبوط ما يتخذ النهاردة من قرارات بيان المحافظين النهاردة الناس كلها كانت متوقعة إن الدكتور محمد مرسى هيجيب المحافظين كلهم من الإخوان لكن أنا طلعت في كذا فضائية قبل كده كان معايا ناس اللي هم مخالفين للإخوان النهاردة بعد تم اختيار وزارة ولقى إن هم 5 من 35 بيقول إيه دلوقتى الفضائيات كلها شغالة عليه أن الإخوان من حقهم ياخدوا كل الوزارات بعد تشكيل الوزارة يعنى هو كان بيهاجمنى الأول عشان ما أشكلش وزارة من عندي كلها عشان تطبق برنامجى أنا الدكتور محمد مرسى لم ينتخب كشخص أنا بتكلم برنامج النهضة برنامج حزب الحرية والعدالة أنا كنت بنزل في الشارع واتكلم مع الناس عشان ينتخبونى عشان أطبق البرنامج السياسة الديمقراطية إنى أجيب كل دول من عندنا فوجئوا بإن الوزارة مش كلها إخوان ولا رئيسها حتى زى ما وعد الدكتور مرسى رئيسها مش إخوان ولا أكثرية ولا أقلية ولا حاجة ده 5 من 35 يعنى عدد قليل جدا فده ما تم اتخاذه في الواقع مشكلة إخواننا المخالفين لنا أو الأحزاب الأخرى اللي فشلت في الانتخابات وحست إن التيار الإسلامى مش بينجح عشان هو تيار إسلامى بس لكن احنا ملتحمين بالمجتمع زى ما بقول لحضرتك تم حل مجلس الشعب هتلاقى مقراتنا مفتوحة ، خدماتنا شغالة زى ما هي الشوارد اللي بيقولوا عليها زيت وسكر والكلام ده ، ده طبيعى 3000 جمعية خيرية في الجمهورية فوق ال 2000 أستاذ جامعة انتشار في كل ربوع برضه المشكلة عندنا بنبص للقاهرة لا مش القاهرة مصر الإخوان في المحافظات غير القاهرة والجيزة هنا علاقاتنا هنا ب 100 ، 200 ، 300 بتوع الدائرة لا هناك قبيلة وعائلات
عبد الله يسرى: يعنى انتم درستم المجتمع المصري بثقافته وما يحتاجه وما يعنى يؤتى ثمار سريعة مع الرأى العام المصري لكن هناك يعنى نقطة غاية في الأهمية إذا ما فشلت لا قدر الله الحكومة الآن يعنى الناس هتقول والله الحكومة مش 100 % إخوان وبالتالي سترفعون عنكم الحرج
أ.فهمى عبده: يعنى كلام برضه ممتاز جدا إن احنا نطرحه هي قصة الإدارة النهاردة الدكتور مرسى النهاردة قال إيه أنا هجيب مستشارين بس أنا المسئول الأول إذن هو حطها في رقابته أداء الحكومة النهاردة لما جاب الدكتور هشام قنديل هو اختياره فبالتالي برضه هيحاسب على هذا الأمر ولذلك هتبقى المتابعة جيدة النهاردة الدكتور مرسى لما ينزل عين شمس وينزل مش عارف إيه مفيش رئيس دولة كان بيعمل الكلام ده أنا قصدى هو عارف خطورة المرحلة مش عشان تاريخ الإخوان لا أنا لازم أوضح إن احنا النهاردة في رقبته شعب مصر 90 مليون كلهم هيتعلقوا في رقابته يوم القيامة انت عملت وما عملتش فأداء الحكومة النهاردة فوجئنا بعد فترة إن أداءها وأظن واضح للناس بفضل الله إن الأداء متحسن ، علاقات دولية جيدة ، تأمين منابع النيل لأول زيارة للدكتور مرسى بعد السعودية إن أنا أبدأ أعمل جوب وتكتل جديد ضد الغول اللي بيخوف العالم كله عن طريق الصين وغيرها ، وغيرها ، وغيرها أنا قصدى السياسة الخارجية جيدة الوزراء أنا عندي النهاردة وزير بتاع القوى العاملة اللي هو من الإخوان المسلمين خالد الأزهرى جايب لي عقد بمليون وظيفة في ليبيا أنا قصدى النهاردة الناس بتجرى كله بيتعب وعايز يشتغل لإن الوزير اللي مش هيشتغل إخوان أو غير إخوان هيتم رفعه تماما من الوزارة
عبد الله يسرى: عموما نحن الآن ما زلنا في مرحلة مشاهدة وتأمل والتقييم فيما بعد اتفقنا
أ.فهمى عبده: ما هي دى أفضل حاجة بس ياريت كلام حضرتك ده يوصل لباقى الأحزاب الأخرى إن التقييم بعد التنفيذ وليس الوهم
عبد الله يسرى: التقييم بعد الفترة المحددة والمعلنة والإنسان مرهون بعمله في الأول وفى الآخر يعنى هناك تقرير اسمح لنا الأول نشوفه وبعدين نرجع ثاني لإن واضح إن المائدة مليئة بالفاكهة اتفضلوا
تقرير
في قراءة للماضى يرى الدكتور عمرو الشوبكى أن لولا تحول رجال مبارك ونظامه لخيال مآته لما وصل الإخوان للحكم بدون دستور وقانون انتخابات ، وفى حواره مع الوطن يقول حمدين صباحى انتخابات المحليات القادمة أهم من انتخابات الشعب وانتخابات الشعب أهم من الرئاسة وتوحد قوى الشعب سيعلو فوق أي أمراض ذاتية ، لذا فإن أكرم القصاص يرى أن أي حزب يفكر في الدخول إلى عالم السياسة عليه أن يبدأ السلم من المحليات ، وعن تعيين المحافظين يقول خالد رزق أفهم جيدا أن تعيين الرئيس للمحافظين حتى وإن كانوا جميعا ينتمون لجماعة الإخوان فهو الحاكم وهم مفوضوه بالحكم المحلى ، وعلى جاانب آخر يطالب عبد المحسن سلامة أن تكون حركة تغيير المحافظين بالانتخاب حتى يمكن محاسبتهم إذا ما أخفقوا في تحقيق برنامجهم الانتخابى ، حزب مصر قوية تحت التأسيس برئاسة البدكتور عبد المنعم أبو الفتوح يطالب مجلس الشورى بإعادة النظر في اختيارات أعضاء المجلس القومى لحقوق الإنسان والمجلس الأعلى للصحافة ، وخارج النص يقول سعد هجرس تركيع صاحبة الجلالة مهمة مستحيلة
عبد الله يسرى: أهلا بكم مرة أخرى في مساحة للرأي أجدد التحية بضيفى الكريم الأستاذ فهمى عبده عضو حزب الحرية والعدالة وعضو مجلس الشعب السابق سيدى هل اندماج الأحزاب الليبرالية ذات الطابع المدنى التي أعلنا في بداية الحلقة عن تشكيل ائتلاف لها أو تيار أو كتلة لها يشكل قلق لحزب الحرية والعدالة
أ.فهمى عبده: عايزين بس نوضح ونحرر اللفظ دى نقطة مهمة جدا لازم تصل للمشاهد القوى المدنية هو طبعا التاريخ المعروف إن الإخوان من أقدم الناس في السياسة والوفد كان قبلهم أنا أصل المدنية الإسلام هو أصل المدنية إن احنا نقول مدنى وإسلامى لا المدنى ضد العسكرى مش ضد الإسلامى الرسول عليه الصلاة والسلام أول من أسس دولة مدنية كانت تجمع فيها مش المسلم والمسيحى فقط لا ده المسلم واليهودى والمشرك داخل مدينة وعمل دستور من 48 مادة أول مادة في هذا الدستور وأن المسلمين واليهود أمة واحدة ده مع اليهود من أشد الناس عداوة للذين آمنوا اليهود والذين أشركوا إذن كلمة مدنية دى لا ما يلصقش بنفسه المدنية ويلصق بى الدينية لو قال دينية يبقى هو مش فاهم أصلا إيه معنى كلمة دينية
عبد الله يسرى: يعنى حضرتك انتوا في الحزب معترضين
أ.فهمى عبده: نحن أصل التيار المدنى بمرجعية إسلامية
عبد الله يسرى: لا بعيدا عن التأصيل التاريخى للفكرة أو اختلفنا أو اتفقنا احنا بالمتعارف عليه إن كان صحيحا أو غير صحيحا هناك تكتل لمجموعة من الأحزاب الآن ينشئ هل هذا التكتل يقلق حزب الحرية والعدالة
أ.فهمى عبده: بالعكس خلينا فيه بس حاجتين نوضحهم فيه لفظ التحالف وفيه لفظ التنسيق التحالف ده تحالف سياسى زى اللي كان من ال 43 حزب اللي كانوا متحالفين قبل انتخابات مجلس الشعب الناس متجمعين على أهداف معينة عايزين نطبقها لو احنا كلنا وصلنا للحكم وده اللي كان موجود في التحالف الديمقراطى من أجل مصر اللي كان 43 وبقى صفصف على 11 حزب معانا الكرامة وغيره ، وغيره ، وغيره واشتغلنا معاهم في الانتخابات وخدنا 47 % هم أخدوا 7% تقريبا واحنا أخدنا 40 % ده اسمه التحالف بعد كده انتقل إلى التنسيق الانتخابى لازم يقل فإخواننا اللي موجودين النهاردة لو وصلوا 50 حزب أولا دى أخطر حاجة في التحالفات من لا يمول الانتخابات القادمة هيبقى هو اللي له السيطرة الأكثر في هذا الأمر هو اللي هيرشح أكثر ، هيحدث خلافات ما بين هذه الأحزاب ما بين لو رواسى القائمة هيبقى مين على رأس القائمة عشان ينجح على طول ومين في الفردى عشان وهكذا ولكن بالعكس مصر النهاردة محتاجة لقوة
عبد الله يسرى: بهذا المنطق من كان يمول حزب الحرية والعدالة في الانتخابات بهذا المنطق
أ.فهمى عبده: حضرتك كلمتين بس عشان ما أنساهاش وأكمل بس فكرة التحالفات بالعكس احنا النهاردة عندنا التحالفات دى ميزة لمصر ليه مصر إذا كانت قوية بمعارضة قوية هتستمر قوية أما إذا أصبحت المعارضة ضعيفة الحزب الحاكم أيا كان بقى الإخوان وللا مش الإخوان بعد فترة بينتهى تاريخه أصلا أن أنا النهاردة عندي مئات الآلاف دخلوا حزب الحرية والعدالة أنا عايزيهم ينزلوا ويشتغلوا ويتحركوا أنا بحس إن أنا عندي منافس قوى في دائرتى أنا جايب مثلا 188 ألف صوت والمنافس بتاعى جاب 99000 صوت أنا لما ينزل لي واحد ضعيف هعمل إيه مش هتحمس إن أنا أجمع أصوات وأعمل زخم شعبى وأعمل مؤتمرات وندوات وأفضح ناس في البرنامج الانتخابى بتاعى ما خلاص أنا عارف أنا كده ، كده ناجح لا مصر لن تكون قوية وديمقراطية بحق وسيادة قانون وكل الألفاظ اللي احنا بنقول عليها دى كلها مش هتبقى قوية فعلا ودولة متينة إلا إذا كانت هناك معارضة قوية
عبد الله يسرى: طيب دى متفقين عليها لكن هناك 15 حزب بيجتمعوا دلوقتى
أ.فهمى عبده: يجتمعوا
عبد الله يسرى: ما بيقلقكمش خالص ال 15 حزب
أ.فهمى عبده: الوفد حضرتك نزل لوحده وقال أنا هرشح على كل المقاعد في الانتخابات اللي فاتت رفض ينزل في التحالف بالرغم إن كان معايا 11
عبد الله يسرى: هم بيجتمعوا دلوقتى في حزب واحد اسمه حزب المؤتمر
أ.فهمى عبده: بالعكس ده حرية
عبد الله يسرى: إيه سبب الثقة اللي عندكم والإيمان
أ.فهمى عبده: لا بالعكس مش ثقة حضرتك أنا النهاردة لو هو التحالف ده لخدمة مصر ربنا يكتب له النجاح
عبد الله يسرى: احنا ما نحكمش يعنى على نوايا الناس
أ.فهمى عبده: أنا لسه ما كملتش أنا قلت أهه إذا كان ، إذا كان هذا التحالف فعلا له أهداف معلنة وكلهم متفقين عليها ربنا هيكرمهم وهيستمروا وياخدوا نسبة كويسة في الانتخابات لو فيه بينهم تنسيق انتخابى مش تحالف ديمقراطى مثلا ولو العكس لا قدر الله النية وحشة عشان ضد التيار الإسلامى زى ما واحد طلع قال ده أنا عامل حزب كذا عشان يبقى ضد الإخوان لا يحيك المكر بالسيل إلا بأهله ماليش علاقة أنا دى الميزة عندي ميزة إيه إن أنا بركن إلى الله بعد ما باخد كل الأسباب بجهز بعمل كل الوسائل المادية وبعد كده بركن مع الله في معركتى الانتخابية وأنا النهاردة بعلن أدام حضرتك احنا هنحط ممكن نرشح على كل المقاعد ليه الديمقراطية النهاردة إن انت ماتفرضش على نسبة زى ما كان بيتفرض علينا وإن رئيس الجمهورية لازم يسيب الإخوان ولازم يسيب حزب الحرية والعدالة في أي دولة ولكن احنا عارفين زى ما حضرتك اتفقت معايا في الأول احنا K.G 1 ديمقراطية وبالتالي بنجمع ولا نفرق النقطة المهمة بتاعت يمول دى نقطة الناس كلها بتتكلم عليها
عبد الله يسرى: في إيماءة سريعة لإن فاضل لنا برضه دقائق
أ.فهمى عبده: هذا السؤال تم سؤاله للأستاذ حسن البنا رحمة الله عليه سنة 36 من صحفى فقال له نحن أغنى الناس في مصر قال له ازاى قال له إن كل جيوب الإخوان هي ملك لدعوة الإخوان المسلمين دلوقتى بقت معلنة إن الإخوان بيجروا وراء تقنين جماعة الإخوان المسلمين وتكوينها فعلا بشكل قانونى
عبد الله يسرى: بس عندما كانت الجماعة جماعة دعوية لم تكن سياسية ولا هدفها السلطة
أ.فهمى عبده: لا ده حسن البنا كان مترشح زمان لمجلس الأمة مين قال كده ده كلام فيه اختلاط وعشان كده بنقول لازم نعرف من هم الإخوان وتاريخ الإخوان أول واحد سياسى في مصر كان حسن البنا
عبد الله يسرى: يعنى من كان من يمول
أ.فهمى عبده: بص حضرتك ده الفرق بين وجهة نظرنا في الإسلام الشمولية الرسول عليه الصلاة والسلام كان أول سياسى من محمد بن عبد الله إلى ملك الروم رسائل سياسية المعاهدات اللي جاءت في سورة التوبة أكبر آية في القرآن آية الدين ما فرطنا في الكتاب من شئ وده المشكلة عندنا إن اخواننا ما قرؤوش الإسلام كما قرأه الإخوان المسلمين شمولية هذا الدين ما فرطنا من هذا الكتاب من شئ ولكن احنا بنقول نرجع نقرب من بعض السفينة هتتخرم ولو اتخرمت كله هيغرق احنا نحط إيدينا في إيدين بعض احنا عندنا استعداد احنا كإخوان عندنا استعداد ندخل في هذا التحالف اللي فيه 10 أحزاب لو الأهداف كلها معلنة لنا وفعلا جيدة لخدمة مصر كلنا إن شاء الله مع بعض نشيل الشيلة وتعدى مصر
عبد الله يسرى: أولا السفينة إن شاء الله ستبقى ومصر باقية إن شاء الله ونحن لدينا مرجعية واضحة هي الأزهر الشريف لا خلاف على ذلك لكن سؤال أخير بصراحة إلى أي مدى يؤمل حزب الحرية والعدالة بمبدأ تداول السلطة وقبل أن تجيبنى على ذلك التاريخ الإسلامى واضح المسألة يعنى ولكن تؤخذ الدنيا غلابا الخلافة جاءت إما بالبيعة أو بالعهد أو بالتغلب
أ.فهمى عبده: لا أنا هجيب لك بالواقع العملى النهاردة ، حضرتك النهاردة في مجلس الشعب اللي هم جريوا وراء حل مجلس الشعب وأنا ما عملتش حاجة النهاردة المصري اليوم يوم 16 يوم انتخابات الرئاسة منزل صفحة كاملة بإنجازات مجلس الشعب بعد ما اتحل لا أنا هقول لحضرتك احنا كأعضاء مجلس شعب أصدرنا قانون علينا احنا بمجرد صدور حكم ببطلان أي دائرة من الدوائر يتم استبعاد العضو مش زى زمان المجلس سيد قراره إذن احنا مش عايزين نقعد فوق الكراسي بس ، الأمر الثانى جرينا وراء إن احنا يبقى عندنا في الاستفتاء مش احنا اللي كنا بنقول للناس قولوا نعم حضرتك احنا قلنا دورتين فقط لو احنا كنا بنحط صبحى صالح وطارق البشرى وكل دول كانوا قالوا لا لحد ما يموت الكلام ده مش موجود الديمقراطية النهاردة تطبيقها العملى هو تداول السلطة بس ياريت الطرف الثانى يقبل بنتيجة الصندوق احنا عندنا مصر هتعدى بصناديق الانتخابات وليس بصناديق الذخيرة عشان إن شاء الله المركب تعدى بإذن الله
عبد الله يسرى: إن شاء الله صناديق الانتخابات فيها الأسرار كلها لكن فيه إيماءة سريعة لماذا حصل هناك تناقض في مسألة الدين أو القرض صندوق النقد الدولى قرض عندما كان الدكتور الجنزورى موجود قلتوا حرام ولا يصح والفائدة ومش الفائدة ودلوقتى الضرورات تبيح المحظورات
أ.فهمى عبده: ممتاز جدا السؤال ده ممتاز جدا وكويس إنه اتوجه لي أنا لإنى كنت في الخطة أنا لما بتسئل فيه ببقى عارف بقى خلفياته كلها حضرتك لما تجيب الجلسات بالصوت متسجلة مكتوبة في مجلس الشعب في لجنة الموازنة متسجلة أن تعلن للجلسة العامة خالص القرض لم يطرح للجلسة العامة عشان كان فيه مرة واحد طالع من الحزب بيقول لا ده الشيخ سيد عسكر طلع قال لا حرام الكلام ده كذب مش ما اتقالش ده كذب أصلا وافتراء على الشيخ سيد عسكر هذا القرض لم يتداول إلا من خلال لجنة الموازنة وبلجنة مشتركة مع الاقتصادية وكان الرفض سببه أن تم توجيه سؤال مباشر لوزير المالية الأستاذ ممدوح السعيد اللي موجود دلوقتى وحضرتك ممكن تتصل به وممثل الأستاذة فايزة أبو النجا مباشرة بتاع التخطيط
عبد الله يسرى: كان الجواب إيه
أ.فهمى عبده: هل هناك خطة لهذا القرض هل هو احنا آخدينه عشان نسد عجز الموازنة اللي وصل 134 مليار وللا نعمل به استثمارات فبالتالي البلد تشتغل وللا الاستهلاك لم يتم الرد واتقال كده ليس هناك خطة فتم الوقف محدش اتعرض ساعتها لقضية الربا ومش ربا كل اللي تعرض ماذا سيتم الفعل بهذا القرض ، الأمر الثانى إن احنا ما كانش عندنا معلش عشان نبقى صرحاء مع بعض ما كانش عندنا ثقة في الحكومة يعنى حضرتك أول ناس وقفت جنب الدكتور الجنزورى لما الشباب وقف عشان يقعد كانوا الإخوان قالوا لا الراجل ده محترم وله تاريخه كويس وعارفين إن هو وقف أدام جمال مبارك عشان ما ياخدش القرض تاريخه مشرف ولكن ما وجدناه من أداء الحكومة ولما كان أداء مش معناه إن هو وحش أداء الحكومة خوفنا النفوذ دى
عبد الله يسرى: السياق اختلف
أ.فهمى عبده: لا الأمر الثانى مهم جدا إن احنا عندنا مصائب داخلية حزب الحرية والعدالة نفسه أعلن رفضه للقرض احنا أعلنا رفضنا للقرض ونزلت على صفحة الفيس بوك بتاعتى إن حزب الحرية والعدالة رافض هذا الأمر احنا عايزين نشوف مصادرنا الداخلية عندنا صناديق خاصة فيها 1250
عبد الله يسرى: وعندنا الأموال المهربة وعندنا
أ.فهمى عبده: الأموال المهربة أدامها 10 سنين عشان تيجى لكن الأفضل من كده إعادة تسعير الأراضى المنهوبة من رجال الأعمال اللي هي 600 مليار
عبد الله يسرى: طيب بهذه النقطة سأنهى هذا الحوار رغم إنى لا أريد أن أنهيه كل الشكر والتقدير لضيفى الكريم الأستاذ فهمى عبده عضو مجلس الشعب السابق وعضو مؤسس في حزب الحرية والعدالة شكرا سيدى الكريم وعاشت مصر وبقيت دائما إن شاء الله شكرا جزيلا أشكركم أنتم أيضا مشاهدينا الكرام على حسن المتابعة غدا حلقة جديدة في مساحة للرأي إلى اللقاء .