"الشعب اللي عدو نفسه"

باستغرب جداً من الناس إللي بتقول إن المصري متدين بطبعه، متدين إزاي وهو كل لحظة لديه من الأفعال مايتعارض مع مبادئ
الدين-أي دين علي فكرة- يعني لو تتبعنا تصرفات كتير من المصريين، هانلاقيهم طول ماهمّا ماشيين بيتّريقوا علي خلق الله حتي المعاقين إللي ربنا خلقهم.
كده مابيسلموش من التريقة ، مع إن ربنا نهانا عن هذا الموضوع وكل واحد بيتريق علي أي معاق كان ممكن يبقي زيه ، لكن حدث ولا حرج عن موضوع التريقة مع إن أخوتنا المعاقين همّا إللي فازوا بميداليات ذهبية كتير بأوليمبياد لندن 2012 ، ولاااااااااا حد جاب سيرة الوضوع ده نهائي ، طيب بلاش المعاقين خلينا نتكلم عن قصار القامة أو الأقزام ، هي الناس دي ليه مش بنشوفهم وسطينا كده واحنا ماشيين بالشوارع ، عارفين ليه؟ لأنهم بيخافوا الناس تتريّق عليهم طول ما همّا ماشيين حتي بالدراما المصرية الناس دي أدوارها فقط للتريقة ولاحظوا ده بمسرحيات كتيرة ولفنانين للأسف ليهم وزنهم.
عامة كل التصرفات دي وغيرها كتير لا تدل علي تدّين الناس إللي بتعمل كده بل علي العكس.. ده اسمه " ناس عدوة نفسها " لمّا تبقي عارفة إن التريّقة علي خلق الله ضد الأديان السماوية كلها.
وبرضو بتعمل كده ، بس علي فكرة فيه فرق بين التريّقة علي " الخلقة " أي " الشكل " والسخرية من تصرفات البشر وللأسف ناس كتير باسم الدين بتتريق علي خلقة الناس وأشكالهم وتابعوا ده من خلال بعض القنوات المزعم أنها قنوات دينية ...
أهو أنا بقي بالشكل ده نفسي أعيش في البلاد التانية إللي مابتترّيقش علي خلقة ربنا ومتدينة بتصرفاتها...
المزيد من أعمدة دينا المغربي