شقيق ياسمين عبد العزيز يهاجم محمد رمضان: ليه حابب تكرّه الناس فيك

هاجم الفنان وائل عبد العزيز،شقيق الفنانة ياسمين عبد العزيز، الفنان محمد رمضان لسخريته من الطيار الموقوف أشرف أبو اليسر.
وكتب وائل عبر حسابه الرسمي على "فيسبوك": "يا ابني انت بتعمل كده ليه، ناقصك إيه عشان تبقي بالدماغ دي، ربنا اداك نعمة وحب الناس وقبول، وأنا اشتغلت معاك ابن حلال مكنتش كده خالص وكنت ابن بلد وجدع وكنا صحاب وأكلت معاك عيش وملح كتير وليك علّيا إني أنصحك".
وأضاف: "وهقولك الكلام ده هنا لأنك مختفي عننا وعن زمايلك كلهم وبردو منعرفش السبب، أنت فاهم معني الكلام الي أنت كاتبه ده إيه؟ .. إنك بتستهزأ وبتتشفى في بني آدم خسر شغله بسببك ولو حتي بتتريق على الناس اللي فصلته كلتا الحالتين مش صح، أنت ليه حابب تكره الناس فيك، إيه الحلو في اللي أنت بتعمله ده عايز أفهم".
واختتم: "ما تركز في شغلك ونجاحك وتمثيلك بدل الهبد ده عيب يا محمد يا رمضان عيب وروح راضي الراجل ده عشان الناس تحترمك، الراجل غلط وانت كمان، بس وقوفك جنبه هيغير كتير عند الناس صدقني ومش عيب يبقى ليك مستشار إعلامي يقولك تكتب إيه وإيه لا عشان فيه كلام مينفعش يتقال يا محمد".