حارس الإسماعيلي يفتح النار على الجهاز الفني ويهدد بالاعتزال

هدد محمد فوزي، حارس مرمى فريق الإسماعيلي، بالاعتزال، اعتراضا على العقوبة الموقعة عليه، من الجهاز الفني للدراويش بقيادة الصربي ميودراج يستش.
وكان الجهاز الفني للإسماعيلي، عاقب الثنائي عماد حمدي ومحمد فوزي بانتظامهما في التدريبات، رغم منح جميع عناصر الفريق إجازة لمدة أسبوع، بعد الفوز على الجزيرة الإماراتي 2 - 0، ضمن منافسات ذهاب دور ال 16 من البطولة العربية.
وكتب محمد فوزي على حسابه عبر موقع التواصل الاجتماعي "فيس بوك": "شوف الافترا، لسه ربنا كارمنا وكسبنا الحمد الله، يتصلوا بيا يقولولي إنت وعماد تمرين لوحدكم السبت، والفريق واخدين أسبوع أجازة".
وأضاف: "طب ليه القرار طب مع مين مش عارف، طيب يا كابتن عايزن تعقدوني، طب والله العظيم ما هتمرن غير ما لفريق ولو مش هلعب كورة تاني علشان أنا ما أجرمتش، وانت عايز توصلني لكدة، أديني وصلت، ولو هشحت، والنادي الإسماعيلي مش بيقف على حد وحسبي الله ونعم الوكيل فيك تالت وعند بقى بعند بقى عشان معرفش مالكم بيا".
وتابع: "من أول الموسم وعايزين تكرهوا الناس فيا، ويقولوا بتاع مشاكل وربنا يعلم اللي الواحد فيه، علشان تأذي الواحد كده في أكل عيشه، متفتروش علشان ربنا يكرم في اللي جاي، وجمهور الإسماعيلي على دماغي والباش مهندس إبراهيم على دماغي، بس أنا اتعقدت من اللي بيحصلي ومش قادر، ومش طالب غير إني اتمرن مع الفريق، ده حقي".
واستطرد: "يلا خليني أدمر خالص، علشان تستريح، وإن شاء الله ربنا هو اللي عالم بكل حاجة الواحد كان بيموت نفسه الموسم اللي فات، في ثانية كل حاجة اتنست لمجرد أني كنت مش موفق في ماتش في أول الموسم".
واختتم: "يلا الحمد لله وربنا موجود ومش عايز حد يزعل مني، اعتبرني ابنك أو أخوك وواحد واقفله في لقمة عيشه، أو حط نفسك مكاني، هتحس باللي أنا حاسه".