أحمد صالح يكتب : زعلانه ليه يا بلد

مالك ؟؟؟ زعلان ليه ؟؟؟ شاغل بالك ليه؟؟؟
كان نفسك تشوف بلدك احسن بلد صح ؟؟
وكان حلمك ان يكون فى عدل ومساواه صح ؟؟
كنت بتتمنى تلاقى الكل شبعان ودفيان ومش محتاج حاجه صح؟؟
كان نفسك تشوف الناس بتتعالج كويس ومفيش حاجه اسمها اللى معاه يتعالج واللى معاهوش ميلزموش صح؟؟
كان نفسك فى مواصلات مريحه وتحترم أدميتك صح؟؟
كان نفسك متلاقيش بلطجيه ولا ولاد شوارع ولا ناس ماده ايدها وبتقول لله صح ؟؟
كان نفسك تشوف الشباب بيشتغل والبلد شغاله فى مشاريع كبيره والحال بيتحسن والدنيا بتتطور بسرعه صح ؟؟
كان نفسك كمان ان الشباب يلاقى يتجوز ويحل مشاكل تأخر الزواج صح؟؟
كان نفسك فى تعليم محترم يطلع طلبه عبقريه وينافس دول العالم صح؟؟
طب وانت مالك ومال الناس ؟؟ ما تخليك فى نفسك
مش انت بتقرا الكلام ده دلوقتى ؟؟ يبقى ده معناه ان عندك نت او موبايل فيه نت يعنى عيشتك الى حد ما مرتاحه
متشغلش بالك بقى بغيرك وطنش
ما انت حرقت ف دمك واعصابك وقعدت تهتف وقعدت تتكلم مع الناس تقنعهم بالعدل والحق والخير واخرتها محدش بيسمعلك
ليه تحرق فى دمك واعصابك عالفاضى؟؟؟؟ هتستفاد ايه؟؟؟
طب قولى استفاده واحده طيب من اللى بتعمله ده
شاغل نفسك بناس بتموت وناس بتتعرى وناس بتتعذب وتتسحل ليه ؟؟ ما طالما انت كويس وزى الفل يبقى تزعل ليه ؟؟
ااااااااااااااااااااااااه عرفت الاجابه
اصلك انسان .. بنى ادم ... مهانش عليك تشوف ظلم وتسكت
عشان كده ربنا عمره ما هيكسفك ابدا ولا يخيب ظنك
معلشى ربنا كبير .. ومهما طال الظلم فالعدل اكيد جاى جاى بدون شك
ثقتنا فى ربنا اكبر من اى حد