70 شكة في عضم راسي كل أسبوع ..سالي عبد السلام: التحاليل أكدت عودة مرضي

أكدت الإعلامية سالي عبد السلام عودة مرض الثعلبة إليها وهو مرض يهاجم مناعة جسمها عن طريق شعرها ما يؤدي لتساقطه.
وقالت عبد السلام عبر صفحتها على فيسبوك :" اتأكدنا والتحاليل كمان اكدت.. وكلها بسبب الضغط النفسى والزعل فجسمك ومناعتك تهاجم الشعر وبدأت تكتر لأنها نشطة الحمدلله..سبحانك".
وتابعت:"محدش مبسوط 100٪؜ الحمدلله وراضيين وبتيجى حاجات تحزن اقرب ناس ليا تتفاجئ انك شوفتها لما تعرفها وعمره ما بان عليا والناس تقولك وتزعل ليه ميعرفوش شايفينك من برا بس جسمك بيبقى اذكى منك والله حاولت والله ..مش زعلانة ".
وأضافت : "هنبدأ جرعات وكورتيزون واقراص و حقن وحقن فى الراس تانى ال70 شكة كل اسبوع عداهم فى عضم راسي ".
وتابعت :"ربى يعلم بوجع والم الكورتيزون فى الراس بالذات،بيحرق و تقيل زى الزيت عشان يدخل الراس وصداعه ربنا يعفو عنا منه ،امى يا حبيبتى راحت معايا مرة من منظرى مستحملتش تيجى تانى،بقيت اروح لوحدى سبحانك والله...غير اضراره الجانبية اللى كنت لسه مخفيتش منها من كام شهر وقفنا بنتعالج من اضراره الجانبية وقلنا الحمدلله خلاص خلصنا ...بس ابتلاء حب بيختبرك ...والله رضا يا الله ".
وواصلت رسالتها لجمهورها قائلة :" دعواتكم هونت كتيير نزلت سكينة ورضا وصبر ومعيطش المرة دى عشان دعيتولى والله ..هو ايه الحب الحلو ده ويهزروا ويقولولى عملتى العملية فين عشان الناس تحبك كدة مغرورة بحبكم والله الحاجة الوحيدة اللى بتباهى بيها واتغر واتبسط".
ودعت عبد السلام الله ليخفف عنها المرض قائلة :"يا رب هون..يا رب سلم اللهم اشفى مرضانا يا رب لا تبتلينى فى صبرى ..اللهم اعفو عنا يا رب ..يا رب يروح ما يجى تانى يا رب نبطل نفكر ونزعل و نتوتر ونفصل و نروق ".