قرّاء "صدى البلد" تعليقا على رفع أسعار السجائر والمشروبات الغازية: "دى البداية لجس النبض".. "ثورة الجياع قادمة"

- فيصل: أحسن خلي الناس تنتبه لصحتها وأولادها
- رانيا: "عادي وإيه رأيكم في رفع اسعار الكهرباء الضعف والمياه والغاز"
- ميدو: طب السجاير والكحوليات ماشى بس المياه الغازية ذنبها إيه هي محرمات كمان
- حسن ناجى: خلى البلد تنضف يا أخوة التدخين حرام والتدخين نقمة اسمعوها من مدخن قديم
طرح "صدى البلد" عبر صفحته الرسمية على موقع التواصل الاجتماعي "فيس بوك" سؤالا حول رفع الحكومة لأسعار السجائر وبعض المشروبات الغازية والكحوليات.
وتباينت تعليقات القراء على القرار، حيث وافق كريم يوسف على القرار، وقال فيصل: بطلوها أصلي أنا مش بدخن وأحسن خلي الناس تنتبه لصحتها وأولادها، بطلوها يا شعب.
من جانبها قالت رانيا عبد العزيز: "عادي وإيه رأيكم في رفع اسعار الكهرباء الضعف والمياه والغاز حسبي الله ونعم الوكيل"، وقال ميدو محمد: اشمعني اختاروا السجاير والمشروبات وليه مش المياه والغاز والكهرباء والضريبة العقارية واحدة واحدة ثورة الجياع قادمة لا محالة لأنهم بهايم.
وتساءل ميدو مودا: طب السجاير والكحوليات ماشى بس المياه الغازية ذنبها إيه هي من المحرمات هى كمان ولا إيه؟
وقال أبو نصر: موافق على رفع أسعارها 100 ضعف، وقال آخر: الحمد لله كدة أحسن مع إن أنا مدخن سجاير بس شوية شوية يا ريت الرئيس يمنعها خالص من دخول البلد.
وقالت هيا أحمد: كل حاجة هتغلى بالتدريج ودول هم البداية جس نبض الشعب نفس نظام مبارك بالظبط .
وقال أحمد لاشين ياريت ولله يقفلو المصنع خالص يريحنا.. وقال مصطفى الجوهرى اوافق على رفع اسعار السجائر لتخفيف اسعار سلع غذائيه ضرورية مثل الخبز والفول.
وقال حسن ناجى 100% كنت مستنيها من زمان خلى البلد تنضف يا اخوه التدخين حرام حرام حرام والتدخين نقمة اسمعوها من مدخن قديم ومن الله على بالشفاء من هذا الادمان .
وقال سامى حسنى: اللى بيقول احسن قرار.. راعى ربنا يا اخى واعلم ان هناك من الناس من لايملك كسرة خبز، حرام عليكم وكأننا في عهد الأغوات والمماليك.
ورحب عبد العزيز باشا بالقرار قائلا: ألف مبروك على رفع سعر السجاير عقبال ميبطلوا شربها وتصنيعها.