لا ليك أول ولا آخر قصيدة ل "بهاء توفيق"

لا ليك أول ولا آخر
يا ليل ساخر
بتضحك حتى على روحك ..وع النايمين
وع الواقفين محلك سر
وع الماشيين ب خلفا دور
حقيقة بتتعجن بالمر
بناكلها .... سنين .....وسنين
سنين يوسف يا 7 عجاف
سنين هذا الزمان 30 جفاف × جفاف
ومش عارف سكت ازاى ....
بقيت خواف ؟
واخاف ازاى من الدولة؟
وكان اولى ..اصلى الصبح قبل الشمس
واعيش الأمس
ويوصل صوتى كل الناس ...
وميكونش الكلام بالهمس
ميكونش الكلام مكتوم
وليه ع الصبح اتشنكل فى تل هموم
طابور العيش ..وزحمة سير
وحرامية ف مكاتبهم ..ومش نازلين على المواسير
وقلة خير فى قلب الناس
وموت لضمير
وبركة صرف ع الابواب
ووعد بشقة ووظيفة ..ولقمة شريفة للمحتاج
ووالله العظيم كداب
و...طِن شباب بيتعلم لكن جاهل
وعدل بيسرى ع الغلبان
وع الباشا بيتساهل
وليه ساهل يا موت الناس
بعبارة /بقطر/بنار/باستهتار/بزنزانة
وليه كرامتنا متهانة فى كل مكان ؟
ولا سائل ولا مسئول
وكام دلدول فى مجلس وهمى بيهاتو
ولو قولنا فى يوم هاتو ...
بناخد بس بالمراكيب
واخر الليل بنتشاكل على الانابيب
ونطفح ميتك يا نيل ...عكار × عكار
يا سلايتين وكام مسمار فى عرض الزور
وباين يا تاريخ مكتوب ...ونصك زور
سواقى الدهر عطلانة ...ومش بتدور
ومش بتلف
يا خلق العقل شت وتاه ...
خلاص هيخف
ولا قادرين فى وش الريح نقف ونتف
ولا عن بعض نتحامى
يا لوامة يا نفس خلاص ..
كفاية سنين بنتعامى
كفاية سنين بنسكت غيظ
ونسقط جوه دوامة
تدور بالعكس بلكاعة
يا كتر الناس ..يا شماعة
منين هيجيبو ليكم قوت
مدام عايشين عليك عالة
يا عم اخلص وخلصنا ...وخصخصنا
وبيعنا ولو ب 100سحتوت
نسيت ازاى يا قطر الموت
متزعق تووووووت وريحنا
وسيبنا نموت على الطاعة
مع الباعة وفى الاكشاك ..
فى مكرفونات/ف سماعة
فى بر/فى بحر /ف إذاعة
بيان اتصاغ فى كام ساعة :
- هنا مالطة
وأذن زى ما تأذن ....
شريعتنا شريعة الغاب
وحكم الخلق بالبلطة ..
ومفيش غلطة
لأن احنا بشر اوفر
نزيد عنكم بكام شرطة
وحقق لو هنسمحلك ...
تسمعنا كلام التت ...
تترقص وتتمحك كأنك بت
ساعتها بجد هارتحلك ..
وتبقى الفت ...
تبقى الألفى ع الباقيين
8 عشرات من الملايين
بدون معنى ... بدون لزمه
تعارضنى ....
بدون انذار ...
هحطك نعل للجزمة
هنا مالطة ...
شعر : بهاء توفيق
بلد هادية ..
بلد رايقة ...
مفيش زحمة ...
مفيش دوشة..
مفيش ازمة .