حقى أقول بحبك حقى ما دام عشقتك

حقى أقول بحبك حقى ما دام عشقتك
دايماً حاسس
ان جواك شئ ناقص
وانك عاوز تصرخ ومش عاوز
ماشى حيران بصرختك
خايف تحبسها تقتلك
وخايف تفلت تفضحك
ومش عارف انها لو خرجت
هطهرك
يا وليدى اسمع من حكيم العشق واحفظ
( الحزن ان صاب قلب الشاب يخذله
ويسيطر عليه شيطانه ويقتله )
وأقفل كتاب العشق وأسرح
أه يا حبيتى
عطشان وحالف ما أشرب
غير أما أخدك وأهرب
ونكون لوحدنا
ولحد ما يتحقق حلمنا
حالف ما أكل وأتعب
فاكرة
فاكرة يا حبيبتى
عشقتك من 100 سنة فاتت
لا عمرى قلت ازاى ولا فين
هو اللى يلاقى روحه
يسأل روحه منين
المهم انه عشق
والزمن وصدق
وفات
بره حدود الدوامات
من غير ما يخطفه موج الحزن ويغرق
ويفضل أسير الذكريات
يبقى متسأليش
ازاى هنسافر من هنا
وازاى هنهزم حزننا
ونقول يا زمن جود
لجل ما نغنى غناوى فرحنا
متستعجليش
الريح جاية نواحينا
وهتاخدنا معاها نعيش
ما هو مفيش شئ فى العمر بيروح هدر
ولاحد بيسيب أيامه ونلاقيه الصبح هجر
ولا حد بيسيب من عمره ساعة بقشيش
اللى لينا هناخده بس ازاى متسأليش
الجاى أكيد أقوى
ما صوت الحق أقوى
وعمره ما كان ضعيف
والربيع جاى تانى
وهيخلص زمن الخريف
هقول بحبك
ومش هخاف كلام الناس
هقول بحبك واصرخ
بكفاية كتابة ف الكراس
هقول بحبك وأصرخ
ده حرام كتمة الاحساس
هقول بحبك
واياك ف يوم تسألى ازاى عشقتك
ده أنا وعيت ع الدنيا لقتنى بحبك
شعر / أحمد صلاح محمود
ahmedsalah124@yahoo.com