محمد عبد الجواد يكتب: ناس ... وناس

بلادى سويقة منصوبة
تشوف فيها جميع الناس
وغنوة عشق مكتوبة بتبر وماس
وقصر كبير ومتشيد
ملهوشى أساس
يا بلدى تعبت انا فى وصفك
ووصف الناس
*************
أنا والنيل وأحزانى
وصوتك رن فى ودانى
على ضفافك بنام وأصحى
دا صوتك نيل بيأسرنى
وعتمة ليلك السارح تجننى
ولما في يوم أحب أرتاح
وأكون عايز أعيش فى براح
أقوم زارعك في شطآنى
وأحضن شعرك المجدول
على كتافك في وجدانى
وأحسك ظل نخلاية
وأشوفك ضى قمراية
وتبقى انت هنا حكايتى
في سهراية
***************
أحب أبعد
ألاقى القرب مكتوبلى يكبلنى
وأشوف العمر محسوب لى يسلسلنى
وأحس ان انتى جوايا
يا زراعانى شراع سارح على نيلك
تشاوريلى وأنا أجيلك
وأقيد بالحب قناديلك
وأقرا لك فناجينك
أقول بردان تغطينى بمنديلك
أكون حران
تجيبى نسمة من بحرك
وشربة ميه من نيلك
وتحكيلى مواويلك
أقوم فرحان أغنيلك
بصوت مجروح
وأرقص بس قدامك
حلاوة روح .. وأنا المدبوح
ألاقى هواكى زلزلنى
وحبى وشم فى جبينك
وحبك انتى شيء تانى
*******************
انا المكتوب فى قرآنك وإنجيلك
انا المصلوب على نخلك
انا المرسوم فى لوحة عشق
على نيلك
ولو ضلم عليكى الليل
تشاوريلى وانا اجيلك
على الأشواك اسير حافى
واقولك انت غنوتى فلا تخافى
ولو بردانة يوم ماطر أغطيكى
برمشى ودمى ولحافى
ها اكون فرحان ومش ندمان
لانك انت يوم مرضى
بتبقى لى دواء شافى
تضمينى وتحمينى
يا زارعة الخير فى وجدانى
***********************
سأرحل عنك مزهوا
بأفراحى وأحزانى
وأسمع صوتك المهزوم
بلحن غير ألحانى
يناديى بلا وتر ولا نوتة
أنا يا عمرى لا أنسى
فهل دوما ستنسانى
******************
سمعت العمر أغنية على الكورنيش
وشوفتك ست محشورة فى طابور العيش
بتضحك رغم أحزانها
وتهتف رغم آلامها
يموت ولدى
وبلدى تعيش
مشيت تايه كما الدراويش
ولابس بُردتى من الخيش
وواقف رغم مظلمتى
فى طابور الجيش
باجمع كل رفقاتى
وباهتف رغم معاناتى
يموت ولدى وبلدى تعيش
*****************
هواكى عشق مسموح لى
لكنه حرام
لانك انت يا بلدى
رفعت مكانة الأقزام
دا سرقوكى وفضحوكى
ونهبوكى وعروكى
وبيبيعوا لنا الأوهام
بياخدوا كل خيراتك
ويدوكى كلام فى كلام
بلاش تسوقينا قدامهم كما الانعام
عشان خاطرى
بلاش ليهم تبيعينا
بلاش تصدقى كلامهم
بأن احنا كوابيسك
وهُما جنة الاحلام
دا حبك رغم أى آلام
عايش فينا .. عايش بيكى
وبيجيلك فى كل منام
وإعلامك بيسرق مننا الاحلام
******************
لمحتك شاب على القهوة
قاعد عاطل
وأحلامه على سهوة
صارت باطل
همومه بتقتله ع الريق
ولسه الفرح بيماطل
وهو لسه غصن بريء
هيعمل ايه مادام عاطل
بيحلم يلقى فيكى طريق
يحقق منه أحلامه
عشان ما يموتش على القهوة
ويدمن سم برشامه
***************
أقول لك ايه؟
رسايلى كتير
وعندى ليكى سر خطير
فى ناس فيكى تموت م الجوع
وناس تانية بتتعشى
حمام وفطير
وناس فيكى بتملك
طيارات خاصة
وناس تمشي
يوماتى حافية
على المسامير
وبتحبك بلاش فى بلاش
وانتى تدلعى الاوباش
يابلدى فيكى ظلم كتير
أوان الفرح لسه ماجاش
ويوم العدل لسه ماجاش
وفيكى الندل عاش ببلاش
وحُرك انتى يا بلادى
كأنه ما عاش
لو اتغدى ما يتعشاش
ولو صوته ارتفع مرة
يروح ببلاش
ويبقى واخد الجلاش