إرتفاع جنونى فى أسعار الأسماك بدمياط

أسماك دمياط تقفز بأسعارها فى السماء..والأهالي: هناكل أيه
تشهد أسواق الأسماك بدمياط إرتفاعا جنونيًا فى الأسعار، وهو ما يزيد من معاناة المواطنين بإعتبارها أكلة الدمايطة المفضلة وهى أيضا أكلة الكثير من الغلابة نظرا لتنوع الأسماك بما يتيح لكل الشرائح شراءه وأكلة، ولكن موجة أسعار تعصف بآمال الكثير من المواطنين فى أكلة سمك.
معروف عن دمياط أنها تمتلك الأسطول الأكبر فى صيد الأسماك بعزبة البرج وكذلك وقوعها على ساحل البحر الأبيض المتوسط وإشتراكها فى جزء كبير من بحيرة المنزلة وكذلك مرور نهر النيل بها، أعطاها تميز وتنوع فى أنواع وكميات الأسماك المتواجده بها فكان لذلك إرتباط كبير بين الدمايطة وأكل الأسماك.
يقول سعد محمود، موظف بالمعاش "زمان كنا لما يكون الحال ضيق شوية ويقولوا فى البيت هناكل إيه النهارده ومفيش فلوس فتلاقى الكل يقول سمك وخلاص لأن تنوع الأسماك وكثرتها فى البلد كان بيخلى فرصه لكل الناس تاكل سمك وتتبسط والشعب الدمياطى عموما بيحب السمك وبيعتبرها أكلته المفضلة ،لكن بصراحة اللى بنسمع عليه النهارده ده حاجة العقل مش مستوعبها خالص ،يعنى اللى عاوز ياكل شبار أخضر صغير يلاقى تمن الكيلو 30جنيه والكيلو بقى تمن الشوى 4جنيه يعنى كيلو شبار أخضر بالشوى ب34جنيه ولسه مجبش باقى المطلوب ،ولا البورى والجران اللى أسعارهم بقت حاجه صعبة جدا، البورى الصغير بيبدأ من 25جنية وصولًا إلى 60و70جنية، "دا كتير جدا على الناس"، أمس كان كيلو السردين ب20جنيه، السردين ده بجد كان أكل أكتر الناس الغلابة، النهارده ثمنه 20جنيه، إذا من لديها أربع أولاد محتاجة تجيب على الأقل كيلو ونص ب30جنيه ولسه الشوى والخضره وباقى التجهيزات، فمن أين نوفر كل ذلك.
مروة عبد المقصود، موظفة، تقول"لأننا موظفين نعتمد على السمك يمكن 3مرات فى الأسبوع، وكنا بنقول أكله مريحه بنطلب السماك ونقوله على طلبنا وهو يشوى وبعد الشغل بفوت أجيبه وأروح أطبخ الرز ويوم ويعدى ،لكن النهارده اليوم ده بقى مش بيعدى كدا أقل أكلة سمك النهارده بتتكلف 60جنيه تمن السمك بس غير الحاجات التانية لأن الأسعار بقت نار بصراحة يعنى اللى كنا بنجيبه بأربعين جنيه النهارده بنجيبه بستين جنيه، البلطى اللى كان ب15جنيه وكان زى الفل النهارده تمنه خمسة وعشرين جنيه ومتعرفش تتكلم كلمه مع السماك ،وتضيف أكلة السمك اللى كانت ملاذ ومهرب من الغلاء بقت فى حد ذاتها عبئ على الأسر وسط الغلاء للى إحنا عايشين فيه ".
هانى سعد، سماك، يقول عن أسعار الأسماك الدنيس النهارده بيبدأ من خمسين جنيه للكيلو ويوصل لغاية 100جنيه و120جنيه والجمبرى الصغير بيبدء من 25جنيه ويوصل لغاية 150جنيه للكيلو والبربونى يبدء من 35جنيه لغاية 80جنيه والبلطى بيبدء من 15جنيه للصغير ويوصل لغاية 30جنيه للكبير والبورى من 25جنيه لغاية 70جنيه والمرجان بتبدء أسعاره من 35جنيه لغاية 70جنيه والسردين البلدى ب20جنيه ويعترف هانى أن الأسعار مرتفعه عن معدلها الطبيعى ولكنه يعلل ذلك ويقول "أسعار السولار إرتفعت وده خلى أصحاب المراكب ترفع أسعار السمك كمان سيارات النقل مهى برده بتشتغل بالسولار وأصحابها رفعوا الأجر كمان عندك الصيادين كانوا ممنوعين من الصيد فى البحر فى أشهر وقف الصيد ،يعنى الصياد عاوز يعوض الفترة اللى قعدها ،كمان عندك اللحوم بأنواعها أسعارها إرتفعت وبعد الضجة اللى إتعملت على لحوم الحمير وخلافه ناس كتير بقت تفضل أكل السمك وتقول أهو أضمن كل ده عمل ضغط وزيادة طلب على شراء السمك وزى ما بيقولوا السوق عرض وطلب "
وأمس قامت حملة من التموين بتحرير عدة محاضر لعدد من بائعى الأسماك بعد شكوى المواطنين من زيادة الأسعار ،ولكن على الرغم من ذلك يبقى الحال على ماهو عليه زيادة فى الأسعار يعانى منها المواطن المطحون .