بعد ضريبة الفول والطعمية..أهالى دمياط: حتى أكل الغلابة لم يرحموه

تسود حالة من الاستياء الشديد بين المواطنين بدمياط منذ الإعلان عن تطبيق ضريبة جديدة على محلات الفول والطعمية وأبرز تعليقات المواطنين، حتى الفول والطعمية لم يرحموهم، وعلق الكثير من المواطنين معترضين على القرار بفرض ضريبة على أكلة الغلابة، ولماذا لاتفرض الدولة ضرائب على رجال الأعمال وأصحاب الشركات والمصانع الذين يجنون مكاسب بالملايين أو المليارات ؟
وبالتزامن مع إعلان مجلس الوزاراء وقف تطيبق ضريبة على راس المال المتداول فى البورصة ،أعلنت وزارة المالية عن فرض ضريبة جديدة على محلات الفول والطعمية التى يتجاوز حجم مبيعاتها المليون الجنيه سنويا ،مضيفين بذلك أعباء جديدة على الشريحة الأكبر فى المجمتع والتى تتجاوز 40%منه ربما يعتمد أكثرها فى وجبتين على الأقل يوميا على الفول والطعمية .
يقول عبد القادر عتمان نجار ،الفول والطعمية وجبة أساسية عند الكثير من ابناء شعب دمياط وربما معظم أبناء الشعب يتناولون الفول والطعمية كوجبة فطور أساسية صباح كل يوم ،وهناك الكثير يعتمد على وجبات الفول والطعمية كوجبة غداء ،ولا يختلف أمر وجبة العشاء عن الفطور فمعظم مواطنى دمياط يتناولون الفول والطعمية فى وجبة العشاء ،ويضيف ضرائب جديدة على الفول والطعمية يعنى إرتفاع جديد فى الأسعار ،يعنى ناس كتير أوى هيصعب عليها حتى تجيب سندوتش الفول والطعمية اللى هو أرخص أكلة الوقتى ،مش عارف هى الحكومة عاوزة مننا إيه ؟
زيد محمود طالب يقول "الرئيس كان قال هاتكلوا مصر ،أهو الوقتى مصر هى اللى بتاكلنا حتى الفول والطعمية الحكومة عنيها عليهم ،طيب ورجال الأعمال اللى بيكسبوا ملايين يوميا وبيستفيدوا من كل شئ فى الدولة ليه الحكومة نسياهم كدا ؟ولا خايفين من غضب رجال الأعمال أكثر من نص الشعب ده عايش على الفول والطعمية على الاقل وجبتين يوميا فطار وغداء وربما هناك من يمر يومه بثلاث وجبات فول وطعمية ،لكن دى كمان عاوزين يغلوها على الناس يبدوا إن اللى جاى فعلا ثورة جياع "
ويؤكد عبده سعيد المحلاوى صاحب مطعم فول وفلافل أن الزيادة أوالضريبة التى تنوى الحكومة فرضها على الفول والطعمية مازالت شئ غير معروفة ولا واضحة ولكن بلا شك مجرد التصريح بها أو الإعلان عنها أصحاب الناس بضيق ،لأننا اصلا نعانى من إرتفاع أسعار كل شئ ولكن نحاول الحفاظ على سندوتش للناس تفطر به أو شوية فول ب2جنيه ،يعنى فيه ناس كتير جدا بتيجى معها 5جنيه بياخد ب2جنيه فول و2جنيه طعمية وبجنية مخلل ويبقى دبر الفطار أو العشاء لأفراد أسرته ،لكن هيبقى فيه ضرائب جديدة يبقى معتش حاجه إسمها ب2جنيه فول يبقى اللى كان بيتعشى هو وأولاده ب5جنيه معتش هيكفيه عشرة جنية ،لأن المواطن هو من يتحمل كل الزيادات هى دى الحقيقه"
بينما يتسائل صادق صابر صاحب مطعم ايضا ويقول كيف ستقوم الحكومة بتقدير قيمة مبيعات المطاعم حتى تقوم بتحديد قيمة الضرائب عليها ،يقولون أن الضرائب ستفرض على المحلات التى يتجاوز مبيعاتها المليون جنيه ،طيب وده هيحسبوه إزاى ؟ويختتم كلامه ،يبدوا إن الغلبان فى البلد دى مش هيشبع غلب .