«شالى».. جوّه مصر البعيدة

شالي هي أشهر المعالم الاثرية ومن نماذج العمارة الصحراوية النادرة، وتقع في واحة سيوة بالصحراء الغربية المصرية.
وكلمة شالي تعني المدينة القديمة باللغة المحلية لاهالي الواحة.
ما فيش تاريخ محدد لبناء شالي لكن كل الحكايات بتقول انها اتبنت بعد سقوط الامبراطورية الرومانية وما اعقبها من فوضي في الصحراء الغربية.
زادت هجمات القبائل البدوية علي اهل الواحة لدرجة ان الحكايات بتقول ان رجال الواحة وصل عددهم في الفترة دي لاربعين رجل فقط.
علشان كده اختاروا موقع بناء مدينتهم الجديدة فوق تلة مرتفعة، وبنوا المدينة علي شكل قلعة ليها بابين، بيتفتحوا مع الشروق علشان الاهالي ينزلوا لرعاية محاصيلهم، ويرجعوا وقت الغروب.. وتتقفل الابواب مرة تانية لحد الشروق.
وفضلت القلعة بتحمي ولادها اللي معروفين بالسلمية والتسامح لحد ما قرروا ينزلوا منها ويرجعوا يعيشوا مرة تانية علي ارض الواحة لما استقرت الامور وساد السلام بعد الفتح الاسلامي.
للاسف ما فضلش من معالم شالي سوي اطلال للبيوت القديمة، وده لانها كانت مبنية بمادة الكرشيف الشبيهة بالطمي في وادي النيل، لكنها مزيج من الرمال والاملاح اللي بتيجي من شواطئ البحيرات المالحة علي اطراف الواحة.
والمبني الوحيد اللي فضل علي حاله من كل مباني شالي هو المسجد اللي اتبني مع بداية دخول الاسلام للواحة.