صلاح الهلالي : رسالة إلى أخي الكنباوي

لسبب او لاخر انطلق مصطلح حزب الكنبه
و يشاع ان حزب الكنبه ده حزب موجود طول عمره فى مصر ولكن تمرد عليه البعض و نزلو الميدان علشان كرامتهم وجعتهم من التلطيش و البهدله و فساد الحكومه
وكل ده طبعا لمجرد هدف ان ممكن ولادنا يعيشو فى بيئه افضل لو تعبنا احنا شويه
فطبعا اتجه جمهور الكنباويه الى النقض و الذى منه و بعدين يطلعو يقول عجله الانتاج طب سوأل صغير واجع دماغى هو مصر بتنتج ايه اصلا علشان يقف او انت عندك ايه فى بيتك منتج مصرى اصلا
اخى الكنباوى مصر لا تنتج ابر خياطه ولا حتى صواريخ رمضان كله صينى فى الاخر حتى الكنبه اللى انتا قاعد عليها انتاج صينى
و فى الاخر اتضح ان عجله الانتاج مهويه و مركونه على رصيف الاستقرار جوه مخزن المجلس العسكرى و بالنظر على بلد الصنع اتضح ان عجله الانتاج مكتوب عليها صنع فى الصين
اخى الكنباوى هل تعرف من هم اعداء الثوره؟
اعداء الثوره ثلاث انواع :
الاول : هم من يريد الاعتراض لمجرد الاعتراض املا فى ان يظهر بذلك او يكون له شخصيه وهو نفس الشخص الذى ان اجتمع الناس على ان الثوره خطر سيبدأ هو بالهتاف باسم الثوره ليكون مختلف باختصار هو تافه على اي حال لا يملك فكر
الثاني: هم من تعود على الذل وده اكيد مش ذنبه ده بس بسبب انه طول الوقت مدمن ذل والخوف بالنسبه لهؤلاء مثل الهواء فهم يتنفسون الهوان و ممن ينطبق عليهم مبدأ ضرب القفا شفاء ربنا يشفيهم
الثالث: هم المنتفعين الذين يبكون المصالح الضائعه و اطاحه الثورة بطموحاتهم فى السلب و النهب فهم مثل الخنازير لا يمكنهم العيش فى اي بيئه نظيفة و يمكنهم اللجوء الى انظمه اخرى فى المنطقة اكيد حتكون بيئه مناسبه ليهم
اخى الكنباوى لما تعد نفسك من الاغلبيه الصامته و لما يوجد اصلا فئه صامته اننا بحاجه الى رأيك و الى افكارك لكى ننتج عجله انتاج مصريه بدل ما بنأجر عجل من الصين
اذا كنت تفضل ان تبقى مع الفئه الصامته فاعلم ان هذه الفئه هى المغلوبه على امرها ولا تملك لنفسها نفع او ضرر
الى الاخ الجالس على الكنبه اما ان تكون ايجابى لمره واحده فى حياتك او تبقى على الكنبه بالشفا لحد لما الرجاله تجيبلك حقوقك لحد عندك وانتا قاعد مستنى العدل فى البيت
طبعا أنت عارف أن أسرائيل كانت بتحكمنا من خلف ستارة مبارك ياترى حضرتك مستنى لما يبقى حاكم مصر أسمه شيمون أو كوهين ورسمى كمان . أنت عارف ان لو الثوره دى ضاعت هيضيع معاها الأنتماء اللى عاد مع بدايتها واللى مكنش موجود أصلا وعمره مهيرجع تانى وده هدف الخونه عملاء أسرائيل
تفتكر لو اعلنت الحكومه انها حتوزع شقق على الناس بتاعت الميدان مش حتروح تقف معاهم و تهتف كمان يمكن تاخد شقه بحرى او على ناصيه
و يمكن تكون من من الفئه التى تتابع الاخبار فى البلاك بيرى على شاطئ البحر فى مارينا و دى بصراحه شئ مختلف ويبقى حقك علينا احنا فى الميدان منتظيرنك لما ترجع بالسلامه
الثوره مش حطير ولا حاجه احنا مكملين لحد لما نسقط اخر واحد من النظام القديم و نحاكمه و بالنسبه لعجله الانتاج متخفش يا اخ يا كنباوى احنا حنجيب لك عجله هديه بمناسبه الثوره