أستاذ أمراض جلدية: الاستحمام بمياة فاترة يؤدي إلي ظهور 'حمو النيل'

قال الدكتور هاني الناظر أستاذ الأمراض الجلدية والرئيس السابق للمركز القومي للبحوث، أن الإستحمام بمياه فاترة في الصيف ضار جدا بالصحة، لأن الغدد الدرقية لدي الإنسان تمتلئ بالعرق وتنتفخ وتلتهب، الأمر الذي يؤدي إلي ظهور 'حمو النيل'.
وأضاف الناظر عبر حسابه علي موقع فيس بوك، قائلاً 'بمناسبة ان الصيف خلاص علي الأبواب انا عاوز ألفت نظر حضراتكم واحذركم من حاجة مهمة أغلبية المصريين بيعملوها في الصيف وهي موضوع الاستحمام بمية فاترة يعني لا هي باردة ولا هي سخنة.. ده غلط طبعا وبلاش نعمله !! ليه؟ لان مع ارتفاع حرارة الصيف احنا بنعرق كثير ومع زيادة الرطوبة بنعرق اكثر والعرق موش بيتبخر نتيجة ارتفاع الرطوبة وده بيكون نتيجته ان الغدد العرقية بتمتلئ بالعرق وتنتفخ وتلتهب وتعمل حاجة اسمها ' حمو النيل '.
وتابع 'وده بيصيب الكبار والأطفال وبيظهر علي هيئة حبوب حمراء صغيرة ولها راس بيضاء دقيقة ومعاه حرقان جامد ورغبة شديدة في الهرش ومؤلم فعلا وبيظهر في الرقبة والصدر والذراعين والظهر ومناطق الثنايا طبعا.. علشان كدة احنا لازم نستحمي في الصيف بمية باردة موش فاترة لان المية الباردة بتمنع حدوث حمو النيل اللي بالعكس بيزيد مع المية الفاترة'.
واختتم الدكتور هاني الناظر رسالته قائلاً 'وهو ده سبب تحذيري النهاردة وبدري قبل دخول الحر الشديد لاني عارف ان في ناس كثيرة متعرفش المعلومة دي وكمان لان الوقاية خير من العلاج.. 'يعني باختصار الاستحمام بالماء البارد في الصيف هايمنع ظهور حمو النيل '.