» اعرف رئيسك « تتحدي نظرية » اللي نعرفه أحسن من اللي منعرفوش «

» اللي نعرفه أحسن من اللي منعرفوش « مثل اصيل يؤمن به المصريون ويضعونه نصب أعينهم في اختياراتهم الحياتية المختلفة الا انه وبعد ثورة 25 يناير التي اعادت صياغة تاريخ مصر من جديد اصبح الامر يتطلب تغييرا في الايدلوجية التي نؤمن بها خاصة مع الثورة المعلوماتية ومواقع التواصل الاجتماعي التي استخدمها الشباب لاسقاط نظام عقيم .. ومع اقتراب موعد الانتخابات الرئاسية وفتح باب الترشح لانتخاب الرئيس القادم دشن عدد من الناشطين الاليكترونيين مبادرات وحملات اليكترونية للتعرف بالمرشحين في الانتخابات وتعريف الناخبين ببرامجهم الانتخابية.. وقد صمموا اكثر من جروب علي صفحات الفيس بوك تحت اسم " اعرف رئيسك " كما تبنت عدد من القوي السياسية وأبرزها كفاية مبادرة توعوية سواء عبر العالم الافتراضي او من خلال الشارع.. المبادرة تتضمن تعريفا بكل مرشح علي حد ونبذة عن تاريخه واقواله وبرنامج الانتخابي ومتابعة لجولاته الانتخابية وتعليقه علي الاحداث المختلفة في مصر ..
وعن الهدف من تلك المبادرة قام القائمون عليها بتقديمها من خلال طريقة سين وجيم علي النحو التالي :
س: انتوا مين ؟؟؟؟
ج: احنا مجموعة شباب جمعنا حب الوطن واتعاهدنا اننا نعمل كل شئ من أجل النهوض بيه واننا نزود وعي المواطنين ونعمل علي زيادة مشاركتهم في حل مشاكلهم واجتمعنا علي هذا العمل بغض النظر عن انتماءاتنا السياسية
س: أيه هي مبادرة اعرف رئيسك ؟
ج :- دي مبادرة عاملينها علشان نعرف الناس علي المرشحين لرئاسة الجمهورية والسيرة الذاتية ليهم والبرنامج الانتخابي الخاص بكل مرشح .
س : أيه هي خطوات العمل للمبادرة ؟؟؟
ج : خطوات العمل في المبادرة 3 خطوات الخطوة الاولي اننا عملنا صفحة لينا علي الفيس بوك موجود فيها كل شئ عن جميع المرشحين للانتخابات الرئاسية .
الخطوة الثانية : اننا هاننزل انشاء الله للناس علي أرض الواقع في الميادين وفي الشوارع وفي كل مكان ونعرفهم علي المرشحين للرئاسة .
الخطوة الثالثة : بعد غلق باب الترشيح هانسق مع مستشارين البرامج الانتخابية لكل مرشح وهانعمل ما بينهم مناظرات يتكلموا فيها عن البرنامج الانتخابي لكل مرشح .
س: التمويل الخاص بيكم منين؟؟؟؟؟
ج : هيكون التمويل ذاتيا وكل الي احنا هانحتاجة من فلوس هي فلوس للمطبوعات فقط لا غير وهانجمع فلوسها من بعض .
س: هل في تنسيق ما بينكم ومابين حملات دعم المرشحين ؟؟؟؟
ج : حاليا بنقوم بالتنسيق معاهم وبنكلمهم علي اساس انهم يمدونا بالأخبار اول باول واي خبر بينتشر في اي مكان لازم بنتاكد الاول من حملة الدعم لاي مرشح .
س: انتوا ليه بتعملوا كده ؟؟؟؟
ج: علشان نقدر نحدد مصيرنا بايدينا بمعني اصح مانخليش حد يختارلنا الرئيس القادم كل واحد المفروض يعمل مقارنة ما بين كل المرشحين ويختار ما بينهم ومايخليش اي حد يختارله زي للاسف ما شوفنا في انتخابات مجلس الشعب من تجاوزات كانت بتحصل فيها .
س : تقصد أية بتجاوزات مجلس الشعب؟؟؟ هل قصدك ان مجلس الشعب مش بيعبر عن الشعب؟؟؟؟
ج : اللي اقصده اني ناس كتير قوي للاسف اختاروا اعضاء مجلس الشعب بدون ما يتعرفوا علي برامجهم او اي شئ عنهم لمجرد اني فلان قالهم انتخبوا فلان والناس البسيطة من المصريين طلعوا ينتخبوا وهم مش عارفين هاينتخبوا مين بالظبط فاحنا مش عايزين ده يحصل من تاني .
س : هل حددتوا خريطة العمل الميداني علي ارض الواقع ؟؟؟
ج : في البداية هانبدأ بالقاهرة الكبري وانشاء الله بنتمني اننا ننتشر في كل المحافظات في مصر وفي كل مكان في مصر ونعرف الناس علي المرشحين ونعرف انهم لازم يختاروا بنفسهم ومايخلوش ابدا حد يختارلهم (نفسي بجد نحدد مصيرنا بايدينا) .