شيء محير للغاية.. تسأل الناس اللي حولك.. ايه الأخبار؟.. يردون مفيش جديد وربنا يستر.. ان شاء الله بس يستر من ايه؟.. يستر من اللي جاي.. ايه هو اللي جاي؟.. شايف ايه يعني؟.. هو أنا بس اللي شايف دا كل الناس شايفة وعارفة مين اللي حيسيطر علي مجلس الشعب وحتتقلب الدنيا علي بعض.. ليه التشاؤم ده؟.. مش تشاؤم ولا حاجة.. بس سمعت قالوا ايه؟.. قالوا ايه؟.. قالوا حيلبسوا الستات طرح وعبايات لأن الدين بيقول كده.. مش للدرجة دي؟.. ربنا يستر.. ايه تاني؟.. حيقفلوا الملاهي والسينمات لأنها حرام.. لا لا لم أسمع عن هذا بعد!.. طيب انت ما سمعتش لكن أنا سمعت ربنا يستر.. ان شاء الله حيستر ولازم تطمئن علي المستقبل!.. طيب اسمع دي بقة قالوا حيهدوا التماثيل بجميع أنواعها لأنها أصنام ونوع من الوثنية!!. لا لا مش معقول يا سيدي دول ناس متفتحين ومثقفين ووصلوا لأعلي الدرجات العلمية ولا يمكن يعملوا كده ولا يسمحوا بذلك ابدا.. طيب ايه رأيك بقي في المدارس والجامعات؟.. فيها ايه؟.. حيمنعوا الاختلاط بين الطلبة والطالبات ويفصلوهم عن بعض.. مش معقول ده احنا عندنا مدارس مخصصة للطالبات فقط.. بس مش كل المدارس! يا سيدي لو حصل ممكن يفصلوهم أيام الدراسة يعني صباحا للطالبات وبعد الظهر للطلبة مثلا، طيب والجامعة.. يا سيدي فيه كليات مخصصة للبنات فقط ومن يريد يتجه اليها.. بس مش كل التخصصات! ولكن يخصصوا محاضرات للطالبات وأخري للطلبة بحيث ما يكونوش مع بعض.. لا لا انت متشائم أكثر من اللازم.. انت شفت مظاهرة نسائية فقط ذهبت إلي ماسبيرو ثم إلي التحرير وكانت في منتهي الاحترام والاحتشام!.. ماشي وفيه مظاهرات كانت مختلطة.. يا سيدي كل شيء ممكن متعقدهاش.. طيب والجيش والشرطة دورهم ايه.. الجيش سيعود إلي ثكناته اما الشرطة فلازم تتواجد ماشي بس بشرط يكون فيه شرطة نسائية.. موجودة.. بس مش كفاية.. يا سيدي يزودوها شوية وما تقلقش.. طيب والأسواق.. فيها ايه دي.. كل الأسواق والمحلات الكبيرة فيها أماكن مخصصة للسيدات ولا يدخلها رجال.. طيب ووسائل المواصلات.. يا سيدي فيه عربات أو أماكن مخصصة للسيدات.. مش كفاية.. يزودوها.. امتي ان شاء الله؟ يا سيدي انتظر وما تعقدش الموضوع.. لقد استمعت وقرأت عن احاديثهم وخطاباتهم ولقاءاتهم فقد طمنوا الشعب انهم سيكونون أكثر مرونة مما يتخيل البعض لأن الدنيا اتغيرت والحال أصبح غير الحال.. طيب والأفلام.. ما لها؟.. حكاية المايوهات بقة والشواطئ وأفلام الحب والغرام؟.. ممكن كل ده يتعالج ويا سيدي اللي مش عاوز يتفرج مايروحش الفيلم اللي مش عاجبه.. عموما كل انتخابات وانت طيب واللي أنا بس ملاحظه الحقيقة ان محدش عاجبه حاجة وربنا يستر.
