قالت زوجتي حسنات / بنت الست فلنكات / لماذا لم ترشح نفسك في الانتخابات ؟ / يا ابن طنط شربات / فقلت : أنا لا أصلح يا مدام / لأن أبناء دائرتي الكرام / يريدون الفراخ والحمام / ووحدات سكنية / في منتجع القطامية / ووظائف بمرتبات خيالية / رغم أن معظمهم بلطجية وعواطلية !! / وقد أدمنوا المطالب الفئوية / ولا يجيدون سوي الاعتصامات / والهتافات والمظاهرات / و(مفيش حاجة تملا عينيهم) / ولو وقعت بين أيديهم / سيفضحونني في الحال / ويفرّجون عليَّ العيال / فقالت وهي تصطنع الكياسة / أنا قصدي انتخابات الرئاسة / وليس انتخابات البرلمان / يا زوجي الجنتلمان / فما رأيك في هذه الافتكاسة. قلت : أنا أيضاً لا أنفع للرئاسة / وليس لي في السياسة / قالت بتهديد ووعيد / ليه أنت ناقص رجل ولّا ناقص إيد ؟/ ما تخلي قلبك زي الحديد / أنت نسيت يا مجدع / جارنا الجزار الأقرع / اللي اسمه المعلم سنكح / بتاع المدبح / اللي بيبيع كوارع / علي ناصية الشارع / فقلت وأنا أتسنكح / ماله المعلم سنكح ؟ / فقالت : رشح للرئاسة نفسه / ونفخ كرشه ورفع رأسه / وهو لا يصلح / ولا يفهم إلا في المدبح / بس عنده طموح / مش زيك يا لوح / فقلت : لماذا الغلط ؟/ يا امرأة يا لبط / فقالت : والواد شُوك شُوك / بتاع التوك توك / ناوي هو كمان يترشح / وفي الناس عمّال يتمسح / وبيفسّح اللي عاوز يتفسح / والست بشاكير / بتاعت الفجل والجرجير / واثقة من نفسها علي الآخر / وبتقول ها اخلي عيشتكم (وراور) / والأسطي شكمان الميكانيكي / أبو البنت كيكي / بيقول أنا كلي مجدعة ووطنية / وأوعدكم بتصليح (العربية) السياسية / لو نجحت في الانتخابات الرياسية / حتي الواد ابن خالتي سعدية / اللي اسمه ميمي حنفية / اللي ساقط ابتدائية / واللي مخه ملوخية / وبيدلعوه ويقولوا له يا سحلية / نفسه كمان يبقي رئيس جمهورية !! / وبيقولوا إن الصين الشعبية / بتصنع رئيس آلي/ مطابق لمواصفات العصر الحالي / يعني يتقن الدلع والطبطبة / ولا يعرف العض والهبهبة / ليكون في أيدي الشعب كالتليفون المحمول / ويتحرك بالريموت كنترول !! / وسوف يطرحون منه كمية / في جميع الأسواق المحلية / ومعه كتالوج يوضح طريقة الاستعمال / فقلت : هاهاها والله عال !! / فقالت ما تخليك نبيه / هم دول أحسن منك في إيه ؟/ فقلت : طيب وبرنامجي الانتخابي ؟/ قالت : أخطب وقول يا خرابي / قصدي يا أحبابي / سأوفر أدوات تجميل / ليس لها مثيل / لشعب مصر الجميل / سوف أنفخ شفايفكم بالأوهام / وألوّن عيونكم بالأحلام / واديهم بُقين كلام / وإن عمليات الكحت والترقيع / والصنفرة والتلميع / ستكون مكفولة للجميع / واعمل لك موقع علي النت / علشان تعجن فيه وتلت / ولما تفوز ما تطوّلش في القاعدة / وكفاية مدة واحدة / وبعدها نلم (الغلَّة) / ونحط المليارات في الحلة / ونكت علي بلاد برة / هاااه إيه رأيك في كلامي يا عرَّة ؟ / يووه قصدي يا أبو تحية / فقلت : اخرسي (يا وليَّة) / أنتِ لست بحسنات / بل أنتِ سيئات / وسكّتك كلها مطبات / احفظنا يا رحمان / من كلام النسوان / واللعب في الودان .