- انت مش ناوي تطلع بقي من تحت البطانية دي ياسي السيد بقالك تلات أسابيع علي الحال ده ياخويا! - أطلع إزاي ياولية انتي مش شايفة الجوعامل إزاي؟ - بس مش معقول حتقضي يومك كله كده طب حتي طلع شوية وشك! - ازاي انتي عايزة تخلصي مني ولا إيه؟ - بعد الشر عليك ياسي السيد بس أصلك وحشتني ياراجل وكمان عملالك العدس إللي بتحبه! - بلاش دلع يا أمينة وحياة أبوكي كلها شهرين تلاتة الصيف ييجي وتشوفيني. - معقولة تقضي الشتا كله كده طب حتي اطلع استحمي وارجع تاني! - استحمي؟ انتي فاهمة بتقولي إيه.. هو انتي جبلتك إيه مش قادر افهم! - أنا قصدي يعني - اختصري يا أمينة وناوليني كلسون من الدلاب بدال ما تروحي علي أمك! - كلسون إيه يا راجل انت لابس تلات كلاسين فوق بعض! - انتي حاتعدي عليا الكلاسين يا ولية ولا إيه؟ - لا سمح الله ياخويا أنا بس يعني باقول كده مش كويس علي صحتك! - ملكيش دعوة بصحتي يا أمينة وماتنسيش تتصلي بالكهربائي يجيني هنا! - يجيك تحت البطانية ياسي السيد؟ سلامة عقلك يا راجل! - أيوه وقوليله يعمل حسابه يجيب معاه الحاجات اللازمة علشان يركبلي مكنة كابتشينو جوه البطانية! - كابتشينو ياسي السيد؟ الله يرحم أيام ما كنت تقولي مفيش أحلي من القرفة بالجنزبيل من ايدك يا أمينة! - وبعدهالك يا أمينة يا ولية مالك طالبة معاكي رومانسية في الشتا ده هي حبكت؟ - هو انا باشوف منك حاجة شتا ولا صيف ياسي السيد؟ - طب غوري فكري الكهربائي يجيب بريزة جديدة علشان يركبلي تكييف في البطانية! - طب ما ولع فيك ياسي السيد أحسن! - انتي اتجننتي ولا إيه تولعي فيا ازاي يا ولية يا خرفانة؟ - قصدي ياخويا أولعلك نار تحت البطانية عشان تدفا! - طب حتولعي النار بإييه يا فالحة مش قولتيلي الفحم خلص؟ - فيه صور فرحنا ياسي السيد تنفع؟ - وهاتي كمان فستان وطرحة الفرح شكلها شتوية مش فايته! - ده بدال ما تصالحني يعني؟ - خلاص حاصالحك يا أمينة هم العيال ناموا؟ - ناموا من بدري ياسي السيد. - طب يلا يا أمينة. - هيء هيء هيء قصدك أدخل معاك البطانية أدفيك ياسي السيد؟ - لا طبعا قصدي دخليلي شوربة العدس تدفيني! - فعلا إللي مايعرفش يقول عدس ياسي السيد!.
