ياما انت «كريم» يا »أوبر« !

- أما أنا يا سي السيد عاملالك علي العشا فضلة خيرك شوية كوارع علي شوية عكاوي علي حتتين مومبار حتاكل صوابعك وراهم ياسي السيد !
- وفينها بس النفس اللي تاكل كل ده يا أمينة !
- ليه كفي الله الشر مالك يا خويا ؟
- كان نفسي أطمن علي العيال قبل ماموت يا أمينة.
- بعيد الشر عليك يا سي السيد انت بتخزي العين ولا إيه طب ده إللي يشوفك يقول عليك فشر ماكملتش حتي أربعين سنة وبعد العشا أعملك شوية بخور علشان أرقيك.. ومن شر حاسد إذا حسد يا خويا العين فلقت الحجر!
- حسد علي إيه بس يا أمينة أنا بس كان نفسي أعمل زي كل الناس وأعمل حاجة للعيال علشان مستقبلهم يبقي متأمن!
- المستقبل بإيد ربنا وإنت أديت رسالتك وزيادة ياخويا وآدي سي ياسين ابنك الكبير سواق أوبر قد الدنيا وكمان فهمي اشتغل سواق كريم بسم الله ما شاء الله حتي كمال وهو لسه في الجامعة جيبتله توكتوك شغال بيه في الغورية وسيدنا الحسين بعد الضهر عشان يتعلم ويلاقي حاجة يعملها بعد ما يتخرج!
- وهو انا يعني كنت بادخلهم هندسة وتجارة وحقوق عشان يشتغلوا سواقين أوبر وكريم يا أمينة؟
- وماله ياخويا الشغل مش عيب طالما شريف ثم إن نص شباب البلد شغال أوبر والنص التاني كريم، ومش بس الشباب لا وكبار كمان كتير، تعرف يا سي السيد لولا إني ما بفهمش في الجيبس كنت أنا كمان اشتغلت أوبر ولا كريم!
- جيبس إيه ده يا ولية إن شاء الله وما له ومال أوبر وكريم؟
- لهو انت متعرفش إن إللي بيشتغل في أوبر وكريم لزمن يكون معاه موبايل فيه نت وجيبس عشان يعرف الطريق؟
- ههههه الله يحظك يا أمينة اسمه جي بي إس يا ولية.
- ألا هو الجيبس ده إللي بتقول عليه يا سي السيد هو نفسه الجيبس إللي حطيته علي رجلي لما ركبت السوارس ووقعت اتكسرت؟
- لا ده بيتحط علي النافوخ يا أمينة هو انتي لازم يعني تفكريني بالليلة المهببة دي، طب يمين بالله لو سمعتك بتجيبي سيرتها تاني لأكون مروحك علي أمك!
- خلاص وحياة سيدنا الحسين ما تزعل أحب علي يدك أنا بس كنت باناغشك وقلت أسليك وأنت بتاكل علشان شايفاك متضايق من ساعة ما رجعت من بره!
- ماشي سماح المرة دة وكمان سماح أكتر علشان العشوة الجيملة دي ياه فعلا الواحد كان محتاج أكلة ترم العضم أهو أنا فعلا دلوقتي حاسس إني نزلت أربعين سنة واكتر والله وفتحتي نفسي من جديد يا أمينة.
- مطرح ما يسري يمري يا خويا ألف هنا وشفا.
- قوليلي بقي يا أمونتي!
- وكمان بتدلعني يا سي السيد؟ ده انا لو أعرف كده اعشيك من ده كل ليلة.
- يسلموا إيديكي الغاليين دول.. قوليلي هم العيال ناموا؟
- هيء هيء هيء أيوه ناموا يا سي السيد !
- كلهم يا أمينة؟
- هيء هيء هيء أيوه كلهم يا سي السيد !
- طب يلا يا أمينة !
- هيء هيء هيء يلا إيه يا راجل وإحنا في الصالة؟
- يلا افتحيلنا التليفزيون علشان نشوف إيه آخر أخبار الضرايب الجديدة!