كل يوم جمعة

حوار مع »كحكة« من بتوع العيد

قلت لها بمجرد رؤيتها داخل فرن افرنجي: حضرتك »كحكة« هانم؟!.. ردت في عنجهية لا مثيل لها: انت كمان مابتشوفش؟!.. نظرك بقي 6 علي عكاز؟! فاكرني رغيف بلدي من ابوشلن؟! »كحكة« وب »عجمية« كمان!.
اصل أنا ما سبقش تشرفت بمعرفتك ولا كلمتك ابدا.. حضرتك »كحكة« هانم فعلا؟!
- امال عائشة الكيلاني يا اعمي؟!.. اما امرك غريب صحيح.. تطلع مين يا جدع انت؟!..
أنا صحفي!..
- بتشتغل في الأخبار؟!
لأ.. في »القطايف« المصورة!.
- عجيبة.. يعني مش باين عليك!..
اصل جاي متنكر في زي »صاج«!
- »صاج« في الفرن؟!
لأ.. »صاج« في البوليس! هاها.. ها.. بايخة مش كده؟!
- وعاوز ايه بقي؟!
حوار مع حضرتك!
- اتفضل وبسرعة علشان الزحمة زي ما انت شايف!
»كحكة« هانم.. قبل التحاقك ب »الفرن« اين تلقيت تعليمك؟!
- في مدرسة »الكحكيين« للغات فصل ثالثة بايخ!
يعني بتعرفي انجليزي؟!
- بس مش »فري جود« يا دوبك »بيتي فور«!
ويا تري عمر حضرتك كام دلوقتي؟!
- عاوز بسعر البنك واللا بسعر جزارة »السبكي«؟!
ياريت بسعر اللحمة علشان وحشاني!
- يبقي 56 للبتلو و55 للكندوز ودي الأسعار اللي »ماشية« اليومين دول!
حضرتك بتقصدي »البهايم« بكلمة »ماشية« دي؟!
- لأ.. بااقصد اللي »ماشية« غصب عن عين بتوع التضامن الاجتماعي!
حضرتك عضوة في الحكومة؟!
- هي فين الحكومة اللي بتقول عليها دي؟!
واضح من ردود حضرتك انك من »الفلول«!
- لأ.. أنا من »جروبي«!
أهلا وسهلا.. ويا تري مبسوطة في »جروبي«؟!
- مبسوطة قوي والاشيا »ملبن« محشي!
ويا تري محشي »لوز« واللا »جوز« واللا »احنا آسفين يا ريس« بتاعة العيال اللي في مصطفي محمود؟!
- محشي لؤم ياروح خالتك.. عايز تجر معايا »ناعم« وتخليني اتكلم في السياسة؟! أعمل معروف ما تجبليش سيرة »احنا آسفين دي«!.. عندي ولايا و»بسكويت« عاوزة اربيهم!
من ردودك باين انك »طعمة« قوي!
- وأطعم من حنان ترك في »نونة المأذونة«!
ضروري مادام »كلك« سكر و»كلك« زبدة و»كلك« عسل!
- حيث كده اتفضل مد ايدك و»كلك« حتة!
يا سلام ودمك خفيف كمان.. اذن هل تعرفين الكوميديان حجاج عبدالعظيم؟!
- ايوه حتي بالامارة »منقرع« وبيموتني من الضحك!
وكمان بتفهمي في التاريخ؟!
- انت ما تعرفش ان انا مثقفة يا جاهل؟!
حيث كده ما هي أهم الاثار المصرية؟!
- الأهرامات ومعابد الاقصر و»كحك« محمد حلمي!
مين محمد حلمي ده؟!
- ازاي ما تعرفوش ياواد؟! دا صحفي وكاتب فكاهي دمه خفيف بيكتب كل يوم سبت في »أخبار اليوم« ودا الوحيد اللي سافرت له الزقازيق علشان اقول له كل سنة وأنت طيب..
ويا تري قدم لك كحك؟!
- أيوه.. كحك فكرني بأيام ما كان جوزي بيكسر زلط في ليمان طره!
ياه.. للدرجة دي الكحك بتاعه كان عبارة عن »دبش« وزلط؟!
- دا حتي المدام بتاعته قدمته لي ومعاه »شاكوش« و»أزميل«!
وده كان مشترينه منين؟!
- باين من المقاولين العرب!
والمقاولين العرب بتعمل كحك اليومين دول؟!
- ايوه علشان »يسفلتوا« به الشوارع!
فكرتيني.. هو جوز حضرتك كان حرامي؟!
- أيوه.. واسمه »سد الحنك«!
يا تري هو فين دلوقتي؟!
- ما هو قدامك أهو.. ثالث »لوح« علي ايدك الشمال!
جوزك بيشتغل ايه؟!
- بيشتغل »نقاش«!
نقاش »دوكو«؟!
- لأ.. »نقاش« كحك!
ويا تري جاب لك ايه في العيد؟!
- جاب لي المأذون وطلقني!
عندك أولاد؟!
- ما عنديش.. بس ممكن تلاقي في الفرن اللي قدامنا!
حضرتك بتفهمي في الفن؟!
- امال في »قلي« القرنبيط وتخليل الزيتون!
يعني حضرتك فنانة؟!
- امال كيس كشري من عند أبوطارق!
اذن في مسلسل »كيد النسا« بتاع فيفي عبده؟!
- مائة في المائة كويس ومائة في المائة مش قد كده!
ومن هو مطربك المفضل؟!
- الله يرحمه محمد »الكحكاوي«!
وما رأيك في صوت عبدالحليم حافظ؟!
- مافيش بعد كده احساس ولا طرب!
هل لديك اقوال اخري؟!
- ايوه.. بعد ايه.. بعد ايه.. ابكي عليه واشتاق إليه!
ملحوظة: تبكي عليه وتشتاقي اليه بعد ما تسمعي عمرو مصطفي ومحمود العسيلي وخالتك »أنوشكا«!